រាជធានីភ្នំពេញ ៖ លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានបញ្ជាក់ថា ឆ្លងតាមការស្រង់មតិរបស់ថ្នាក់ជាតិ ការផ្តល់សេវាសាធារណៈ…
រាជធានីភ្នំពេញ ៖ លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានបញ្ជាក់ថា ឆ្លងតាមការស្រង់មតិរបស់ថ្នាក់ជាតិ ការផ្តល់សេវាសាធារណៈ ជូនប្រជាពលរដ្ឋនៅរាជធានីភ្នំពេញ ទទួលបានការពេញចិត្តពេញថ្លើមពីប្រជាពលរដ្ឋប្រមាណ៨២% ។
ការបញ្ជាក់បែបនេះ របស់លោក ឃួង ស្រេង ធ្វើឡើងក្នុងពិធីប្រកាសចូលកាន់មុខតំណែងអភិបាលរង នៃគណៈអភិបាលខណ្ឌ នាយករដ្ឋបាល នៅក្នុងរចនាសម្ព័ន្ធរបស់រដ្ឋបាលខណ្ឌនានា នៃរាជធានីភ្នំពេញ នារសៀលថ្ងៃទី២០ ខែធ្នូ ឆ្នាំ២០២៤នេះ នៅសាលារាជធានីភ្នំពេញ ក្រោមអធិបតីភាពលោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោក ឃួង ស្រេង អភិបាល នៃគណៈអភិបាលរាជធានីភ្នំពេញ ។
លោក ឃួង ស្រេង ក្នុងឱកាសនោះ បានថ្លែងនូវការកោតសរសើរ និងអំណរគុណផងដែរ ចំពោះមន្ត្រីរាជការស៊ីវិល កងកម្លាំង ប្រដាប់អាវុធគ្រប់ប្រភេទ អាជ្ញាធរមូលដ្ឋាន នៅក្នុងភូមិសាស្ត្ររាជធានី ភ្នំពេញ ដែលបានចូលរួមថែរក្សាការពារសន្តិសុខ សុវត្ថិភាព របៀបរៀបរយ និងសណ្តាប់ធ្នាប់សាធារណៈ ជាមួយនិងការផ្តល់សេវាជូនប្រជាពលរដ្ឋបានល្អប្រសើរ កន្លងមកនេះ ។
លោក ឃួង ស្រេង បានបញ្ជាក់ថា ពាក់ព័ន្ធនិងការផ្តល់សេវាសាធារណៈ ជូនប្រជាពលរដ្ឋនេះ ថ្នាក់ជាតិបានចុះធ្វើការស្រង់មតិ ហើយជាមួយនឹងការស្ទង់មតិនេះ រាជធានីភ្នំពេញ ទទួលបានការពេញចិត្តពេញថ្លើមពីប្រជាពលរដ្ឋ ដែលមកទទួលសេវានេះប្រមាណ៨២% ។ ប៉ុន្តែទោះបីជាយ៉ាងណាក្តី លោកស្នើឱ្យបន្តយកចិត្តទុកដាក់បន្ថែមទៀត ទាំងការរក្សាការពារសន្តិសុខ សុវត្ថិភាព និងការផ្តល់សេវាសាធារណៈ ជូនប្រជាពលរដ្ឋ សំដៅធ្វើយ៉ាងណាឱ្យក្នុងឆ្នាំ២០២៥ ខាងមុខនេះ រាជធានីភ្នំពេញ អាចទទួលបានការពេញចិត្តពេញថ្លើមពីប្រជាពលរដ្ឋកាន់តែខ្លាំងឡើងថែមទៀត ។
លោក ឃួង ស្រេង អភិបាលរាជធានី បានបន្តទៀតថា កន្លងមកនេះរដ្ឋបាលខណ្ឌមួយចំនួន បញ្ចេញរបាយការណ៍មករដ្ឋបាលរាជធានី មានភាពយឺតយ៉ាវ។ ចំពោះបញ្ហានេះ ត្រូវតែកែសម្រួលឡើងវិញជាបន្ទាន់ មានបញ្ហាអ្វីដោះស្រាយមិនចេញ ត្រូវសុំគោលការណ៍ ឬសុំមតិដឹកនាំពីថ្នាក់រាជធានីភ្នំពេញ សំដៅធ្វើយ៉ាងណាអោយការងារនោះដំណើរការទៅដោយរលូន និងជោគជ័យ ។
ពិធីនេះ ត្រូវបានប្រកាសតែងតាំង ផ្ទេរភារកិច្ចមន្ត្រីរាជការចំនួន១៤ រូប ក្នុងនោះ ៖
១-លោក ជ គឹមស៊ អភិបាលរង នៃគណៈអភិបាលខណ្ឌដង្កោ ឱ្យមកបម្រើការងារនៅរដ្ឋបាលរាជធានីភ្នំពេញ។
២-លោក សាំង សុភៈវិចិត្រ អភិបាលរង នៃគណៈអភិបាលខណ្ឌ សែនសុខ ឱ្យមកបម្រើការងារនៅរដ្ឋបាលរាជធានីភ្នំពេញ។
៣-លោក ឡុង ង៉ែត អភិបាលរង នៃគណៈអភិបាលខណ្ឌមានជ័យ ឱ្យទៅកាន់មុខតំណែងជាអភិបាលរង នៃគណៈអភិបាលខណ្ឌឫស្សីកែវ។
៤-លោក ជា សុធារ៉ា អភិបាលរង នៃគណៈអភិបាលខណ្ឌ ៧មករា ឱ្យទៅកាន់មុខតំណែងជាអភិបាលរង នៃគណៈអភិបាលខណ្ឌទួលគោក។
៥-លោកស្រី ឈុន ស៊ុននី អភិបាលរង នៃគណៈអភិបាលខណ្ឌ ពោធិ៍សែនជ័យ ឱ្យទៅកាន់មុខតំណែងជាអភិបាលរង នៃគណៈអភិបាលខណ្ឌ ៧មករា។
៦-លោក ប្រាជ្ញ សីហា អភិបាលរង នៃគណៈអភិបាលខណ្ឌ ឫស្សីកែវ ឱ្យទៅកាន់មុខតំណែងជាអភិបាលរង នៃគណៈអភិបាលខណ្ឌសែនសុខ។
៧-លោក ទៀវ សំអឿន អភិបាលរង នៃគណៈអភិបាលខណ្ឌ ទួលគោក ឱ្យទៅកាន់មុខតំណែងជាអភិបាលរង នៃគណៈអភិបាលខណ្ឌមានជ័យ។
៨-លោកស្រី ហួត ឃឹម អភិបាលរង នៃគណៈអភិបាលខណ្ឌ មានជ័យ ឱ្យទៅកាន់មុខតំណែងជាអភិបាលរង នៃគណៈអភិបាលខណ្ឌដូនពេញ។
៩-លោក ទុយ ច័ន្ទ ជាអភិបាលរង នៃគណៈអភិបាលខណ្ឌដង្កោ សម្រាប់អាណត្តិទី២ ក្នុងដែនសមត្ថកិច្ចដដែល។
១០-លោក ញ៉ែម គឹមអាង ត្រូវបានតែងតាំងឱ្យកាន់មុខតំណែងជាអភិបាលរង នៃគណៈអភិបាលខណ្ឌមានជ័យ។
១១-លោក បែល សក្តិភក្តី ឱ្យកាន់មុខតំណែងជាអភិបាលរង នៃគណៈអភិបាលខណ្ឌដង្កោ។
១២-លោកស្រី លឹម លាងហួរ ឱ្យកាន់មុខតំណែងជាអភិបាលរង នៃគណៈអភិបាលខណ្ឌពោធិ៍សែនជ័យ។
១៣-លោក អ៊ី ពៅ ឱ្យកាន់មុខតំណែងជាអភិបាលរង នៃគណៈអភិបាលខណ្ឌ៧មករា។
១៤-លោក ជា វង្សចិន្តា តែងតាំងជានាយករដ្ឋបាលសាលាខណ្ឌមានជ័យ ៕
ចែករំលែកព័តមាននេះ