ប្រពន្ធកីឡាករឆ្នើមវៀតណាមម្នាក់ ដាក់លក់ឡានយកលុយជួយជនរងគ្រោះដោយព្យុះយ៉ាកជី
ប្រទេសវៀតណាម ៖ កីឡាករបាល់ទាត់ឆ្នើមក្រុមជម្រើសជាតិវៀតណាម ង្វៀន ក្វាងហៃ (Nguyen Quang Hai) រួមនិងភរិយា ជូ…
ប្រទេសវៀតណាម ៖ កីឡាករបាល់ទាត់ឆ្នើមក្រុមជម្រើសជាតិវៀតណាម ង្វៀន ក្វាងហៃ (Nguyen Quang Hai) រួមនិងភរិយា ជូ ថាញ់ ហួយិន (Chu Thanh Huyen) បានសម្រេចចិត្តដាក់លក់រថយន្តពួកគេ១គ្រឿង ដើម្បីយកប្រាក់ជួយប្រជាជននៅក្នុងតំបន់រងផលប៉ះពាល់ដោយសារព្យុះសង្ឃរាយ៉ាកជី (Yagi)។
ប្រភពពីសារព័ត៌មានវៀតណាម VnExpress កាលពីថ្ងៃទី១៤ ខែកញ្ញា ឆ្នាំ២០២៤ បានឱ្យដឹងថា អ្នកនាង ជូ ថាញ់ ហួយិន (Chu Thanh Huyen) បានប្រកាសដាក់លក់រថយន្ត កាលពីល្ងាចថ្ងៃអង្គារ ខណៈដែលរថយន្ត១គ្រឿងនេះ ដើមឡើយត្រូវបានគ្រោងទុកដើម្បីជាកាដូសម្រាប់អតិថិជនគាំទ្រផលិតរបស់នាង នៅក្នុងការឡាយវីដេអូ នាថ្ងៃទី២៩ ខែកញ្ញា ខាងមុខនេះ។ ប៉ុន្តែទោះយ៉ាងណា អ្នកនាងបាននិយាយថា «ជាមួយនឹងស្ថានភាពដ៏ស្មុគស្មាញពេលបច្ចុប្បន្ននេះ ដែលបណ្តាលមកពីព្យុះ ខ្ញុំ និងស្វាមីគិតថា វាជាការមិនសមហេតុផលទាល់តែសោះក្នុងការផ្តល់រថយន្តមួយគ្រឿងនៅក្នុងការឡាយវីដេអូរបស់ខ្ញុំ។ ដូច្នេះយើងសម្រេចចិត្តដាក់លក់រថយន្ត១គ្រឿងនេះ ហើយប្រាក់បានពីការលក់ទាំងអស់នឹងបរិច្ចាគទៅមូលនិធិសង្គ្រោះជាតិនៃគ្រោះមហន្តរាយ»។
រថយន្តដែលត្រូវបានប្រកាសដាក់លក់ គឺជារថយន្តអគ្គិសនីផលិតនៅក្នុងស្រុក Vinfast VF3 ដែលមានតម្លៃ ៣២២លានដុង ដែលស្មើនឹង ១៣,១៤០ដុល្លារអាមេរិក។ មុនពេលដែលអ្នកនាង ជូ ថាញ់ ហួយិន ប្រកាសដាក់លក់រថយន្តរបស់នាង កីឡាករ ង្វៀន ក្វាងហៃដែល បច្ចុប្បន្នប្រកបអាជីពជាមួយក្លិប Hanoi Police នៅលីគកំពូលវៀតណាម បានបរិច្ចាគប្រាក់ចំនួន ២៥០លានដុងរួចទៅហើយកាលពីព្រឹកថ្ងៃអង្គារ ទៅក្នុងគណនីគណៈកម្មាធិការមជ្ឈិមរណសិរ្សមាតុភូមិវៀតណាម ដើម្បីជួយប្រជាជនក្នុងតំបន់រងគ្រោះដោយទឹកជំនន់ផងដែរ។
កីឡាករ ង្វៀន ក្វាងហៃ គឺជាខ្សែបម្រើដ៏ឆ្នើមម្នាក់របស់ក្រុមជម្រើសជាតិវៀតណាម។ រូបគេបានក្លាយជាកីឡាករដ៏លេចធ្លោដំបូងគេ ក្រោយបង្ហាញសមត្ថភាពដ៏អស្ចារ្យនៅក្នុងព្រឹត្តិការណ៍ AFC U23 Championship ឆ្នាំ ២០១៨ ដែលវៀតណាមបញ្ចប់ក្នុងនាមក្រុមជើងឯករង។ ក្រោយមកកីឡាករវ័យ២៧ឆ្នាំរូបនេះ បានក្លាយជាកីឡាករដ៏សំខាន់សម្រាប់ក្រុមជម្រើសជាតិ ហើយរួមចំណែកយ៉ាងសំខាន់ឈ្នះមេដាយមាសព្រឹត្តិការណ៍ស៊ីហ្គេមឆ្នាំ ២០១៩ និងពានរង្វាន់ AFF Cup ឆ្នាំ ២០១៨។
លើសពីនេះទៀត រូបគេក៏បានជួយក្រុមជម្រើសជាតិឈានទៅវគ្គជម្រុះចុងក្រោយ World Cup ប្រចាំទ្វីបអាស៊ីជាលើកដំបូងក្នុងប្រវត្តិសាស្ត្រផងដែរ។ កីឡាករ ង្វៀន ក្វាងហៃ បានរៀបការជាមួយភ្ជាប់ជាមួយតារាម៉ូដែលវៀតណាម កញ្ញា ជូ ថាញ់ ហួយិន ដែលជាមិត្តស្រីយូរឆ្នាំរបស់ខ្លួន កាលពីខែមីនា ឆ្នាំនេះ នៅទីក្រុងហាណូយ។
ក្រៅពីកីឡាករ ង្វៀន ក្វាងហៃ និងភរិយា កីឡាករបាល់ទាត់វៀតណាមជាច្រើននាក់ផ្សេងទៀត ក៏ដុតដៃដុតជើងរួមចំណែកក្នុងជួយសង្គ្រោះប្រជាជននៅក្នុងតំបន់រងគ្រោះដោយព្យុះសង្ឃរាយ៉ាកជី តាមរយៈការបរិច្ចាគប្រាក់រាប់សិបលានដុងផងដែរ។ ក្រុមបាល់ទាត់ជម្រើសជាតិវៀតណាម និងសហព័ន្ធកីឡាបាល់ទាត់វៀតណាមក៏បានបរិច្ចាគថវិកាសរុបចំនួន ៤០០លានដុង ដែលស្មើនឹងជាង ១៦,០០០ដុល្លារផងដែរ មុនពេលការប្រកួតមិត្តភាពជាមួយថៃ នៅទីក្រុងហាណូយ កាលពីថ្ងៃទី៩ ខែកញ្ញា កន្លងទៅ៕ (ប្រភព ៖ VnExpress)
ចែករំលែកព័តមាននេះ