ខេត្តរតនគិរី ៖ លោក នូ ថេរ អភិបាលស្រុកលំផាត់ បានអំពាវនាវទៅដល់បងប្អូនប្រជាពលរដ្ឋ ដែលរស់នៅក្នុងតំបន់ទំនាប និងតាមដងទន្លេស្រែពក ក៏ដូចជាប្រជាពលរដ្ឋរស់នៅតាមដងអូរ…
ខេត្តរតនគិរី ៖ លោក នូ ថេរ អភិបាលស្រុកលំផាត់ បានអំពាវនាវទៅដល់បងប្អូនប្រជាពលរដ្ឋ ដែលរស់នៅក្នុងតំបន់ទំនាប និងតាមដងទន្លេស្រែពក ក៏ដូចជាប្រជាពលរដ្ឋរស់នៅតាមដងអូរ ដៃទន្លេស្រែពក ឲ្យមានការប្រុងប្រយ័ត្នខ្ពស់ ព្រោះកម្ពស់ទឹកទន្លេស្រែពក គិតត្រឹមម៉ោង០៨និង៣២នាទីព្រឹកថ្ងៃទី១៨ ខែ
កញ្ញា ឆ្នាំ២០២៤នេះ បានឡើងដល់ចំណុច ៩ម៉ែត្រហើយ កម្ពស់ទឹក ដែលកម្រិតប្រកាសអាសន្ន មានកម្ពស់ ១២,៥០ម៉ែត្រ ។
លោកអភិបាលស្រុក បានបន្តថា យោងតាមរបាយការណ៍របស់រដ្ឋបាលស្រុកលំផាត់ ដែលបានចុះពិនិត្យស្ថានីយ៍ទឹក នៅមុខវត្តលំផាត់ នាព្រឹកថ្ងៃទី១៨ ខែកញ្ញា ឆ្នាំ២០១៤ គិតត្រឹមម៉ោង៨និង៣២នាទី ឃើញ
ថា កម្ពស់ទឹក បើធៀបទៅនឹងថ្ងៃទី១៧ ម្សិលមិញនេះ គឺកម្ពស់ទឹកនៅព្រឹកថ្ងៃនេះ មានការកើនឡើងជាង ១ ម៉ែត្រ ។
ហេតុដូច្នេះ លោកបានចាត់កងកម្លាំងនៅក្រោមឱវាទ ឲ្យមានការត្រៀមលក្ខណៈរួចជាស្រេច ដើម្បីការជួយសង្គ្រោះដល់ប្រជាពលរដ្ឋ ដែលរងផលប៉ះពាល់ដោយសារជំនន់ទឹកទន្លេ ក៏ដូចជាជំនន់ទឹកភ្លៀង ដែលកើតឡើងជាជាយថាហេតុ ។
លោកអភិបាលស្រុក ក៏បានឲ្យដឹងទៀតថា សម្រាប់ស្រុកលំផាត់ រដ្ឋបាលស្រុក បានត្រៀមទីតាំងទួលសុវត្ថិភាព សម្រាប់ជួយប្រជាពលរដ្ឋរួចជាស្រេច។ ចំពោះមធ្យោបាយ លោកបានត្រៀមទូក កាណូត
អូប័រ ដាក់នៅក្នុងទន្លេ និងដៃទន្លេ រួចរាល់ហើយផងដែរ នេះជាការបង្ការទុកជាមុនសម្រាប់ជួយបងប្អូនប្រជាពលរដ្ឋ នៅពេលដែលបញ្ហា ដែលកើតឡើងចំពោះទឹកជំនន់ ។
ជាក់ស្ដែងនៅព្រឹកថ្ងៃទី១៨នេះផ្ទាល់ លោកបានបញ្ជាឲ្យកម្លាំងគ្រប់ប្រភេទ ចុះបង្ការ និងជូនដំណឹងទៅដល់ប្រជាពលរដ្ឋ ដែលរស់នៅតាមដងអូរ ដែលជាប់នឹងទន្លេស្រែពក និងប្រជាពលរដ្ឋ ដែលរស់នៅតាមមាត់ទន្លេស្រែពក ឲ្យពួកគាត់ត្រៀមលក្ខណៈឲ្យបានល្អប្រសើរ សម្រាប់ការជម្លាសមកទីទួលមានសុវត្ថិភាពផងដែរ៕
ចែករំលែកព័តមាននេះ