​ខេត្តកណ្តាល ៖ ចៅកែ KTV អាហារដ្ឋាន និងក្លឹប Mr. LENG កំពុងប្រកបអាជីវកម្មអត់គោរពតាមកិច្ចសន្យាអាជីវកម្មរបស់ខ្លួនដែលបានស្នើសុំទៅរដ្ឋបាលស្រុកលើកដែលឬរដ្ឋបាលខេត្តកណ្ដាលនោះឡើយ ពោលគឺបានកំពុងប្រកបអាជីវកម្មដោយលួចបើកលក់សាច់សត្វព្រៃរួមមាន សាច់សត្វ​កែះ, សត្វឈ្លូស និង សាច់សត្វជ្រូកព្រៃ ជាប្រភេទសត្វកម្រដែល​ច្បាប់​បានហាមឃាត់។ នេះបើតាមប្រភពដែលបណ្ដាញសារព័ត៌មាន កោះសន្តិភាពទទួលបាន។

បើទោះជាយ៉ាងណា ក៏ដោយ ម្ចាស់ហាងខាងលើនេះបដិសេធចំពោះព័ត៌មាននេះដោយអះអាងថាមិនមែនជាការពិតទេ។ ហាងលោកមិនមានលក់សាច់សត្វដូចដែលប្រភពបានរាយការណ៍នោះឡើយ។ លោកស្បថស្បែរអំពីការពាក់ព័ន្ធទៅនឹងការរកស៊ីបែបទុច្ចរិតណាមួយជាពិសេសអំពើពេស្យាចារជាដើម។

ប្រភពពីបុគ្គលិកសុំលាក់ឈ្មោះ​ក្នុង KTV អាហារដ្ឋាន និងក្លឹប Mr. LENG បានប្រាប់ឲ្យដឹងថា នៅក្នុង KTV សាច់ឈ្លូស ១ចាន តម្លៃ​១៥ដុល្លារ , សាច់ជ្រូកព្រៃ១ចាន ​តម្លៃ​១៥ ដុល្លារ និងសាច់សត្វកែះ​១​​តម្លៃ​២០​ដុល្លារ។ ទិដ្ឋភាពជាក់ស្ដែងដែលប្រភពបានឃើញ គឺមានទាំងឆ្នាំងនិងចានសម្ល ដែលបុគ្គលិកនៅក្នុងហាងខាងលើនេះបានបង្ហាញឲ្យឃើញថា វាជាប្រភេទសាច់សត្វដែលគេស្លសម្រាប់ឲ្យភ្ញៀវប្រាកដមែន។

ប្រភពបានបន្តថា ដល់ពេលភ្ញៀវគិតលុយ ថៅកែហាងខាងលើ បានប្ដូរឈ្មោះម្ហូបពីសាច់ឈ្លូស, សាច់ជ្រូកព្រៃ និងសាច់សត្វកេះទៅជា«សាច់ស្រស់»។

ប្រភពបានលួចខ្សឹបឲ្យដឹងទៀតថា មូលហេតុដែលចៅកែ KTV អាហារដ្ឋាន និងក្លឹប Mr. LENG លួចបើកលក់សាច់សត្វព្រៃខុសច្បាប់ទាំងនេះ ព្រោះម្ចាស់ហាងខាងលើនេះមានតួនាទីជាសមាជិកក្រុមប្រឹក្សាស្រុកលើកដែកដែលមានអំណាច ។ ប្រភពបន្តថា បើថៅកែហាងមិនខ្លាំង មិនមែនថ្ងៃវ៉ៃគ្នានៅក្នុងហាងនោះ ផ្អើលពេញស្រុកលើកដែកហើយ បែរជាសមត្ថកិច្ចនិងអាជ្ញាធរអត់ហ៊ាន​បង្ក្រាប​នោះទេ។

ម្ចាស់ហាងខាងលើលោកគ្រី ប៉េងឡេង បាទបដិសេធចំពោះការលើកឡើងនេះបើទោះបីជាភស្តុតាងរូបភាពចានឆ្នាំងសម្លនិងសំឡេង ក្រុមបុគ្គលិកទាំងនោះបញ្ជាក់ច្បាស់យ៉ាងណាក៏ដោយ។ លោកបាននិយាយថា ទីតាំងកំសាន្តរបស់លោក មិនប្រាស់ចាកច្បាប់ទម្លាប់ប្រទេសនោះឡើយ។ យ៉ាងណាក៏ដោយលោកព្យាយាមឲ្យអ្នកកាសែតបានទៅជួប ដើម្បីបង្ហាញអំពីការពិតថាតើហាងរបស់លោកមានលក់អ្វីខ្លះ?

បើតាមមន្ត្រីជំនាញនៃមន្ទីរទេសចរណ៍ខេត្តកណ្ដាល ១រូបបានខ្សឹបឲ្យដឹងថា អាជ្ញាបណ្ណទេសចរណ៍ប្រកបអាជីវកម្មរង្គសាល និងឌីស្កូតែកផ្សេង , អាជ្ញាបណ្ណទេសចរណ៍ដល់អាជីវកម្មខារ៉ាអូខេផ្សេង និងអាជ្ញាបណ្ណទេសចរណ៍ផ្ទះសំណាក់និងសណ្ឋាគារផ្សេង​ ។

ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕​