មហាជន,ប្រជាពលរដ្ឋអ្នកធ្វើដំណើរឆ្លងកាត់ផ្លូវជាតិលេខ៤ មិនឃើញមានសកម្មភាពក្នុងការធ្វើស្ពានឡើងវិញ ដោយក្រុមហ៊ុនប៉ូលីចិន្ដានោះទេ។ ភាពស្ងៀមស្ងាត់នេះ នាំឲ្យមានចម្ងល់ថាម្ចាស់លុយគឺធនាគារពិភពលោក មិនទម្លាក់លុយឲ្យឬ បានជាក្រុមហ៊ុន មិនបន្តធ្វើការងារឲ្យរួចរាល់?
ករណីនេះ មិនអាចស្វែងរកការបកស្រាយពីខាងក្រុមហ៊ុនបានទេ? ដូចគ្នានេះដែរអ្នកនាំពាក្យក្រសួង សាធារណការនិងដឹកជញ្ជូន ក៏មិនអាចរកការពន្យល់បានដែរ។
ប្រភពព័ត៌មានបានឱ្យដឹងថា គម្រោងថវិកាទឹកប្រាក់រាប់លានដុល្លាររបស់ធនាគារពិភពលោក(world banks ) ដែលក្រុមហ៊ុនប៉ូលី ចិន្តាទទួលបានសិទ្ធិកសាងស្ពានឡើងវិញទាំងអស់តាមបណ្តោយផ្លូវជាតិលេខ៤ សរុបប្រមាណជាង៤០ស្ពាននោះត្រូវក្រុមអ្នកបច្ចកទេសស្ពានបង្ហើបឲ្យដឹងថា គ្រប់ការដ្ឋានមើលទៅដូចជាមិនមានសកម្មភាពទៅមុខឡើយ។ មិន ដឹងមកពីបញ្ហថវិកាភាគីធនាគារពិភពលោក ឬបញ្ហាបច្ចេកទេសឡើយ.. ? ឱ! ក្រុមហ៊ុនប៉ូលី ចិន្តា អើយ… សង្ស័យអត់ម្សៅធ្វើនំ?
ក្នុងរយៈពេលជិត១ឆ្នាំមកនេះ ក្រុមហ៊ុនប៉ូលី ចិន្តា សាងសង់ស្ពានបានប្រមាណចំនួន៣ទៅ៤ស្ពានប៉ុណ្ណោះ ក្នុងចំណោមស្ពានជាង៤០តាមបណ្តោយផ្លូវជាតិលេខ៤ ដែលក្រុមហ៊ុនបានសិទ្ធកសាងកន្លងមក ក្រោមគម្រោងថវិការាប់លានដុល្លារ ។
ប្រជាពលរដ្ឋដែលមានលំនៅឋាននៅតាមផ្លូវលេខ៤នេះ មានការខកចិត្តយ៉ាងខ្លាំងចំពោះការសាងសង់ស្ពានតាមផ្លូវជាតិលេខ៤នេះ ដោយសារគ្រប់ការដ្ឋានស្ទើរទាំងអស់ បង្កការរំខានស្ទះចរាចរណ៍ បណ្ដាលឱ្យខាតពេលវេលា និងពេលមានភ្លៀងម្តងៗធ្វើឱ្យគ្រប់រថយន្ត ឆ្លងកាត់មានភាពរអិលពិបាកធ្វើដំណើរយ៉ាងខ្លាំង រហូតបង្កគ្រោះថ្នាក់ចរាចរណ៍ជាច្រើនលើក នៅពេលរថយន្តឆ្លងកាត់និងវាងលើការដ្ឋានទាំងនះ។ តើក្រសួងសារធារណការ ដែលជាក្រសួងជំនាញមានបានជ្រាបបញ្ហានេះទេ ? ពិសេសម្ចាស់ថវិកាផ្ទាល់គឺធនាគារពិភពលោក តើបានដឹងបញ្ហានេះដែរឬទេ …?
ប្រភពព័ត៌មានពីមន្ត្រីជាន់ខ្ពស់១រូបឱ្យដឹងថា ក្រុមហ៊ុនប៉ូលី ចិន្តា នេះ ទទួលបានគម្រោងធ្វើផ្លូវស្ពានថ្នល់ជាច្រើនកន្លែងក្នុងប្រទេសកម្ពុជា ដែលសុទ្ធតែគម្រោងថវិកាបរទេសក្រោមឥណ្ឌទានពីធនាគារពិភពលោក ដែលមានតម្លៃរាប់សិបលានដុល្លារ តែគ្រប់គម្រោងមិនត្រូវបានក្រុមហ៊ុនអនុវត្តឱ្យបានចប់ឡើយ ប្រៀបដូចជាធ្វើនំឥតម្សៅដូច្នោះដែរ ។
បើទោះបីកន្លងមកក្រុមហ៊ុននេះ ធ្លាប់មានបញ្ហាដោយលក្ខណៈបច្ចេកទេសឬមិនមានលក្ខណៈគ្រប់គ្រាន់ក៏ដោយ ក៏ក្រុមហ៊ុននេះ ដាក់ដេញថ្លៃជាប់ បានគម្រោងអន្តរជាតិធ្វើដែរ… ។ ដូចគម្រោងធ្វើស្ពានតាមបណ្តោយផ្លូវជាតិលេខ៤ជាដើម មិនដំណើរទៅមុខរាប់ខែ .. ហេតុអ្វីបានជាមិនមានចំណាត់ការចំពោះក្រមហ៊ុនមួយនេះ ..? បញ្ហានៃការយឺត,ការខកខាន និងសកម្មភាពធ្វើមិនទៅមុខតាមគម្រោង.. ការដ្ឋានបើកខ្វះលក្ខណៈបច្ចេកទេសជាដើម…ឬមួយក្រុមហ៊ុនប៉ូលី ចិន្តា នេះ មានករណីពិសេសអី្វបានគ្មានស្ថាបន័សមត្ថកិច្ចណាហ៊ានមានចំណាត់ការ..?
ប្រភពពីមន្ត្រីជាន់ខ្ពស់មួយរូបក្នុងក្រសួងសារធារណបានបង្ហើបឱ្យដឹងថា ក្រុមហ៊ុនប៉ូលី ចិន្តា នេះ ធ្លាប់មានទំនាក់ទំនងជិតស្និតជាមួយលោកស វាសនា មន្ត្រីជាន់ខ្ពស់ និងជាមនុស្សមានឥទ្ធិពលម្នាក់ នៅធនាគារពិភពលោកប្រចាំនៅកម្ពុជា ទើបបានរាល់គម្រោងរបស់world banks តែងតែបានក្រុមហ៊ុនមួយនេះសាងសង់ជាហូរហែ ។
ប្រជាពលរដ្ឋអ្នកមានលំនៅឋាន និងអ្នកធ្វើដំណើរដែលឆ្លងកាត់ការដ្ឋានផ្លូវជាតិលេខ៤ ស្នើសុំគួរត្រួតពិនិត្យឡើងវិញ ចំពោះក្រុមហ៊ុនប៉ូលី ចិន្តា ដែលបានទទួលគម្រោងសាងសង់ស្ពាននេះ ហេតុអីបានជាការសាងសង់ យឺតយ៉ាវយ៉ាងដូច្នេះ ជាពិសេស គ្រប់ផ្លូវវាងឆ្លងកាត់ដូចជាផ្លូវចុះឋាននរកអីចឹង។ ធនាគារពិភពលោកដែលជាម្ចាស់ឥណ្ឌទាន គួរពិនិត្យបញ្ហារបស់ក្រុមហ៊ុនប៉ូលី ចិន្តា ឡើងវិញ ពីព្រោះប្រជាជនដែលមិនបានយល់ ពេលឃើញមានបញ្ហាបែបបនេះ ពួកគាត់បន្ទោសតែរាជរដ្ឋាភិបាលតែប៉ុណ្ណោះ៕
ចែករំលែកព័តមាននេះ