ទីក្រុងបាងកក៖ ខ្យល់ព្យុះត្រូពិចឈ្មោះស៊ូលីក (Soulik) នឹងបោកបក់ទៅលើប្រទេសថៃរយៈពេល៥ថ្ងៃនៅសប្ដាហ៍នេះ និងដើមសប្ដាហ៍ក្រោយដោយពាំនាំទៅជាមួយនូវភ្លៀង ផ្គរ រន្ទះ និងរលកសមុទ្រខ្ពស់ៗ។ ក្រសួងឧតុនិយមប្រកាសឱ្យប្រជាជនប្រុងប្រយ័ត្នខ្ពស់ចំពោះការធ្លាក់ភ្លៀងខ្លាំងអមដោយទឹកជំនន់ និងការបាក់ដីជាច្រើនកន្លែង។…
ទីក្រុងបាងកក៖ ខ្យល់ព្យុះត្រូពិចឈ្មោះស៊ូលីក (Soulik) នឹងបោកបក់ទៅលើប្រទេសថៃរយៈពេល៥ថ្ងៃនៅសប្ដាហ៍នេះ និងដើមសប្ដាហ៍ក្រោយដោយពាំនាំទៅជាមួយនូវភ្លៀង ផ្គរ រន្ទះ និងរលកសមុទ្រខ្ពស់ៗ។ ក្រសួងឧតុនិយមប្រកាសឱ្យប្រជាជនប្រុងប្រយ័ត្នខ្ពស់ចំពោះការធ្លាក់ភ្លៀងខ្លាំងអមដោយទឹកជំនន់ និងការបាក់ដីជាច្រើនកន្លែង។ អ្នកបើកទូក និងកប៉ាល់តូចធំគ្រប់ប្រភេទត្រូវចូលចតនៅមាត់កំពង់ជាបន្ទាន់។
មុននឹងបក់ទៅដល់ប្រទេសថៃ ខ្យល់ព្យុះស៊ូលីកវាយប្រហារប្រទេសវៀតណាមជាមុនសិនចាប់ពីយប់ថ្ងៃព្រហស្បតិ៍តទៅ។ ក្រសួងឧតុនិយមថៃព្យាករថាខ្យល់ព្យុះស៊ូលីកថ្វីដ្បិតមិនទាន់មានឋានៈជាមហាព្យុះសង្ឃរាលេខមួយប្រចាំទ្វីបអាស៊ីដូចខ្យល់ព្យុះយ៉ាជី (Yagi) ប៉ុន្តែក៏មិនអន់ប៉ុន្មានដែរ។ ខ្យល់ព្យុះស៊ូលីកនឹងបង្កជាភ្លៀងធ្លាក់ចាប់ពីកម្រិតខ្លាំងល្មមរហូតដល់ខ្លាំងបំផុតនៅក្នុងខេត្ត-ក្រុងមួយចំនួននៃប្រទេសថៃរយៈពេល៥ថ្ងៃ។ ដូច្នេះនឹងមានទឹកជំនន់យ៉ាងល្ហល្ហាចនៅតាមទីក្រុងនានារបស់ថៃ ខណៈដែលទឹកជំនន់កាលពីវគ្គមុនទើបតែស្រកមិនទាន់អស់ទាំងស្រុងនៅឡើយផង។
នៅពេលនេះខ្យល់ព្យុះបក់ទៅដល់មាត់សមុទ្រនៃខេត្តភាគកណ្ដាលវៀតណាមជាបណ្ដើរៗហើយនៅក្នុងល្បឿន៦៥គីឡូម៉ែត្រក្នុងមួយម៉ោង។ ខេត្តក្វាងនិញ (Quang Ninh) និងក្វាងទ្រី (Quang Tri) នឹងរងគ្រោះខ្លាំងជាងគេពីខ្យល់ព្យុះនេះ។ ប្រទេសថៃនឹងទទួលរងឥទ្ធិពលរបស់ខ្យល់ព្យុះនេះនៅពេលវាបក់ហួសព្រំដែនប្រទេសវៀតណាម និងឡាវ។
តំបន់ខាងជើង, ឦសាន, ខាងកើត, ខាងត្បូង និងភាគកណ្ដាលមិនអាចគេចផុតពីឥទ្ធិពលរបស់វាបានឡើយ។ ដូច្នេះ ភ្លៀងនឹងបន្តធ្លាក់ខ្លាំងទាំងយប់ទាំងថ្ងៃនៅតំបន់ទាំងនេះ។ អាជ្ញាធរចាប់ផ្ដើមប្រកាសជាបណ្ដើរឱ្យប្រជាជនរស់នៅទីតាំងទាំងនោះថែរក្សាខ្លួនឱ្យបានល្អព្រោះអាចនឹងមានជំនន់ទឹកភ្លៀងហក់ឡើងខ្ពស់ឆាប់រហ័ស ហើយនិងការហក់ឡើងខ្ពស់នៃទឹកទន្លេ។
អ្នករស់នៅតាមចង្កេះភ្នំ ជើងភ្នំ និងតំបន់ខ្សែទឹកខាងក្រោមប្រាកដជាលិចលង់ផ្ទះសម្បែងរបស់ពួកគេដោយជៀសមិនរួច។ ក្រសួងឧតុនិយមថៃប្រកាសបន្តទៀតថាចាប់ពីថ្ងៃទីព្រហស្បតិ៍ដល់ថ្ងៃអាទិត្យសប្ដាហ៍នេះ ខ្យល់កន្ត្រាក់មូសុងនិរតីនឹងប្រមូលផ្ដុំគ្នាវិលវល់ចុះឡើងៗនៅលើលំហសមុទ្រអាន់ដាម៉ាន់ (Andaman), តំបន់ភាគខាងត្បូង និងឈូងសមុទ្រថៃ។
ដូច្នេះ តំបន់ខាងត្បូងនឹងមានភ្លៀងធ្លាក់ខ្លាំង។ សមុទ្រអាន់ដាម៉ាន់អាចនឹងមានរលកកញ្ជ្រោលខ្ពស់ៗរហូតដល់កម្ពស់៤ម៉ែត្រ ឬខ្ពស់ជាងនេះបើមានភ្លៀង ផ្គរ និងរន្ទះ។ ហេតុនេះ អាជ្ញាធរយល់ថាអ្នកដែលត្រូវចេញទៅសមុទ្រដោយជិះនៅលើកប៉ាល់ធំល្មមៗគួរតែប្រុងប្រយ័ត្នខ្លួន។ ចំណែកអ្នកដែលមានទូកខ្នាតតូចមិនលើកទឹកចិត្តឱ្យចុះសមុទ្រទេ។ ពួកគេគួរចូលចតនៅមាត់កំពង់៕
ចែករំលែកព័តមាននេះ