ខេត្តស្វាយរៀង ៖ ប្រជាពលរដ្ឋរស់នៅភូមិចុងព្រែករិះគន់ក្រុមហ៊ុនប្រមូលសំរាម(សុភីសម្បតិពាណិជ្ជ) បានដឹកសំរាមទៅចាក់នៅរណ្តៅចាស់ដដែល ប្រជាពលរដ្ឋបានសុំឲ្យអាជ្ញាធរក្រុងស្វាយរៀងបញ្ចប់គម្រោងចាក់សំរាមនៅរណ្តៅចាស់ភូមិចុងព្រែកបង្កឲ្យជះក្លិនស្អុយលើផ្ទះរបស់ប្រជាពលរដ្ឋដែលរស់ជិតទីតាំងចាក់សំរាមធ្វើឲ្បប៉ះពាល់ដល់សុខភាពរបស់ពួកគាត់ហើយលោកអភិបាលខេត្តស្វាយរៀងបានចេញលិខិតឲ្យក្រុមហ៊ុនប្រមូលសំរាមសុភីសម្បត្តិពាណិជ្ជ បញ្ឈប់ការចាក់សំរាមនៅក្នុងរណ្តៅភូមិចុងព្រែកនេះទៀត ព្រមទាំងបានប្រគល់ដីនៅទីតាំងថ្មីឲ្យវិនិយោគអភិវឌ្ឍន៍កសាងរណ្តៅដី ឆ្ងាយពីផ្ទះរបស់ប្រជាពលរដ្ឋ ។ ក៏ប៉ុន្តែក្រុមហ៊ុនសុភី សម្បត្តិពាណិជ្ជ ទទួលម៉ៅការប្រមូលសំរាមក្រុងស្វាយរៀងផ្គើន នៅតែដឹកសម្រាមទៅចាក់នៅក្នុងរណ្តៅ ហាមឃាត់ដ៏ដែលមិនព្រមដឹកសំរាមទៅចាក់នៅទីតាំងថ្មីទេ។
ប្រជាពលរដ្ឋលើកឡើងនេះនៅរសៀលថ្ងៃទី១៧មករា២០២៦នៅភូមិចុងព្រែកសង្កាត់ស្វាយរៀងក្រុងស្វាយរៀង។
ទាក់ទិនករណីនេះដែរ មន្ត្រីសាលាក្រុងស្វាយរៀងបានប្រាប់អ្នកសារព័ត៌មានយើងថា ករណីក្រុមហ៊ុនម៉ៅការប្រមូលសំរាម សុភីសម្បត្តិពាណិជ្ជ ចាក់សំរាមនៅរណ្តៅចាក់សំរាមភូមិចុងព្រែកនេះ ក្រុមការងារចម្រុះថ្នាក់ខេត្តធ្លាប់បានដោះស្រាយបញ្ចប់រួចហើយ ក្រោយពីក្រុមកាងារចុះទៅពិនិត្យវាយតម្លៃឃើញថា ទីលានដាក់ កាកសំណល់សំរាម ជាទីលានឯកជន ដែលមានផ្ទៃដីទំហំប្រមាណ៣ហិកតា ដែលទទួលបានការអនុញ្ញាតពីរដ្ឋបាលខេត្តក្នុងការប្រើប្រាស់និងទុកដាក់សំណល់នៅក្រុងស្វាយរៀង ក៏ប៉ុន្តែទីលាននេះពុំមានលក្ខណៈស្តង់ដាបច្ចេកទេសបរិស្ថាន ហើយការចាក់សំរាមមានលក្ខណៈចំហរមិនមានការគ្រប់គ្រងឲ្យបានត្រឹមត្រូវ ដែលជាហេតុបង្កឲ្យជះក្លិនស្អុយសាយភាយដល់ផ្ទះប្រជាពលរដ្ឋតំបន់នោះ។
ក្រោយពីបានត្រួតពិនិត្យជាក់ស្តែងនៅថ្ងៃទីក្រុមការងារឃើញថា ទីលានចាក់សំរាមនេះមិនអាចអនុញ្ញាតឲ្យប្រើប្រាស់បន្តទៀតបានទេដោយសារទីលាននេះ គ្មានលក្ខណៈបច្ចេកទេសស្តង់ដាបរិស្ថាននោះទេ។
ចំពោះឯកឧត្តមអភិបាលខេត្តបានអនុញ្ញាតឲ្យក្រុមហ៊ុនបន្តប្រើប្រាស់ទីលានរហូតដល់ចុងខែធ្នូឆ្នាំ២០២៤ ហើយក្រុមហ៊ុនត្រូវធានា មិនត្រូវឲ្យទីលានមានក្លិនមិនល្អ និងត្រូវលុបសំណល់សំរាមឲ្យអស់។
ហើយបានបញ្ចប់ទីលានចាក់សំរាមភូមិចុងព្រែកចាប់ពីដើមខែមករាឆ្នាំ២០២៥រហូតមក និងបានផ្តល់ទីតាំងទីលានចាក់សំរាមថ្មី នៅភូមិអកនាគសង្កាត់សង្ឃ័រក្រុងស្វាយរៀងរហូតបច្ចុប្បន្ន ។ ក៏ប៉ុន្តែក្រុមហ៊ុនសុភីសម្បត្តិពាណិជ្ជ នៅតែបន្តដឹកសំណល់សំរាមមកចាក់នៅទីលានចាស់ភូមិចុងព្រែកទៀត ហើយការចាក់សំណល់សំរាមទាំងនេះគ្មានលក្ខណៈបច្ចេកទេសស្តង់ដាបរិស្ថានធ្វើឲ្យជះក្លិនស្អុយសាយភាយប៉ះពាល់ដល់សុខមាលភាពរបស់ប្រជាពលរដ្ឋជាពិសេសក្មេងៗ ។
ទាក់ទិនករណីនេះដែរមិនអាចរកការបំភ្លឺពីប្រធានក្រុមហ៊ុនសុភីសម្បត្តិពាណិជ្ជបានទេរហូតដល់ល្ងាចនេះ ។
ព័ត៌មានបន្តនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ