ខេត្តស្វាយរៀង ៖ មានរថយន្តធុនធំខ្នាតយក្សប្រភេទវ៉េអង ចំនួន០១គ្រឿង ដឹកទំនិញធ្ងន់ខ្ពស់កប់ពពក បំរ៉ុងឆ្លងដែនទៅប្រទេសវៀតណាម សង្ស័យជាទំនិញគេចពន្ធ ខណៈមកដល់កណ្តាលផ្លូវក្រឡា.ប់ផ្ងារជើងច្រងាង ។ ករណីនេះ…
ខេត្តស្វាយរៀង ៖ មានរថយន្តធុនធំខ្នាតយក្សប្រភេទវ៉េអង ចំនួន០១គ្រឿង ដឹកទំនិញធ្ងន់ខ្ពស់កប់ពពក បំរ៉ុងឆ្លងដែនទៅប្រទេសវៀតណាម សង្ស័យជាទំនិញគេចពន្ធ ខណៈមកដល់កណ្តាលផ្លូវក្រឡា.ប់ផ្ងារជើងច្រងាង ។ ករណីនេះ កើតឡើងនៅវេលាម៉ោង៩និង១០នាទីព្រឹកថ្ងៃទី១៣ កញ្ញា ២០២៤ នៅលើកំណាត់ផ្លូវលំ ស្ថិតក្នុងភូមិព្រៃរបឹសឃុំត្នោតស្រុកកំពង់រោទ៌ ។
បើតាមសមត្ថកិច្ចបានឲ្យដឹងថា រថយន្តក្រឡា.ប់នេះ ប្រភេទវ៉េអង ពាក់ស្លាកលេខកំពង់ស្ពឺ 3A-0499 ដឹកទំនិញខ្ពស់ហួសមាឌ លុះដល់ចំណុចកើតហេតុខាងលើ ក៏ក្រឡា.ប់ផ្ងារជើងតែម្តង សំណាងល្អមិនបង្កឲ្យគ្រោះថ្នាក់ដល់អ្នកធ្វើដំណើរតាមដងផ្លូវ ។
ប្រភពបន្តថា ប៉ុន្មានខែចុងក្រោយនេះ គេឃើញរថយន្តយីឌុបធុនធំៗ ប្រភេទវ៉េអង ដឹកទំនិញលើសទម្ងន់ ផ្ទុកទំនិញចាប់ពី៤០ទៅ៥០តោនធ្វើចរាចរណ៍លើផ្លូវកៅស៊ូ ឆ្លងកាត់ឃុំចំនួន០៤ គឺចេញពីផ្លូវជាតិលេខ១ ចំណុចភូមិដើមពោធិឃុំស្វាយតាយាន ស្រុកកំពង់រោទ៌ ឆ្លងកាត់ឃុំខ្សែត្រ ឃុំសំឡី ឆ្ពោះទៅភូមិធ្លកថ្មីឃុំត្នោតស្រុកកំពង់រោទ៌ បង្កឲ្យបាក់ស្រុតផ្លូវក្រាលកៅស៊ូជាច្រើនកន្លែង ហើយបន្តទៅតាមផ្លូវលំជនបទ ឆ្លងកាត់ភូមិព្រៃរបឺស និងភូមិធ្លកថ្មី បង្កឲ្យបាក់ស្រុតក្លាយជារណ្តៅសំបុកមាន់ ពិបាកធ្វើដំណើរយ៉ាងខ្លាំង ដោយសារតែរថយន្តធុនយក្សទាំងនេះបំផ្លាញ ។
ប្រភពបន្តទៀតថា រថយន្តដឹកទំនិញទាំងនេះ ធ្វើចរាចរណ៍រាល់ថ្ងៃក្នុង១ថ្ងៃៗ ចាប់ពី៣គ្រឿងទៅ០៥គ្រឿង ថ្ងៃខ្លះ១០គ្រឿងឯណោះ ។ ហើយរថយន្តដឹកទំនិញទៅផ្ទេរនៅលើផ្លូវលំជិតព្រំដែនត្រង់ចំណុចប៉ុស្តិ៍ច្រករបៀងធ្លកថ្មី ស្ថិតនៅភូមិធ្លកថ្មីឃុំត្នោតស្រុកកំពង់រោទ៌ ។
ហើយរថយន្តវៀតណាមបានឆ្លងដែនពីប្រទេសវៀតណាមចូលមកក្នុងដីខ្មែរ ដើម្បីផ្ទេរទំនិញនៅក្នុងដីខ្មែរ ពេលថ្ងៃរហូតដល់វេលាម៉ោង៦និង៥០នាទីយប់ ទើបដឹកចូលទៅប្រទេសវៀតណាម ដោយគ្មានសមត្ថកិច្ចជំនាញណាមករំខានឡើយ គ្រាន់តែមកចោមរោមយកប្រាក់ក្បាលឡាន តាមការចរចាគ្នាប៉ុណ្ណោះ ដឹកអីដឹកទៅ ។
បើតាមមហាជនប្រាប់អ្នកសារព័ត៌មានយើងថា នៅចំណុចច្រករបៀងធ្លកថ្មីនេះ ឈ្មួញវៀតណាម តែងតែយករថយន្តឆ្លងដែនចូលមកដីខ្មែររៀងរាល់ថ្ងៃរង់ចាំឈ្មួញខ្មែរដឹកទំនិញមកផ្ទេរទំនិញដាក់រថយន្តវៀតណាម ដឹកឆ្លងដែនទៅប្រទេសវៀតណាម ។
ប្រភពបន្តថា ទំនិញរួមមានស្ករស គ្រឿងអេឡិចត្រូនិច បារី ក្រណាត់គីប និងសំលៀកបំពាក់ សង្ស័យជាទំនិញគេចពន្ធ ដោយមិនឃើញមានសមត្ថកិច្ចជំនាញណាត្រួតពិនិត្យទេ … គេមកចរចាយកប្រាក់ចែកគ្នារស់ ។
មហាជនបានរិះគន់ចំៗទៅលើអាជ្ញាធរមានសមត្ថកិច្ចថា បានបើកដៃឲ្យឈ្មួញប្រើប្រាស់រថយន្តដឹកទំនិញធុនធំ ប្រភេទវ៉េអង ចំណុះចាប់ពី៤០តោនទៅ៥០តោន ធ្វើចរាចរណ៍នៅលើផ្លូវក្រាលកៅស៊ូ ដែលជាអំណោយរបស់សម្តេចតេជោហ៊ុន សែន ជាចំណងដៃប្រជាពលរដ្ឋស្រុកកំពង់រោទ៌ធ្វើដំណើរ និងផ្លូវលំដែលរាជរដ្ឋាភិបាលសាងសង់ សម្រាប់ឲ្យប្រជាពលរដ្ឋធ្វើដំណើរ ជាពិសេស មន្ត្រីសោធន់និវត្សធ្វើដំណើរទៅទីតាំងផ្ទះ១០០ខ្នង ដែលរាជរដ្ឋាភិបាលបានសាងសង់ជូនមន្ត្រីសោធន់និវត្ស នៅតាមបណ្តោយព្រំដែន ភូមិធ្លកថ្មី ឃុំត្នោត ស្រុកកំពង់រោទ៌និងភូមិតែងម៉ៅ ឃុំចន្ទ្រាស្រុកចន្ទ្រា បច្ចុប្បន្នបង្កឲ្យបាក់ស្រុតផ្លូវថ្នល់ខូចក្រហេងក្រហូងក្លាយជាសំបុកមាន់ ជាបណ្តើរៗហើយមកដល់ខែកញ្ញានេះ ។
ទាក់ទិនករណីនេះដែរ លោកហេងសំបូរ ប្រធាន សាខាគយ និងរដ្ឋាករខេត្តស្វាយរៀងបានប្រាប់ កោះសន្តិភាព តាមទូរស័ព្ទ នៅវេលាម៉ោង២និងនាទីរសៀល ថ្ងៃទី១៣ កញ្ញា ២០២៤នេះថា លោកមិនបានដឹងទេ ។ នៅពេលអ្នកសារព័ត៌មានយើងសួរថា មានមន្ត្រីគយចុះប្រចាំការត្រួតពិនិត្យទំនិញ នៅចំណុចប៉ុស្តិ៍ច្រករបៀងធ្លកថ្មីដែរឬទេ ? លោកហេងសំបូរ បិទទូរស័ព្ទភ្លាម សង្ស័យគេត្រូវគ្នាអស់ហើយ បើមិនអីចឹងទេ កុំស្មានទៅមុខបានឱ្យសោះ …ហេ ! ហេ! ៕
ចែករំលែកព័តមាននេះ