រាជធានីភ្នំពេញ ៖ ក្រោយដឹកនាំក្រុមបាល់ទាត់ជម្រើសជាតិកម្ពុជាទទួលបានលទ្ធផលមិនល្អប្រសើររយៈពេលជាង១ឆ្នាំកន្លងមកសហព័ន្ធកីឡាបាល់ទាត់កម្ពុជា (FFC) នៅព្រឹកថ្ងៃទី១៣ ខែកញ្ញា ឆ្នាំ២០២៤ បានប្រកាសបញ្ចប់កិច្ចសន្យាជាមួយលោក Felix Dalmas…
រាជធានីភ្នំពេញ ៖ ក្រោយដឹកនាំក្រុមបាល់ទាត់ជម្រើសជាតិកម្ពុជាទទួលបានលទ្ធផលមិនល្អប្រសើររយៈពេលជាង១ឆ្នាំកន្លងមកសហព័ន្ធកីឡាបាល់ទាត់កម្ពុជា (FFC) នៅព្រឹកថ្ងៃទី១៣ ខែកញ្ញា ឆ្នាំ២០២៤ បានប្រកាសបញ្ចប់កិច្ចសន្យាជាមួយលោក Felix Dalmas គ្រូបង្វឹកក្រុមជម្រើសជាតិកម្ពុជាហើយ ។
ការប្រកាសបញ្ចប់កិច្ចសន្យានេះ ស្របពេលលោក Felix Dalmas ទើបដឹកនាំក្រុមបាល់ទាត់ជម្រើសជាតិកម្ពុជា ធ្លាក់ត្រឹមវគ្គជម្រុះពានរង្វាន់ប្រចាំទ្វីបអាស៊ី AFC Asian Cup 2027 ក្រោយចាញ់ក្រុមជម្រើសជាតិស្រីលង្កា ដោយការទាត់បាល់ប៉េណាល់ទី ៤-២ បន្ទាប់ពីប្រកួត ១២០នាទីស្មើគ្នា ២-២។ ការបរាជ័យនេះ បានធ្វើឲ្យអ្នកគាំទ្រមានការមិនពេញចិត្តយ៉ាងខ្លាំង ដ្បិតការប្រកួតជម្រុះបឋម FIFA World Cup 2026 កម្ពុជាក៏ធ្លាក់ត្រឹមវគ្គជម្រុះបឋមផងដែរ ដែលនាំឲ្យអ្នកគាំទ្រមួយចំនួន ស្នើឲ្យមានការផ្លាស់ប្ដូរគ្រូបង្វឹកថ្មី។
នេះជាលើកទី២ ហើយ ដែលសហព័ន្ធបានប្រកាសចែកផ្លូវជាមួយគ្រូបង្វឹកសញ្ជាតិអាហ្សង់
ទីនរូបនេះ ។ លើកទី១ លោកធ្លាប់ដឹកនាំក្រុមជម្រើសជាតិកម្ពុជា ក្នុងនាមគ្រូបង្វឹកអំឡុងពេលលោក Keisuke Honda ជាអ្នកចាត់ការទូទៅ កាលពីចន្លោះឆ្នាំ២០១៨-២០២០។ គ្រានោះ លោកធ្លាប់បានបង្កើតកំណត់ត្រាថ្មីៗឲ្យវិស័យបាល់ទាត់កម្ពុជា ដោយបានដឹកនាំក្រុមកម្ពុជា ឡើងវគ្គពាក់កណ្តាលផ្តាច់ព្រ័ត្រពានរង្វាន់ AFF U22 LG Cup 2019 និងការបើកទំព័រប្រវត្តិសាស្ដ្រឡើងវគ្គពាក់កណ្ដាលផ្ដាច់ព្រ័ត្រស៊ីហ្គេម ឆ្នាំ២០១៩ នៅប្រទេសហ្វីលីពីន។
ការប្រកាសបញ្ចប់កិច្ចសន្យាលោក Felix Dalmas ពីគ្រូបង្វឹកក្រុមជម្រើសជាតិកម្ពុជានេះ គេឃើញមហាជនដែលជាអ្នកគាំទ្រក៏បានបញ្ចេញមតិ(ខម្មិន)ព្រោងព្រាតផងដែរ ដែលខ្លះនៅតែបង្ហាញសមានចិត្តជាមួយលោក Felix Dalmas ខ្លះរិះគន់កីឡាករ និង ខ្លះទៀត ឈានដល់រិះគន់ប្រធានសហព័ន្ធថែមទៀតផង។
ជាក់ស្ដែងគណនីហ្វេសប៊ុកដែលដាក់ឈ្មោះ Mateo Christopher បានខម្មិនថា «ពិតណាស់ពួកយើងប្រាកដជាមិនពេញចិត្តនឹងលទ្ធផលនៃការដឹកនាំប៉ុន្មានប្រកួតចុងក្រោយរបស់គាត់ទេ ប៉ុន្តែយើងគួរតែផ្តល់នូវសេចក្តីគោរពនិងអរគុណចំពោះបុរសម្នាក់នេះដែលជាមនុស្សដំបូងដែលដឹកនាំកម្ពុជាឆ្លងផុតវគ្គចែកពូលនៃព្រឹត្តិការណ៍ Seagame ២០១៩ និងលះបង់រាល់កម្លាំងកាយចិត្តជាច្រើនកន្លងមកដើម្បីបាល់ទាត់កម្ពុជា ជាជាងការរិះគន់បែបប្រមាថ មើលងាយ និងអាចក្លាយជាសម្ពាធផ្លូវចិត្តទៅកាន់គាត់ ។ អរគុណ Felix សម្រាប់ពេលវេលាល្អៗ កន្លងមក និងជូនពរសំណាង
ល្អ»។
គណនីឈ្មោះផន សុផា បានខម្មិនថា«ចង់ដកគ្រូប៉ុន្មាននាក់ ចង់ដាក់គ្រូប៉ុន្មាននាក់ រកគ្រូទេវតា
មកពីណាទៀតក៏មិនរីកចម្រើនដែរ បើកីឡាករលេងចរឹតតួឯក ចរឹតក្មេងលេងបាល់អួតតែស្រី។
ចំពោះប្រធានសហព័ន្ធក៏គួរតែគិតគូរដែរហើយ។
អ្នកគាំទ្របាល់ទាត់ទាំងឡាយចាំបានទេកាលគ្រូហុងដានឹងគ្រូហ្វីលីកចូលមកដំបូងៗតើគ្រប់គ្នាបាននិយាយដូចម្ដចខ្លះ? ខ្ញុំមិនបន្ទោសតែកីឡាករតែក៏មិនបន្ទោសតែគ្រូដែរ ។ បាល់ទាត់ទាំងគ្រូទាំងសិស្សទាំងមិត្តរួមក្រុមគឺមានទំនួលខុសត្រូវគ្រប់គ្នា។ ខមិ្មននេះហេតុអ្វីខ្ញុំនិយាយតែពីសិស្សបែរជាមិននិយាយពីចំណុចខ្វះខាតអសមត្ថភាពរបស់គ្រូ ព្រោះថាគ្រូអាចដកចេញឬបញ្ចប់កុងត្រាបានបើមើលទៅដឹកនាំមិនល្អ ។
ប៉ុន្តែចំពោះកីឡាករវិញគឺនៅលេងរហូតទោះដូរគ្រូថ្មីច្រើននាក់ក៏ដោយ គឺគេមិនងាយបញ្ឈប់កីឡាករឈប់ឱ្យលេងបាល់មួយជីវិតទេ» គណនីឈ្មោះសៅ ពិន បានខម្មិនថា «បញ្ចប់កុងត្រាជាមួយគ្រូបង្វឹកតែម្នាក់ក៏មិនអាចជួយឲ្យក្រុមជម្រើសជាតិរីកចម្រើនបានដែរ គឺត្រូវតែរុះរើក្បាលម៉ាស៊ីនសហព័ន្ធ និងមន្ត្រីអសមត្ថភាពមួយចំនួនទៀត ហើយជំនួសមកវិញនូវក្បាលម៉ាស៊ីននិងមន្ត្រីដែលមានឆន្ទៈ និងទស្សនៈវិស័យលេីវិស័យបាល់ទាត់ ទេីបបាល់ទាត់កម្ពុជារីកចម្រើនបាន»
ចំណែកខ្សែបម្រើប្រយុទ្ធកូនកាត់ខ្មែរ-អាមេរិក Nick Taylor មុននេះបានលើកឡើងថា កីឡាករក្នុងប្រទេសកម្ពុជានៅមានកម្រិត បើប្រៀបធៀបនឹងប្រទេសក្នុងតំបន់។
ប្រការនេះជាមូលហេតុធ្វើឲ្យពិបាកក្នុងការជ្រើសរើសកីឡាករដើម្បីពង្រឹងក្រុមជម្រើសជាតិ ។ ប្រទេសមួយចំនួននៅតំបន់អាស៊ាន ដូចជាឥណ្ឌូណេសុី និងម៉ាឡេសុី មានកីឡាករកូនកាត់ច្រើនលេងនៅក្រៅប្រទេស។ ទើបតែរយៈពេល២ឆ្នាំចុងក្រោយនេះប៉ុណ្ណោះដែលកម្ពុជាបានព្យាយាមស្វះស្វែងរកកីឡាករកូនកាត់នៅក្រៅប្រទេស និងផ្តល់សញ្ជាតិកីឡាករបរទេសលេងនៅលីគកំពូលកម្ពុជាដើម្បីក្លាយជាកីឡាករជម្រើសជាតិ ។
ជាក់ស្តែងមានរូបលោក Nick Taylor ជាកីឡាករខ្មែរ-អាមេរិកយុវជន លឹម លោកាថុងនិង Asharvy Mustapha ជាដើម។ ចំណែកកីឡាករផ្តល់សញ្ជាតិមាន Yudai Ogawa មកពីប្រទេសជប៉ុន កីឡាករ Mizuno មកពីប្រទេសជប៉ុន និងកីឡាករ កាន់ ម៉ូ មកពីអាហ្វ្រិកខាងត្បូង៕
ចែករំលែកព័តមាននេះ