ខេត្តកំពង់ឆ្នាំង ៖ ប្រជានេសាទលក្ខណៈគ្រួសារមានចំណាប់អារម្មណ៍ថា ផលត្រីឆ្នាំនេះ សម្បូរជាងឆ្នាំកន្លងទៅ បើទោះបីស្ថិតក្នុងរដូវហាមឃាត់នេសាទយ៉ាងណាក្តី ប៉ុន្តែពួកគាត់អាចសាទរជាលក្ខណៈគ្រួសាររកចំណូលបានគួរសមដែរ ។ ប្រជានេសាទមួយរូបសុំមិនបញ្ចេញឈ្មោះ ដែលកំពុងតែយកត្រីមកលក់នៅកន្លែងប្រមូលទិញត្រីនៅមាត់កំពង់ទឹកឆ្នុកទ្រូ…
ខេត្តកំពង់ឆ្នាំង ៖ ប្រជានេសាទលក្ខណៈគ្រួសារមានចំណាប់អារម្មណ៍ថា ផលត្រីឆ្នាំនេះ សម្បូរជាងឆ្នាំកន្លងទៅ បើទោះបីស្ថិតក្នុងរដូវហាមឃាត់នេសាទយ៉ាងណាក្តី ប៉ុន្តែពួកគាត់អាចសាទរជាលក្ខណៈគ្រួសាររកចំណូលបានគួរសមដែរ ។
ប្រជានេសាទមួយរូបសុំមិនបញ្ចេញឈ្មោះ ដែលកំពុងតែយកត្រីមកលក់នៅកន្លែងប្រមូលទិញត្រីនៅមាត់កំពង់ទឹកឆ្នុកទ្រូ ស្រុកបរិបូណ៌ បានឱ្យដឹងថា គាត់នេសាទលក្ខណៈគ្រួសារដាក់មង និងលបបានច្រើនជាងថ្នាំកន្លងទៅ។ គាត់មិនដឹងថា មកពីមូលហេតុអ្វីទេ ប៉ុន្តែគ្រាន់តែដឹងថា ឆ្នាំនេះទឹកឡើងលឿន គាត់អាចដាក់មងដាក់លប បានផលត្រីច្រើនហើយអ្វីដែលចាប់អារម្មណ៍នោះ គឺត្រីខ្លះ ដែលមិនសូវឃើញ ពីមុនមក ស្រាប់តែឆ្នាំនេះសម្បូរឡើងវិញ ដូចជាត្រីប្រាជាដើម។
លោក លី ឡា នាយខណ្ឌរដ្ឋបាលជលផលនៃមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំងមបានបញ្ជាក់ថា ពិតណាស់ ឆ្នាំនេះ ផលទៅសម្បូរបើទោះក្នុងរដូវបិទនេសាទក្តី ក៏ពួកគាត់អាចដាក់មងធ្វើរបាំងខ្លីៗ ក្រឡាធំ តាមច្បាប់ស្ដីពីជលផល ហើយអាចចាប់ត្រីបានច្រើន យកទៅលក់ដើម្បីបង្កើនជីវភាពគ្រួសារ ។
លោក នាយ ខេម រដ្ឋបាលជលផលខេត្តកំពង់ឆ្នាំងបានបន្តថា កត្តាមួយចំនួនដូចជាឆ្នាំនេះ ជំនន់ទឹកទន្លេមេគង្គ បានហូរចូលមកពីដើមរដូវ រួមផ្សំនឹងខេត្តជុំវិញបឹងទន្លេសាបទឹកភ្លៀងធ្លាក់ច្រើនពីដើមរដូវដែរផង។ ជាមួយគ្នានោះ ការបង្ក្រាបបទល្មើសនេសាទដាក់របាំងស្បៃមុង ក៏ត្រូវបានបង្ក្រាប ជារៀងរាល់ថ្ងៃដែលធ្វើឲ្យផលត្រីបានកើនឡើង។
ជាក់ស្ដែង ប្រភេទត្រីមួយចំនួនដែលធ្វដំណើរឆ្ងាយមកពីទន្លេមេគង្គ ក៏បានឃើញច្រើនឡើងវិញ។ ដូចជាត្រីប្រានិងត្រីច្រើនប្រភេទទៀត ក៏បានមានវត្តមាននៅបឹងទន្លេសាបដែរ ទាំងនេះបញ្ជាក់ថា ផលត្រីមានការកើនឡើងវិញនៅឆ្នាំនេះ ។
សូមបញ្ជាក់ថា មាត់កំពុងទឹកឆ្នុកទ្រូគឺជាកំពុងទឹកដែល ជាទីតាំង ប្រមូលផ្ដុំកសិផលនិងផលនេសាទ នានាដឹកចេញទៅក្រៅខេត្តនិងរាជធានីភ្នំពេញ។
ចែករំលែកព័តមាននេះ