រាជធានីភ្នំពេញ ៖ ក្រុមបាល់ទាត់ជម្រើសជាតិកម្ពុជាអាយុក្រោម២០ឆ្នាំ (U20) និងក្រុមបាល់ទាត់ព្រះខ័នរាជស្វាយរៀង សមាជិកលីគកំពូលកម្ពុជា (Cambodian Premier League) សុទ្ធតែទទួលបានការកោតសរសើរដូចគ្នាពីសំណាក់អ្នកស្នេហាវិស័យបាល់ទាត់កម្ពុជា…
រាជធានីភ្នំពេញ ៖ ក្រុមបាល់ទាត់ជម្រើសជាតិកម្ពុជាអាយុក្រោម២០ឆ្នាំ (U20) និងក្រុមបាល់ទាត់ព្រះខ័នរាជស្វាយរៀង សមាជិកលីគកំពូលកម្ពុជា (Cambodian Premier League) សុទ្ធតែទទួលបានការកោតសរសើរដូចគ្នាពីសំណាក់អ្នកស្នេហាវិស័យបាល់ទាត់កម្ពុជា នៅក្នុងការប្រកួតក្នុងពានរង្វាន់ចំនួន២ផ្សេងគ្នា កាលពីថ្ងៃទី២៥ ខែកញ្ញា ឆ្នាំ២០២៤ កន្លងទៅ។
ក្រុមបាល់ទាត់ជម្រើសជាតិកម្ពុជាអាយុក្រោម២០ឆ្នាំ បានឈ្នះក្នុងជំនួបទី៣ វគ្គសន្សំពិន្ទុពូល B ទល់នឹងក្រុមជម្រើសជាតិបារ៉ែនអាយុក្រោម២០ឆ្នាំក្នុងលទ្ធផល ១-០ នៅទីលាន Fu Jen Catholic University សម្រាប់ការប្រកួតវគ្គជម្រុះពានរង្វាន់ជើងឯកទ្វីបអាស៊ី AFC U20 Asian Cup 2025 ដែលឆាយន្នីសតៃប៉ិជាម្ចាស់ផ្ទះ។
មុនឈានមកដល់ជំនួបទី៤ ដែលជាជំនួបចុងក្រោយនៃវគ្គចែកពូល ក្រុមគោព្រៃជំទង់កម្ពុជា ឆ្លងកាត់៣ប្រកួតកន្លងមក ឈ្នះនេប៉ាល់ក្នុងលទ្ធផល ៤-១ កាលពីថ្ងៃទី២១ ខែកញ្ញា ប៉ុន្តែចាញ់ក្រុមការពារតំណែងជើងឯកអ៊ូសបេគីស្ថានក្នុងលទ្ធផល ៧-០ កាលពីថ្ងៃទី២៣ ខែកញ្ញា មុនពេលយកឈ្នះបារ៉ែនក្នុងលទ្ធផល ១-០ កាលពីថ្ងៃទី២៥ ខែកញ្ញា។ នៅក្នុងពូល B អ៊ូសបេគីស្ថានកាន់កាប់កំពូលតារាងបណ្តោះអាសន្ន កម្ពុជាឈរនៅលេខ ២ ដោយមាន៦ពិន្ទុស្មើគ្នា បារ៉ែនឈរនៅលេខ ៣ នេប៉ាល់ឈរនៅលេខ៤ ដោយមាន៣ពិន្ទុដូចគ្នា ខណៈម្ចាស់ផ្ទះឆាយន្នីសតៃប៉ិនៅបាតតារាងគ្មានពិន្ទុរាប់។
ជំនួបទី៤របស់កម្ពុជា ដែលជាជំនួបចុងក្រោយក្នុងពូល B នឹងត្រូវប៉ះម្ចាស់ផ្ទះឆាយន្នីសតៃប៉ិ នៅថ្ងៃទី២៩ ខែកញ្ញា នាវេលាម៉ោង ០៦:០០នាទីល្ងាច ម៉ោងនៅកម្ពុជា ដែលធ្វើឡើងនៅទីលាន Fu Jen Catholic University។
តាមរយៈលទ្ធផល៣ប្រកួតកន្លងមកនេះ ក្រុមគោព្រៃជំទង់កម្ពុជា ក្រោមការដឹកនាំរបស់លោក Koji Gyotoku គ្រូបង្វឹកជនជាតិជប៉ុន កំពុងឈរនៅលេខ១ក្នុងនាមជាក្រុមលេខ២ល្អបណ្ណោះអាសន្ន សម្រាប់ឱកាសប្រជែងកៅអីឡើងទៅកាន់ការប្រកួតជុំផ្តាច់ព្រ័ត្រពានរង្វាន់ AFC U-20 Asian Cup ឆ្នាំ ២០២៥ ដែលប្រទេសចិនធ្វើជាម្ចាស់ផ្ទះ ដែលនឹងចាប់ផ្តើមនៅថ្ងៃទី៦ ដល់ថ្ងៃទី២៣ ខែកុម្ភៈ ឆ្នាំ២០២៥។
ដោយឡែកក្នុងថ្ងៃជាមួយគ្នានោះ ក្រុមព្រះខ័នរាជស្វាយរៀង ម្ចាស់ជើងឯកលីគកំពូលកម្ពុជា នៅក្នុងប្រកួតពានរង្វាន់ជើងឯកតំបន់អាស៊ាន Shopee Cup រដូវកាល ២០២៤-២៥ បានរបូត៣ពិន្ទុក្នុងជំនួបទី២ វគ្គសន្សំពិន្ទុក្នុងពូល A ដោយចាញ់ក្រុមម្ចាស់ផ្ទះ BG Phathum United សមាជិកលីគកំពូលថៃ ដោយលទ្ធផល ២-១ នៅឯកីឡដ្ឋាន BG កាលពីថ្ងៃទី២៥ ខែកញ្ញា កន្លងទៅ។
មុនឈានដល់ជំនួបទី២ ព្រះខ័នរាជស្វាយរៀងបានឈ្នះក្រុមម្ចាស់ផ្ទះ Terengganu FC សមាជិកលីគកំពូលម៉ាឡេស៊ីក្នុងលទ្ធផល ៣-២ កាលពីថ្ងៃទី២១ ខែកញ្ញា។ នៅក្នុងពូល A ក្រុមតំណាងវៀតណាម Dong A Thanh Hoa ឈរកំពូលតារាងបណ្តោះអាសន្ន ក្រុមតំណាងឥណ្ឌូណេស៊ី PSM Makassar នៅលេខ២ និងក្រុមតំណាងថៃ BG Pathum United នៅលេខ៣ ដោយមាន៤ពិន្ទុដូចគ្នា។ ចំណែកក្រុមព្រះខ័នរាជស្វាយរៀង នៅលេខ៤ មាន៣ពិន្ទុ ក្រុមតំណាងម៉ាឡេស៊ី Terengganu FC នៅលេខ៥ មាន១ពិន្ទុ និងក្រុមតំណាងមីយ៉ាន់ម៉ា Shan United នៅបាតតារាងគ្មានពិន្ទុរាប់។
ក្រុមព្រះខ័នរាជស្វាយរៀង ក្រោមការដឹកនាំរបស់លោក Pep Muñoz គ្រូបង្វឹកជនជាតិអេស្ប៉ាញ នឹងត្រូវទទួលក្រុម PSM Makassar ដែលជាជំនួបទី៣ នៅពហុកីឡដ្ឋានជាតិអូឡាំពិក (ស្តាតអូឡាំពិក) រាជធានីភ្នំពេញ នាថ្ងៃទី៨ ខែមករា ឆ្នាំ២០២៥។
ក្រោយចប់ការប្រកួតដ៏សំខាន់ កាលពីថ្ងៃទី២៥ ខែកញ្ញា សង្កេតឃើញថា អ្នកគាំទ្របាល់ទាត់នៅកម្ពុជាជាច្រើន រួមទាំងអតីតកីឡាករបាល់ទាត់ផងដែរនោះ ក្រៅពីរីករាយជាមួយនឹងជ័យជម្នះរបស់ក្រុមជម្រើសជាតិកម្ពុជាអាយុក្រោម២០ឆ្នាំហើយនោះ ក៏បានសរសើរអំពីទម្រង់លេងដ៏ល្អរបស់ក្រុមព្រះខ័នរាជស្វាយរៀងផងដែរ បើទោះបីជាចាញ់ក្រុមម្ចាស់ផ្ទះ BG Pathum United ដោយពួកគេមិនអនុញ្ញាតឱ្យគូប្រកួតគ្រប់សង្កត់តែម្ខាង ក៏ដូចជាផ្តល់ការលំបាកដល់គូប្រកួតរហូតសម្រេចបានគ្រាប់បាល់បញ្ចូលទី១គ្រាប់ផងដែរ។
តួយ៉ាងក្នុងចំណោមនោះ លោក ឈិន ឈឿន អតីតកីឡាករឆ្នើមក្រុមព្រះខ័នរាជស្វាយរៀង និងក្រុមជម្រើសជាតិកម្ពុជា ក៏បានលើកឡើងតាមរយៈការបង្ហោះលើគណនីហ្វេសប៊ុករបស់លោកផងដែរថា «អបអរសាទរដល់ប្អូនៗ ជម្រើសជាតិកម្ពុជា U20 បានយកឈ្នះ បារ៉ែន 1-0»។ ជាមួយការបង្ហោះផ្សេងទៀតថា «ចង្វាក់បាល់របស់ព្រះខ័នរាជស្វាយរៀងល្អណាស់ មានឱកាសច្រើនតែមិនអាចសម្រេចទីបាន»។ រួមជាមួយការបង្ហោះមួយផ្សេងទៀត ដែលភ្ជាប់រូបភាពរបស់លោកគ្រងឈុតក្រុមព្រះខ័នរាជស្វាយរៀងថា «អតីតកាលធ្លាប់ជាកីឡាករនៅស្វាយរៀង ខ្ញុំពិតជាស្រឡាញ់ចង្វាក់នៃការលេងរបស់ក្លិបព្រះខ័នរាជស្វាយរៀង ពីក្រោមរហូតដល់លើល្អណាស់»៕ រូបភាព ៖ សហព័ន្ធកីឡាបាល់ទាត់កម្ពុជា, Preah Khan Reach Svay Rieng FC និង Chhin Chhoeun-ឈិន ឈឿន
ចែករំលែកព័តមាននេះ