ខេត្តស្វាយរៀង ៖ ប្រជាកសិករ អ្នកដាំបន្លែត្រកួនរីករាយ ដោយត្រកួនរបស់ពួកគាត់មានទីផ្សារ ទោះបីបានតម្លៃថោកបន្តិចមែន ប្រជាកសិករគាត់ចង់បានផ្លូវ១ខ្សែធ្វើដំណើរទៅបេះត្រកួន និងដឹកត្រកួនពីស្រែយកទៅឲ្យម៉ូយ ។ ប្រជាកសិករលើកឡើងនេះបានកើតឡើង…
ខេត្តស្វាយរៀង ៖ ប្រជាកសិករ អ្នកដាំបន្លែត្រកួនរីករាយ ដោយត្រកួនរបស់ពួកគាត់មានទីផ្សារ ទោះបីបានតម្លៃថោកបន្តិចមែន ប្រជាកសិករគាត់ចង់បានផ្លូវ១ខ្សែធ្វើដំណើរទៅបេះត្រកួន និងដឹកត្រកួនពីស្រែយកទៅឲ្យម៉ូយ ។
ប្រជាកសិករលើកឡើងនេះបានកើតឡើង នៅវេលាម៉ោង៥និង១៥នាទីល្ងាច ថ្ងៃទី៨ កញ្ញា ២០២៤ នៅភូមិគយត្របែក សង្កាត់គយត្របែក ក្រុងស្វាយរៀង ។
បើតាមស្ត្រីម្នាក់ឈ្មោះ កើត ស៊ីណា អាយុ៤៥ឆ្នាំ នៅភូមិគយត្របែក បានប្រាប់អ្នកសារព័ត៌មានយើងថា គាត់បានដាំត្រកួនទឹកលើផ្ទៃដី២៥អា គឺអាចបេះវិលជុំបេះរាល់ថ្ងៃ ក្នុង១ថ្ងៃអាចបេះបាន៥០ទៅ១០០ ដុំ ហើយក្នុង១ដុំ លក់បាន៤០០រៀល គឺមានឈ្មួញកណ្តាលមកប្រមូលទិញរាល់ព្រឹក ។ ចំណែកស្ត្រីឈ្មោះភេ សារ៉ាត់ អាយុ៦៤ឆ្នាំ នៅភូមិគយត្របែក បានឲ្យដឹងថា គាត់ដាំត្រកួន លើផ្ទៃដី២០អា គឺបេះលក់រាល់ថ្ងៃដែរ ក្នុង១ថ្ងៃ លក់បាន៨០ដុំ បេះ២នាក់ប្តីប្រពន្ធ គឺត្រូវក្រោកឡើងម៉ោង២និង០០នាទីទៀបភ្លឺ ដោយម៉ូយមកប្រមូលបន្លែ នៅវេលាម៉ោង៤និង០០នាទីព្រឹកទៀបភ្លឺ ម៉ូយដឹកទៅលក់បន្តនៅរាជធានីភ្នំពេញ ។
ចំណែកស្ត្រីម្នាក់ទៀត ឈ្មោះ កែវ សុផា អាយុ៥៤ឆ្នាំ បាននិយាយថា គាត់ដាំត្រួនលើផ្ទៃដីកន្លះហិកតា ជាង១០ឆ្នាំមកហើយ ការដាំត្រួននៅក្នុងស្រែ នៅរដូវប្រាំងមានការលំបាកបន្តិច គឺខ្វះទឹកបូមដាក់ស្រែត្រកួន ក៏ប៉ុន្តែបើដាក់ជីមានទឹកគ្រប់គ្រាន់ ត្រកួនល្អលក់បានថ្លៃជាត្រកួនខែវស្សា ខែប្រាំ១ដុំតម្លៃ៦០០រៀល នៅរដូវវស្សាត្រកួន១ដុំ បានតែ៤០០រៀលប៉ុណ្ណោះ ងាយស្រួលលក់ឲ្យតែបេះឲ្យគេបានប៉ុន្មានដុំក៏គេយកដែរ ក៏ប៉ុន្តែយ៉ាប់កម្លាំង ដោយមិនបានដេកគ្រប់គ្រាន់ គឺម៉ោង២យប់ក្រោកឡើងទៅបេះត្រកួនរហូតម៉ោង៦និង០០នាទីព្រឹកទើបបេះបាន១០០ដុំ ហើយត្រូវទួលត្រកួនពីស្រែយកឲ្យម៉ូយនៅលើថ្នល់ក្នុងភូមិ ដោយខែវស្សា គ្មានផ្លូវអាចដឹកតាមម៉ូតូ ឬអូសកង់បានត្រូវទួល១០០ដុំ ត្រូវទូល២ជើងទើបអស់ ។
ប្រជាកសិករអ្នកដាំបន្លែត្រកួនបានសុំអំពាវសូមឲ្យអាជ្ញាធរ សង្កាត់ និងលោកអភិបាលក្រុងស្វាយរៀងមេត្តា សាងសង់ផ្លូវ១ខ្សែ ទទឹង៤ម៉ែត្របណ្តោយប្រវែង៧០០ម៉ែត្រ ដើម្បីឲ្យប្រជាកសិករអ្នកដាំបន្លែត្រកួនក៏ដូចអ្នកធ្វើស្រែមានផ្លូវដឹកបន្លែ និងដឹកស្រូវពេលប្រមូលផល ។
ទាក់ទិនករណីនេះដែរ ស្ត្រីម្នាក់ជាមេភូមិគយត្របែកបានប្រាប់កោះសន្តិភាពថា ប្រជាជនប្រកបមុខរបរដាំបន្លែនេះមាន៥៦គ្រួសារ លើផ្ទៃដីចំនួន៥៤ហិកតា ៥០អា បន្លែរួមមានត្រកួន កញ្ឆែត កណ្តៀង ត្រកៀត ភ្លៅកង្កែប ។ល។
លោកស្រីប្រធានភូមិបានបន្តថា បន្លែធម្មជាតិមានទីផ្សារល្អ ទោះបីមានតម្លៃថោកបន្តិច ក៏ប៉ុន្តែបើគិតជាប្រាក់លក់បានគ្រួសារមានគ្នា២នាក់ ដាំដីកន្លះហិកតាឡើងទៅ អាចរកចំណូលក្នុង១ថ្ងៃ៥ម៉ឺនរៀល ទៅ៧ម៉ឺនរៀល អ្នកដាំម្នាក់ឯង អាចរកចំណូលបានចាប់ពី២ម៉ឺនរៀល ទៅ៤ម៉ឺនរៀល ។ ក្នុងនោះដែរ ក៏មានគ្រួសារខ្លះ គ្មានម៉ូយត្រូវបេះយកទៅលក់ខ្លួនឯងនៅតាមផ្សារក្នុងក្រុងស្វាយរៀង ក៏អាចរកប្រាក់ចំណូលក្នុង១ថ្ងៃ២ម៉ឺនទៅ៤ម៉ឺនរៀលដែរ ។
នៅផ្សារត្រកួនកញ្ឆែត កណ្តៀងបោះដុំ ដប់ដុំ៦០០រៀល អ្នកលក់រាយ១ដុំ១ពាន់រៀល ។ ហើយបន្លែត្រកួនកញ្ឆែត កណ្តៀង ភ្លៅកង្កែប ឈ្មួញកណ្តាលមកប្រមូលទិញទៅលក់នៅក្រុងបាវិត និងនៅភ្នំពេញ ។ ហើយចំពោះប្រជាពលរដ្ឋសំណូមពរសុំផ្លូវ១ខ្សែនោះ ចាំលោកស្រីរាយការទៅលោកចៅសង្កាត់ លើកគម្រោងសំណើរសុំទៅលោកអភិបាលក្រុង ស្វាយរៀង សម្រាប់គម្រោងសាងសង់ផ្លូវឆ្នាំ២០២៤-២០២៥ ៕
ចែករំលែកព័តមាននេះ