ទីក្រុងប៉េកាំង៖ ប្រទេសចិនប្រកាសថាខ្លួនបានធ្វើតេស្តគ្រាប់មីស៊ីលអន្តរទ្វីបនៅមហាសមុទ្រប៉ាស៊ីហ្វិកដោយជោគជ័យ។ ជាករណីដ៏កម្រដែលប្រទេសចិនប្រកាសបែបនេះជាផ្លូវការ។ កាលពីពេលកន្លងមក ប្រទេសចិនបើទុកជាធ្វើតេស្តអាវុធប្រភេទនេះក៏ធ្វើតេស្តស្ងាត់ៗមិនឱ្យគេដឹង ហើយមិនមែនធ្វើនៅលើផ្ទៃសមុទ្រដ៏ធំល្វឹងល្វើយបែបនេះទេគឺធ្វើនៅតំបន់បិទបាំងនៅឯតំបន់ម៉ុងហ្គោលីខាងក្នុង។
ច្បាស់ណាស់ថាការធ្វើតេស្តលើកនេះបង្កការភ្ញាក់ផ្អើលមិនតិចទេសម្រាប់សហគន៍អន្តរជាតិនៅពេលប្រទេសចិនពង្រីកអាវុធនុយក្លេអ៊ែររបស់ខ្លួនកាន់តែខ្លាំងនៅពេលមានសភាពតានតឹងនៅក្នុងតំបន់ និងពិភពលោក។ គ្រាប់មីស៊ីលអន្តរទ្វីបនោះមិនបានប្រើប្រាស់ក្បាលគ្រាប់នុយក្លេអ៊ែរមែនទែនទេ។ ប៉ុន្តែប្រើប្រាស់ក្បាលគ្រាប់សិប្បនិម្មិត ឬឧបកិច្ច។
ក្រសួងការពារជាតិចិនចាត់ទុកថាការធ្វើតេស្តមីស៊ីលនេះធ្វើឡើងជាធម្មតាគ្មានអ្វីគួរឱ្យភ្ញាក់ផ្អើលទេ។ ការបាញ់សាកល្បងនេះមិនមែនដើម្បីសន្សំរឿង ឬចង់បង្កបញ្ហាជាមួយប្រទេសដទៃឡើយ ហើយប្រទេសចិនក៏បានជម្រាបជូនដំណឹងទៅប្រទេសដែលពាក់ព័ន្ធរួចហើយដែរ។ មន្ត្រីយោធាជប៉ុនប្រាប់ថាខ្លួនទទួលបានការជូនដំណឹងពីប្រទេសចិនថាអាចនឹងមានធ្លាក់កម្ទេចកម្ទីនៃអំបែងគ្រាប់មីស៊ីលចូលទៅសមុទ្រចិនខាងត្បូង និងភាគខាងជើងប្រទេសហ្វ៊ីលីពីន។
នេះជាករណីដ៏កម្រដែលប្រទេសចិនធ្វើតេស្តគ្រាប់មីស៊ីលរយៈចម្ងាយឆ្ងាយចូលទៅក្នុងសមុទ្រ។ កាលពីមុន គេធ្លាប់ឃើញប្រទេសនេះធ្វើតេស្តស្ងាត់ៗនៅតំបន់ម៉ុងហ្គោលីខាងក្នុង។ កងទ័ពចិនមានភារកិច្ចអភិវឌ្ឍអាវុធនុយក្លេអ៊ែររបស់ខ្លួនដើម្បីទប់ទល់នឹងប្រទេសអាមេរិកដែលមានប្រព័ន្ធការពារមីស៊ីលទំនើប, មានប្រព័ន្ធឃ្លាំមើល និងសម្ព័ន្ធភាពយោធាកាន់តែច្រើន។
ជាច្រើនឆ្នាំមកហើយ ប្រទេសចិនអនុវត្តយោបាយមិនប្រើប្រាស់អាវុធនុយក្លេអ៊ែរវាយប្រហារទៅលើគេមុនទេបើគេមិនទាន់វាយមកលើខ្លួន។ ប៉ុន្តែឥឡូវនេះចិនមិនអន់ទេ។ សមត្ថភាពរបស់កងទ័ពរំដោះប្រជាជនចិន ភីអិលអេ (PLA) អាចប្រហាក់ប្រហែលនឹងប្រទេសមហាអំណាចនុយក្លេអ៊ែរធំៗ។ ចិនអាចអភិវឌ្ឍកម្មវិធីអាវុធរបស់ខ្លួនបាញ់ពីដីក៏បាន ពីសមុទ្រក៏បាន ពីអាកាសក៏បាន។
អ្នកដែលមានសិទ្ធិបញ្ជាឱ្យប្រើប្រាស់អាវុធនុយក្លេអ៊ែរគឺមានតែគណៈកម្មការយោធារបស់បក្សកុម្មុយនិស្តចិនតែប៉ុណ្ណោះដែលមានលោកស៊ីនជីនពីងជាប្រមុខ។ សព្វថ្ងៃនេះ គេប៉ាន់ស្មានថាប្រទេសចិនមាននុយក្លេអ៊ែរជាង៥០០គ្រាប់។ ក្នុងនោះ ៣៥០គ្រាប់អាចបំពាក់នៅលើមីស៊ីលអន្តរទ្វីប។ ត្រឹមឆ្នាំ២០៣០ខាងមុខនេះចំនួននុយក្លេអ៊ែរនៅក្នុងឃ្លាំងអាវុធរបស់ចិនអាចនឹងកើនឡើងដល់១ពាន់គ្រាប់។ នេះបើយោងតាមរបាយការណ៍របស់ក្រសួងការពារជាតិអាមេរិក (មន្ទីរបញ្ចកោណ)៕
ចែករំលែកព័តមាននេះ