ខេត្តកំពង់ឆ្នាំង ៖ មនុស្សប្រុសស្រី៣នាក់បានបាត់បង់ជីវិត និងអ្នកបើកបរម្នាក់ទៀតរងរបួស ក្នុងហេតុការណ៍គ្រោះថ្នាក់ចរាចរណ៍រវាងរថយន្ត៤គ្រឿងនិងម៉ូតូ១គ្រឿងបុករះបន្តកន្ទុយគ្នា ។ ហេតុការណ៍គ្រោះថ្នាក់ចរាចរណ៍ដ៏រន្ធត់ខាងលើនេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី៨ ខែកញ្ញា ឆ្នាំ ២០២៤…
ខេត្តកំពង់ឆ្នាំង ៖ មនុស្សប្រុសស្រី៣នាក់បានបាត់បង់ជីវិត និងអ្នកបើកបរម្នាក់ទៀតរងរបួស ក្នុងហេតុការណ៍គ្រោះថ្នាក់ចរាចរណ៍រវាងរថយន្ត៤គ្រឿងនិងម៉ូតូ១គ្រឿងបុករះបន្តកន្ទុយគ្នា ។
ហេតុការណ៍គ្រោះថ្នាក់ចរាចរណ៍ដ៏រន្ធត់ខាងលើនេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី៨ ខែកញ្ញា ឆ្នាំ ២០២៤ លើកំណត់ផ្លូវជាតិលេខ៥ ត្រង់ចំណុចបង្គោលគីឡូម៉ែត្រលេខ១២០-១២១ ស្ថិតនៅភូមិ អូររំចេក ឃុំ ចក ស្រុកបរិបូណ៌ ខេត្តកំពង់ឆ្នាំង។
តាមប្រភពពីសាក្សីដែលបានឃើញហេតុការណ៍បានឲ្យដឹងថា នៅម៉ោង៤និង៣០នាទីរសៀល មានរថយន្តក្រុងដឹកអ្នកដំណើរមួយគ្រឿង ពាក់ស្លាកលេខ ភ្នំពេញ ៣F-៤១៦៦ បានធ្វើដំណើរពីលិច មកកើត ក្នុងល្បឿនយ៉ាងលឿន ស្រាប់តែមកដល់ចំណុចកើតហេតុ បាន រ៉េចង្កូតទៅប៉ះ រថយន្តសាំយ៉ុង រួចបន្តទៅបុករថយន្តកូរ៉ូឡា ១គ្រឿងទៀត ដែលកំពុងចតនៅចិញ្ចើមផ្លូវ ប៉ើងធ្លាក់ទឹក បណ្ដាលឲ្យ បុរសម្នាក់ជិះលើរថយន្តកូរូឡានោះ រងរបួស ។
ប្រភពដដែលបានបន្តថា ដោយរថយន្តក្រុងនោះ មិនទាន់អស់ល្បឿនក៏បានបន្តទៅបុកម៉ូតូហុងដា សេ១២៥ ពណ៌ខ្មៅជិះគ្នា៣នាក់ពេញទំហឹង ហើយស្របពេលនោះក៏មានរថយន្ត ford ពណ៌ស ពាក់ស្លាកលេខកម្ពុជា TLY ៩១៦១ មួយគ្រឿងទៀតមកបុកពីក្រោយ រថយន្តក្រុងដឹកអ្នកដំណើរបណ្ដាលឲ្យខូចខាតរថយន្តផ្នែកខាងមុខយ៉ាងតំណំ។
ក្នុងហេតុការណ៍នោះស្ត្រី២នាក់ដែលជិះម៉ូតូបានស្លាប់បាត់បង់ជីវិតនៅនឹងកន្លែងកើតហេតុ រីឯក្មេងប្រុសម្នាក់ទៀតដែលរួមដំណេីរក៍បានបាត់បង់ជីវិតក្រោយពេលបញ្ជូនទៅសង្គ្រោះនៅមន្ទីរពេទ្យ។
ជនរងគ្រោះដែលបានបាត់បង់ជីវិតក្នុងហេតុការណ៍គ្រោះថ្នាក់ចរាចរណ៍ខាងលើនោះរួមមាន ១-ឈ្មោះ អ៊ុយ យ៉ាងគួយ ភេទស្រី អាយុ១៩ឆ្នាំ ២-ឈ្មោះ ឡាំ សុផាន ភេទស្រី អាយុ២៧ ឆ្នាំ និង៣- ឆឹង គឹមឃៀង អាយុ ៣ឆ្នាំ ត្រូវជាកូនប្រុសរបស់ឈ្មោះ ឡាំ សុផាន ។ ជនរងគ្រោះទាំង៣នាក់រស់នៅភូមិសន្លង់ ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង។
ក្រោយពេលកើតហេតុ អ្នកបើកបររថយន្តក្រុងដឹកអ្នកដំណើរបានរត់គេចខ្លួនបាត់ ចំណែកវត្ថុតាង ត្រូវបានសមត្ថកិច្ចនៃអធិការដ្ឋាននគរបាលស្រុកបរិបូណ៍នាំយកមករក្សាទុកនិងកសាងសំណុំរឿងបញ្ជូនទៅតាមនីតិវិធីច្បាប់ ៕
ចែករំលែកព័តមាននេះ