បើតាមការព្យាករណ៍នានារបស់ស្ថាប័នរដ្ឋាភិបាលក៏ដូចជាអង្គការនិងធនាគារហិរញ្ញវត្ថុធំៗសុទ្ធតែបញ្ជាក់ អំពីស្ថានភាពសុខភាពនៃម៉ាក្រូសេដ្ឋកិច្ចកម្ពុជាថានៅក្នុងលក្ខខណ្ឌមួយប្រសើរ នៅក្នុងអត្រាកំណើនពី ៥,៦ទៅ ៦ភាគរយ តាមមូលដ្ឋានសេដ្ឋកិច្ចដែលគេបានទទួលយកមកវិភាគ។ នេះជាតួលេខល្អ ប៉ុន្តែ ស្ថានភាពជីវភាពរបស់ប្រជាជនដែលប្រកបមុខរបរតូចតាចនៅតែមានការលំបាកនៅឡើយ។ ប៉ុន្តែនៅកម្រិតមីក្រូសេដ្ឋកិច្ច…
បើតាមការព្យាករណ៍នានារបស់ស្ថាប័នរដ្ឋាភិបាលក៏ដូចជាអង្គការនិងធនាគារហិរញ្ញវត្ថុធំៗសុទ្ធតែបញ្ជាក់ អំពីស្ថានភាពសុខភាពនៃម៉ាក្រូសេដ្ឋកិច្ចកម្ពុជាថានៅក្នុងលក្ខខណ្ឌមួយប្រសើរ នៅក្នុងអត្រាកំណើនពី ៥,៦ទៅ ៦ភាគរយ តាមមូលដ្ឋានសេដ្ឋកិច្ចដែលគេបានទទួលយកមកវិភាគ។ នេះជាតួលេខល្អ ប៉ុន្តែ ស្ថានភាពជីវភាពរបស់ប្រជាជនដែលប្រកបមុខរបរតូចតាចនៅតែមានការលំបាកនៅឡើយ។
ប៉ុន្តែនៅកម្រិតមីក្រូសេដ្ឋកិច្ច ជាក់ស្តែងពលរដ្ឋជាច្រើននៅតែរអ៊ូរទាំរឿងការធ្លាក់ចុះចំណូល និង ពិបាកនៅក្នុងការប្រកបរបរទទួលទាន ដូច្នេះរដ្ឋាភិបាលប្រហែលជាត្រូវហត់បន្ថែមទៀត ។
ផ្អែកតាមទិន្នន័យ ដែលអគ្គនាយកដ្ឋានគយនិងរដ្ឋាករកម្ពុជាបានបង្ហាញកាលពីថ្ងៃអង្គារ៍កន្លងទៅនេះបានឲ្យដឹងថា ទំហំពាណិជ្ជកម្មអន្តរជាតិរបស់កម្ពុជានៅក្នុងរយៈពេល៨ខែនៃឆ្នាំ២០២៤ មានតម្លៃសរុប ដល់ទៅ ៣៦,៤៨ ពាន់លានដុល្លារ កើនឡើង ១៦,៥ ភាគរយធៀបនឹងទំហំ ៣១,៣២ ពាន់លានដុល្លារក្នុងរយៈពេលដូចគ្នាកាលពីឆ្នាំមុន។ ដោយឡែកការនាំចេញសរុបរបស់ព្រះរាជាណាចក្រនៅក្នុងរយៈពេលដដែលមានទំហំប្រហែលជា១៧,៥៨ ពាន់លានដុល្លារ កើនឡើងប្រមាណជា១៦,៧ភាគរយ ហើយការនាំចូលវិញមានតម្លៃសរុបមានតម្លៃ ១៨,៩ពាន់លានដុល្លារ កើនឡើង ១៦,២ ភាគរយ។
របាយការណ៍បានបង្ហាញថា ប្រទេសចិននៅតែជាដៃគូពាណិជ្ជកម្មកំពូលរបស់កម្ពុជាក្នុងអំឡុងពេលនោះ បន្ទាប់មកគឺសហរដ្ឋអាមេរិក វៀតណាម ថៃ និងជប៉ុន ហើយប្រទេសខ្លះកម្ពុជាអាចសម្រេចបានរហូតដល់ មានតុល្យភាពរវាងការនាំចេញនិងនាំចូលថែមទៀតផង ។
ដោយឡែកក្រុមប្រឹក្សាអភិវឌ្ឈន៍សេដ្ឋកិច្ចនៃកម្ពុជាវិញបានបង្ហាញថា ១ឆ្នាំនៃអណត្តិនៃរាជរដ្ឋាភិបាលទី៧ នេះកម្ពុជាអាចសម្រេចបានការទាក់ទាញវិនិយោគសរុបជាង ៧,៥ពាន់លានដុល្លារ ។ ជាពិសេស នៅក្នុងមួយខែសីហាកន្លង កម្ពុជាអាចទាក់ទាញ បានទទួលគម្រោងវិនិយោគសរុបដែលមានតម្លៃដល់ទៅ ១,២ ពាន់លានដុល្លារឯណោះ ដែលទំហំនេះគឺបានបង្កើតការងារធ្វើដល់ទៅ ៣៣.០០០ កន្លែង ពោលគឺមានការកើនឡើងខ្លាំងបើធៀបនឹងខែផ្សេងៗកន្លងមក ។
ក្រៅពីនោះ ការមកដល់របស់ភ្ញៀវទេសចរបរទេសក៏បានទទួលកំណើនគួរសមផងដែរ ដោយ ៧ខែដើមឆ្នាំ ២០២៤ កម្ពុជាអាចមានសមត្ថភាពស្រូបនិង ទាក់ទាញភ្ញៀវទេសចរបរទេសបានដល់ទៅជាង ៣,៧៤ លាននាក់ មានកំណើនកើនឡើង ដល់ទៅ ២៣,២ ភាគរយ។
ទាំងនេះគឺជាកត្តាមោទនៈភាពដ៏សម្បើមដែលកម្ពុជាអាចសម្រេចបាននៅក្នុងរយៈពេល ៧ ទៅ ៨ ខែកន្លងមកនេះ ហើយសង្ឃឹមថា នឹងកាន់តែប្រសើរថែមទៀតនៅរយៈពេលប៉ុន្មានខែដែលនៅសល់ ប៉ុន្តែទោះបីជាយ៉ាងណាក៏ដោយ អត្រាឥណទានមិនដំណើរការជាពិសេសគឺរបស់ស្ថាប័នមីក្រូហិរញ្ញវត្ថុបានបន្តកើនឡើងដល់ជាង ៨ ភាគរយ ស្របពេលដែលវិស័យសំណង់និងអចលនទ្រព្យនៅតែបន្តនៅក្នុងស្ថានភាពទុនខ្សោយនៅឡើយនោះ ។
កត្តាទាំងនេះហើយដែលប្រជាពលរដ្ឋដែលប្រកបរបររកស៊ីតូចតាមនៅតាមទីផ្សារនៅក្នុងស្រុក តាមចិញ្ចើមផ្លូវ តាមទីសាធារណៈ អ្នករកស៊ីដឹកជញ្ជូន មួយចំនួនបានត្អូញត្អែរអំពីការធ្លាក់ចំណូល និង លំបាកនៅក្នុងជីវភាពរស់នៅប្រចាំថ្ងៃ ។ អ្នកលក់នៅតាមផ្សាររអ៊ូរទាំថា ស្ងាត់មិនសូវមានអ្នកទិញ អ្នកដឹកជញ្ជូន ថា អ្នកប្រកបរបរនេះច្រើនពេក ភ្ញៀវឫអតិថិជនតិចជាហេតុពួកគេនៅក្នុងស្ថានភាពដណ្តើមគ្នារស់។ នេះសំណាងហើយដែលប្រេងឥន្ធនៈនៅក្នុងមួយរយៈនេះហាក់មានលំនឹងបន្តិចឡើងឫចុះមិនខ្លាំង បើមិនដូច្នេះទេ ការរអ៊ូរទាំនឹងកាន់តែខ្លាំងថែមទៀត។
នៅក្នុងស្ថានភាពនេះរដ្ឋាភិបាលប្រហែលជានឹងត្រូវហត់នឿយខ្លាំង ដើម្បីដោះស្រាយកង្វល់អំពីបញ្ហានៃស្ថានភាពមីក្រូសេដ្ឋកិច្ចរបស់ប្រជាពលរដ្ឋ ។ ទោះបីមានកំណើនម៉ាក្រូសេដ្ឋកិច្ចជាវិជ្ជមានក៏ដោយ បើមីក្រូមិនប្រសើរក៏វាមិនមែនជាស្ថានភាពល្អដែរ ដូច្នេះ កិច្ចខិតខំប្រឹងប្រែងទាំងអស់គ្នាគឺចាំបាច់ត្រូវតែចាត់វិធាន ការដើម្បីធានាថាអត្ថប្រយោជន៍នៃកំណើននេះទៅដល់ប្រជាពលរដ្ឋទាំងអស់។
អត្រាកំណើន ពី ៥,៦ ទៅ ៦ ភាគរយកំពុងមានសន្ទុះ វាមានសារៈសំខាន់ណាស់ក្នុងការផ្តោតលើយុទ្ធសាស្ត្រសេដ្ឋកិច្ច ដែលធ្វើអោយប្រសើរឡើងដោយផ្ទាល់នូវជីវភាពរស់នៅរបស់ប្រជាជនកម្ពុជាទូទៅ ។
រដ្ឋាភិបាលគួរតែធ្វើការជាមួយនឹងវិស័យឯកជន ដាក់ចេញនូវគ្រប់យន្តការនានាដើម្បីធានាបានឲ្យកម្មករ និងនិយោជិតទទួលបាននូវប្រាក់ឈ្នួលកាន់តែសមរម្យ ឆ្លើយតបនឹងតម្រូវការសេដ្ឋកិច្ចគ្រួសារតាមរយៈ ការបង្កើតស្តង់ដារប្រាក់ឈ្នួលអប្បបរមាឲ្យកាន់តែទូលំទូលាយ និងការពង្រឹងសិទ្ធិការងារអាចធ្វើអោយប្រសើរឡើងនូវការពេញចិត្តការងារ និងកាត់បន្ថយការត្អូញត្អែរអំពីប្រាក់ចំណូលទាប។
ក្រៅពីនេះរដ្ឋាភិបាលនិងអ្នកដែលពាក់ព័ន្ធគួរបន្តលើកកម្ពស់កម្មវិធីសុខុមាលភាពសង្គមដែលផ្តល់ជំនួយហិរញ្ញវត្ថុឫបង្កលក្ខណៈងាយស្រួលដល់គ្រួសារដែលមានប្រាក់ចំណូលទាប មានលទ្ធភាពទទួលបានការសេវាថែទាំសុខភាពកាន់តែ មានតម្លៃសមរម្យ ប្រសិទ្ធភាព និងអត្ថប្រយោជន៍ផ្សេងៗដែល អាចជួយសម្រាលសម្ពាធសេដ្ឋកិច្ចភ្លាមៗដែលគ្រួសារជាច្រើនប្រឈមមុខឲ្យកាន់តែប្រសើរជាងមុន។
បន្តការវិនិយោគលើកម្មវិធីអប់រំ និងបណ្តុះបណ្តាលវិជ្ជាជីវៈ ដែលជាកម្មវិធីផ្តល់អំណាចដល់មនុស្សក្នុងការស្វែងរកការងារដែលមានប្រាក់ខែកាន់តែប្រសើរ និងកាត់បន្ថយវិសមភាពប្រាក់ចំណូល។ ពង្រឹងនិងបន្តលើកកម្ពស់កម្មវិធីគោលដៅដល់កម្មករដែលមានជំនាញ ជាពិសេសនៅតំបន់ជនបទ នឹងអនុញ្ញាតឱ្យពួកគេចូលរួមយ៉ាងសកម្មក្នុងវិស័យដែលមានតម្លៃខ្ពស់។
សូមបង្កើននិងបង្កើតបរិយាកាសលើកទឹកចិត្តដល់សហគ្រិនភាព និងអាជីវកម្មខ្នាតតូច តាមរយៈការសម្របសម្រួល ការផ្តល់កម្ចីខ្នាតតូច ជំនួយ និងការណែនាំដល់សហគ្រិនដែលមានសេចក្តីប្រាថ្នាអាចជួយធ្វើពិពិធកម្មសេដ្ឋកិច្ច និងបង្កើតឱកាសការងារកាន់តែច្រើន។ តាមរយៈការជំរុញវប្បធម៌នៃការច្នៃប្រឌិត និងការងារដោយខ្លួនឯង ប្រជាពលរដ្ឋអាចមានការគ្រប់គ្រងកាន់តែច្រើនលើសក្តានុពលប្រាក់ចំណូលរបស់ពួកគេ។
ហើយចំណុចសំខាន់ដែរនោះគឺលើកកម្ពស់ការសន្ទនាដោយបើកចំហររវាងរដ្ឋាភិបាល និយោជក និងប្រជាពលរដ្ឋ ។ ការស្តាប់កង្វល់របស់សាធារណជន និងបង្ហាញពីការប្តេជ្ញាចិត្តក្នុងការដោះស្រាយបញ្ហាទាំងនោះ អាចជួយកសាងទំនុកចិត្ត និងកាត់បន្ថយការត្អូញត្អែរ។
ផ្អែកតាមទឡ្ហីករណ៍ទាំងពីរករណីនេះ អ្វីៗនឹងប្រសើរ ហើយរាជរដ្ឋាភិបាលសង្ឃឹមថា នឹងខិតខំពង្រឹងអ្វីដែលកំពុងតែប្រសើរ ហើយ ត្រូវពង្រឹងអ្វីដែលជាបញ្ហាដោយដាក់ចេញនូវដំណោះស្រាយប្រកបដោយតម្លាភាពដើម្បីធ្វើយ៉ាងណាឲ្យសង្គមកម្ពុជាបិទបញ្ចប់ឆ្នាំនៅក្នុងស្ថានភាពរីករាយទាំងអស់គ្នា ។ តាមរយៈការផ្តោតលើយុទ្ធសាស្ត្រទាំងនេះ កម្ពុជាអាចធានាថា កំណើនសេដ្ឋកិច្ចប្រែក្លាយទៅជាភាពប្រសើរឡើងជាក់ស្តែងក្នុងជីវភាពរស់នៅរបស់ប្រជាជន ៕
ចែករំលែកព័តមាននេះ