រដ្ឋាភិបាលថ្មីបានដាក់គោលដៅជំរុញការនាំចេញអង្ករសម្រេចឲ្យបាន១លានតោន នៅឆ្នាំ២០២៥ ខាងមុខ ។ ប៉ុន្តែមកដល់ពេលនេះ កំណើននៃការនាំចេញអង្ករហាក់នៅឆ្ងាយពីអ្វីដែលបានកំណត់នៅឡើយ ។ ដើម្បីសម្រេចទៅតាមជំហានសហព័ន្ធស្រូវអង្ករកម្ពុជា បានកំណត់គោលដៅនៃការនាំអង្ករចេញឲ្យបាន ៨៥០.០០០…
រដ្ឋាភិបាលថ្មីបានដាក់គោលដៅជំរុញការនាំចេញអង្ករសម្រេចឲ្យបាន១លានតោន នៅឆ្នាំ២០២៥ ខាងមុខ ។ ប៉ុន្តែមកដល់ពេលនេះ កំណើននៃការនាំចេញអង្ករហាក់នៅឆ្ងាយពីអ្វីដែលបានកំណត់នៅឡើយ ។
ដើម្បីសម្រេចទៅតាមជំហានសហព័ន្ធស្រូវអង្ករកម្ពុជា បានកំណត់គោលដៅនៃការនាំអង្ករចេញឲ្យបាន ៨៥០.០០០ តោន នៅក្នុងឆ្នាំ២០២៤ ហើយ១លានតោន នៅក្នុងឆ្នាំ២០២៥ ប៉ុន្តែស្ថិតិនៃការនាំអង្ករចេញ៨ខែ នៃឆ្នាំ២០២៤ ដែលសហព័ន្ធនេះបានប្រកាសនោះ គឺទើបតែសម្រេចការនាំចេញបានត្រឹមតែ ៤១២.០២៣តោនប៉ុណ្ណោះ ។
សហព័ន្ធស្រូវអង្ករកម្ពុជាបានបញ្ជាក់ឱ្យដឹងថា ក្នុងរយៈពេល៨ខែ នៃឆ្នាំ២០២៤កម្ពុជាបាននាំចេញអង្ករបានចំនួនត្រឹមតែ៤១២.០២៣តោន ដោយទទួលបានចំណូល៣០៥លានដុល្លារ ។
ការនាំចេញអង្ករនៅរយៈពេល៨ខែ នៃឆ្នាំ២០២៤ គឺធ្វើឡើងតាមរយៈក្រុមហ៊ុននាំចេញអង្ករចំនួន៥៣ ក្រុមហ៊ុន ទៅកាន់គោលដៅចំនួន៦៥ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន២៦ បានបរិមាណអង្ករចំនួន២០៨.២០៧ តោន គិតជាទឹកប្រាក់ចំនួន ១៦១,៧០ លានដុល្លារ ទៅកាន់ប្រទេសចិន រួមទាំងហុងកុង និងម៉ាកាវ ចំនួន ៧៧.៧៩២ តោន គិតជាទឹកប្រាក់ចំនួន៤៨,៨៧ លានដុល្លារ ទៅកាន់ប្រទេសក្នុងអាស៊ាន រួមទាំងទីម័រខាងកើតចំនួន៧ប្រទេសបានបរិមាណចំនួន ៨៣.០៩៥ តោន គិតជាទឹកប្រាក់ចំនួន ៥៦,៨៩ លានដុល្លារ និងទៅកាន់គោលដៅ២៨ប្រទេសផ្សេងទៀត មានអាហ្វ្រិកមជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេនជាដើមបានចំនួន៤២.៩២៩ តោន គិតជាទឹកប្រាក់ចំនួន ៣៧,៦៩ លានដុល្លារ ។
ចំពោះប្រភេទអង្ករដែលកម្ពុជាបាននាំចេញ គឺអង្ករក្រអូបចំនួន៧០,៩២ភាគរយ ប្រភេទអង្ករសធម្មតា ២៣,៧៥ភាគរយ អង្ករចំហ៊ុយ ៣,១៣ភាគរយ អង្ករសរីរាង្គចំនួន ១,៨៩ភាគរយ និងអង្ករផ្សេងៗចំនួន ០,៣២% ។
ជាមួយគ្នានេះ ប្រទេសកម្ពុជាក៏បាននាំចេញស្រូវចំនួន៣.៣១៨.៥៩២ តោន ដែលគិតជាទឹកប្រាក់បានប៉ាន់ប្រមាណជាង៩១៨,១៦ លានដុល្លារ ដែលក្នុងនោះ៨៣,៧៧ភាគរយ បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញពីអាជ្ញាធរមានសមត្ថកិច្ច ។
ផ្អែកទឡ្ហីករណ៍នេះបានបង្ហាញថា គោលដៅនៃការនាំចេញអង្ករត្រឹមគោលដៅ ឆ្នាំ២០២៤ គឺហាក់ដូចជាពិបាកនឹងទៅដល់ដែរ ដោយសារតែនៅពេលនេះនៅសល់តែ៤ខែទៀតប៉ុណ្ណោះ ខណៈដែលបរិមាណនៃការនាំចេញអង្ករទើបតែសម្រេចបាន គោលដៅត្រឹមតែជាង ៥០ ភាគរយបន្តិចបន្តូចប៉ុណ្ណោះនៃគោលដៅដែលបានកំណត់។ តាមការកត់ត្រាកន្លងមកបរិមាណនៃការនាំចេញអង្កររបស់កម្ពុជាកើនឡើងពីមួយឆ្នាំទៅមួយឆ្នាំមែន ប៉ុន្តែបរិមាណនៃការនាំចេញនេះកើនឡើងមិនច្រើនឡើយ ។ កាលពីឆ្នាំ២០២៣កន្លងទៅ កម្ពុជាអាចនាំចេញអង្ករបានសរុប ៦៥៦.០០០ តោន។
ដូច្នេះនៅសល់៤ខែ នៃឆ្នាំ២០២៤នេះ តើកម្ពុជានឹងអាចសម្រេចបានគោលដៅនាំអង្ករចេញចំនួន៨៥០ ០០០ តោនដែរឬទេ0x017d7 ដោយសំឡឹងមើលពេលវេលា៤ខែទៀត ដែលនៅសល់ និងបរិមាណការនាំចេញ ៨ ខែ កន្លងមកត្រឹមជាង៤១០ ០០០ តោននោះ វាទាមទារកិច្ចប្រឹងប្រែងជាខ្លាំង ដើម្បីសម្រេចគោលដៅនេះ ។
ជាការពិត នៅពេលនេះ កម្ពុជាស្ថិតនៅក្នុងបញ្ជីជាមហាអំណាចអង្ករកំពូលទាំង១០ ហើយបើបូកបញ្ចូលទាំងបរិមាណស្រូវដែលបាននាំចេញគោលដៅ១លានតោន គឺស៊ីផុយ ។ ប៉ុន្តែទោះបីជាយ៉ាងណាក៏ដោយនេះ មិនមែនជាគោលដៅឡើយ ពីព្រោះថា រវាងការនាំចេញអង្ករ និងនាំចេញស្រូវ គឺការនាំចេញស្រូវដោយផ្ទាល់ គឺកម្ពុជាខាតបង់ច្រើន ។
ជាទូទៅការនាំចេញអង្ករ គឺទាមទារនូវខ្សែរសង្វាក់ការងារជាច្រើនការនាំចេញស្រូវ ។ ការនាំចេញស្រូវ គឺងាយបំផុត ប៉ុន្តែកម្ពុជាបានបាត់បង់តម្លៃបន្ថែមជាច្រើនពីព្រោះថា ស្រូវមុននឹងក្លាយជាអង្ករ គឺទាមទារ រោង ម៉ាស៊ីនកិនស្រូវ ដែលទាមទារកម្មករ ហើយម្យ៉ាងទៀតស្រូវដែលយកទៅកិនជាទូទៅ គឺទទួលបាន ទាំងអង្ករ ចុងអង្ករ កន្ទក់ និង អង្កាម ដែលផលិតផលទាំងនេះ គឺសុទ្ធសឹងតែជាប្រភពដែលអាចបង្កើនតម្លៃបន្ថែមពីផលិតកម្មអង្ករ ។
អង្ករវាជាមាសសទៅហើយ តែចុងអង្ករក៏ជាមាសដែរពីព្រោះវា និងកន្ទក់ គឺគេអាចយកទៅកែច្នៃធ្វើនេះធ្វើនោះបានច្រើនតាំងពីរអាហាររហូតប្រេងកន្ទក់ និងធ្វើចំណីសត្វជាដើម ហើយអង្កាមវិញ គឺអាចយកទៅធ្វើជី ទៅដុតផលិតអគ្គីសនី ជាដើម ។ នៅក្នុងខ្សែរសង្វាក់ផលិតកម្មនេះ គឺត្រូវការសុទ្ធតែការងារដល់ប្រជាពលរដ្ឋ ។
ផលិតកម្មកែច្នៃអង្ករពីស្រូវគឺជាមាស ប៉ុន្តែដើម្បីកែច្នៃបាននោះ គឺទាមទារការវិនិយោគទាមទារយន្តការ ដោះស្រាយ និងគាំទ្រជាច្រើនទៀតដែលសុទ្ធតែត្រូវចំណាយ ។ ប៉ុន្តែទោះបីជាយ៉ាងណាក៏ដោយវាមិនមែនងាយស្រួលឡើយ ។ គោលដៅជំរុញការនាំចេញអង្ករមួយលានតោននិយាយវាអាចស្រួល តែនៅពេលដែលធ្វើវាពិបាក ។ ដូច្នេះភាគីពាក់ព័ន្ធទាំងអស់ត្រូវធ្វើការរួមគ្នា ដើម្បីសម្រេចគោលដៅឆ្នាំ២០២៤ និង ២០២៥ ។
ទាំងរាជរដ្ឋាភិបាល និងវិស័យឯកជន ដោយរួមទាំងអ្នកដែលពាក់ព័ន្ធគួរតែអង្គុយពិនិត្យគោលនយោបាយនិងរៀបចំយន្តការ និងធ្វើការកែទម្រង់បើចាំបាច់ តាំងពីពេលនេះទៅដើម្បីសម្រេចសុបិនដែលមានគោលដៅរួមនាំចេញអង្ករអោយបាន១លានតោននៅឆ្នាំ២០២៥។ រួមគ្នាធ្វើ កម្ពុជានឹងអាចសម្រេចបាន៕
ចែករំលែកព័តមាននេះ