លោកយាយម្នាក់កំពុងលាងចាន ស្រាប់តែត្រូវពស់ថ្លាន់ប្រវែងជាង៤ម៉ែត្ររឹតបម្រុងនឹងលេប
ថៃ ៖ ប្រភពពីសារព័ត៌មាន Khaosod របស់ថៃ ដែលចេញផ្សាយ នៅថ្ងៃទី១៨ ខែកញ្ញា ឆ្នាំ២០២៤ បានបញ្ជាក់ឱ្យដឹងថា…
ថៃ ៖ ប្រភពពីសារព័ត៌មាន Khaosod របស់ថៃ ដែលចេញផ្សាយ នៅថ្ងៃទី១៨ ខែកញ្ញា ឆ្នាំ២០២៤ បានបញ្ជាក់ឱ្យដឹងថា ហេតុការណ៍ពស់ថ្លាន់រឹតមនុស្សនេះបានកើតឡើង នៅក្នុងផ្ទះរបស់ស្ត្រីចំណាស់ វ័យ៦៤ឆ្នាំម្នាក់ដែលជាអ្នកបម្រើការក្នុងមន្ទីរពេទ្យមួយកន្លែង ក្នុងស្រុក Phra Samut Chedi ខេត្តសាមុតប្រាកាន ប្រទេសថៃ កាលពីវេលាម៉ោង១០យប់ ថ្ងៃអង្គារ ទី១៧ ខែកញ្ញា ឆ្នាំ២០២៤ ។
បន្ទាប់ពីត្រូវបានជួយសង្គ្រោះ ស្ត្រីចំណាស់ដែលមានឈ្មោះថា លោកយាយអារ៉ុម បានឱ្យរៀបរាប់ហេតុការណ៍ប្រាប់អ្នកសារព័ត៌មានថា ៖ បន្ទាប់ពីពិសាអាហារពេលល្ងាចរួចរាល់នៅម៉ោងប្រហែល៨យប់ ខណៈពេលគាត់កំពុងតែអង្គុយលាងចាន ស្រាប់តែគាត់ត្រូវបានពស់ថ្លាន់ដ៏ធំ បើកការវា.យប្រហារពីក្រោយ ។
លោកយាយ អារ៉ុម បានឱ្យដឹងបន្តទៀតថា ពស់ថ្លាន់នោះ វាបានឡើងពីក្រោយខ្នងគាត់តាមភ្លៅខាងស្តាំ ហើយភ្លាមៗនោះវាក៏បានចាប់ផ្តើមរឹតដៃគាត់យកតែម្តង ។ បន្ទាប់ពីត្រូវពស់រឹត លោកយាយ ក៏បានព្យាយាមតស៊ូរើបម្រាស់ និងស្រែកហៅឱ្យគេជួយ ប៉ុន្តែភ្លាមៗគ្មាននរណាម្នាក់បានលឺនោះឡើយ ព្រោះលោកយាយនៅផ្ទះតែម្នាក់ឯង ។
លុះប្រហែលជិតពីរម៉ោងក្រោយមក បន្ទាប់ពីបានលឺសំឡេងលោកយាយស្រែកអោយជួយ ក្រុមអ្នកជិតខាងក៏បានរាយការណ៍ ទៅប៉ុស្តិ៍បូលិស និងស្នើសូមជំនួយពីក្រុមសង្គ្រោះ ។ ទាំងអ្នកជិតខាង ក្រុមប៉ូលិសក៏ដូចជាអ្នកជួយសង្គ្រោះបានធាក់ទម្លុះទ្វារផ្ទះរបស់លោកយាយ ហើយក៏បានប្រទះឃើញលោកយាយកំពុងត្រូវបានពស់ថ្លាន់ដ៏ធំមួយក្បាលរឹតរហូត ដល់បាត់មាត់បាត់ករទៅហើយ ក្រោយមក លោកយាយត្រូវបានបញ្ជូនទៅព្យាបាលនៅមន្ទីរពេទ្យក្បែរនោះ។
ប៉ូលិសក្នុងតំបន់បានឱ្យដឹងថា ពស់ថ្លាន់មួយក្បាលនេះ មានប្រវែងប្រហែល៤ម៉ែត្រ ហើយតាមការសន្និដ្ឋានពស់នេះអាចវារចេញពីក្នុងវាលភក់នៃព្រៃ នៅខាងក្រោយផ្ទះរបស់លោកយាយ ហើយដោយសារភ្លៀងធ្លាក់ និងទឹកហក់ឡើងទើបពស់មួយក្បាលនេះវារចូលមករកចំណីក្នុងផ្ទះ ។
គួរកត់សម្គាល់ថា ហេតុការណ៍ពស់ថ្លាន់រឹតស្ត្រីចំណាស់ខាងលើបានកើតឡើង នៅក្នុងខេត្តសាមុតប្រាកានរំលងគ្នាមិនទាន់បានមួយខែនៅឡើយទេពីហេតុការណ៍ដែលបុរសថៃម្នាក់ ត្រូវពស់ថ្លាន់ខាំពងស្វាសពេលចូលបត់ជើងធំ ។ ដែលកាលណោះសារព័ត៌មាន Bangkok Post បានចេញផ្សាយថា កាលពីទី២២ ខែសីហា ឆ្នាំ២០២៤ បុរសជនជាតិថៃឈ្មោះ Tanat Tangtewanon ត្រូវពស់ថ្លាន់ខាំប្រដា.ប់ភេទ ពេលចូលបង្គន់បត់ជើងធំពេលងើបពីដេកដោយធ្វើឲ្យគាត់ឈឺចាប់យ៉ាងខ្លាំង ហើយគាត់ក៏មិនដឹងដែរថា តើសត្វពស់នោះមកសម្ងំក្នុងចានបង្គន់ តាំងពីពេលណានោះទេ ។
ក្រោយជួបរឿងបែបនេះ បុរសរងគ្រោះត្រូវបានបញ្ជូនទៅមន្ទីរពេទ្យដើម្បីព្យាបាលរបួស ប៉ុន្តែមិនមានសភាពធ្ងន់ធ្ងរទេ ព្រោះពស់ថ្លាន់គ្មានពិស ហើយគាត់ក៏បានបង្ហោះ Facebook ដើម្បីចែករំលែកបទពិសោធន៍អោយមនុស្សគ្រប់គ្នា មានការប្រុងប្រយ័ត្ន ជាពិសេសក្នុងរដូវភ្លៀងធ្លាក់ ដោយក្រើនរំលឹកថា មុននឹងលោកអ្នកដាក់គូទអង្គុយលើចានបង្គន់ គួរតែពិនិត្យឲ្យគ្រប់ជ្រុងជ្រោយសព្វកន្លែង និងចុចទឹកសិន សឹមបន្ទោបង់ ។
ហេតុការណ៍ដូចគ្នានេះត្រូវបានរាយការណ៍ជាច្រើនលើកច្រើនសារមកហើយ នៅក្នុងប្រទេសថៃ ជាពិសេស គឺកើតឡើងញឹកញាប់ជាងគេ នៅខេត្តសាមុតប្រាកាន ដែលភាគច្រើននៅក្នុងរដូវធ្លាក់ភ្លៀង និងទឹកជំនន់ ។ តើលោកអ្នកអាចចែករំលែកបានទេ តើមានវិធីសាស្ត្រអ្វីខ្លះដើម្បីការពារកុំអោយសត្វពស់វាចូលក្នុងផ្ទះ?
ចែករំលែកព័តមាននេះ