- ភ្នំពេញ
នៅពេលស្ម័គ្រចិត្ត ឬព្រមព្រៀងរៀបការជាប្តី ឬប្រពន្ធគ្នា កាលពីពេលមុនៗបុរស និងនារី ដែលចូលផ្ទឹម ច្រើនឆែកសុខភាព ជាពិសេសរកមេរោគអេដស៍ តែបរិបទសង្គមថ្មី បុរស…
នៅពេលស្ម័គ្រចិត្ត ឬព្រមព្រៀងរៀបការជាប្តី ឬប្រពន្ធគ្នា កាលពីពេលមុនៗបុរស និងនារី ដែលចូលផ្ទឹម ច្រើនឆែកសុខភាព ជាពិសេសរកមេរោគអេដស៍ តែបរិបទសង្គមថ្មី បុរស ឬនារី ឪពុកម្តាយ អាណាព្យាបាល កូនកម្លោះ ឬក្រមុំ ជាពិសេសដៃគូស្វាមីភរិយានៅពេលអនាគត គួររួមគ្នាឆែកប្រវត្តិរបាយការណ៍ឥណទានផ្ទាល់ខ្លួននីមួយៗជៀសវាងហានិភ័យ ក្រោយពេលរៀបអាពាហ៍ពិពាហ៍ជុំវិញបញ្ហាបំណុលច្រើនវ័ណ្ឌ.ក។
នេះមិនមែនជារឿងលេងសើចឡើយ ហើយនៅសម័យបច្ចុប្បន្ននេះ នៅក្នុងសង្គម គឺមានគូស្វាមីភរិយាថ្មោងថ្មីមួយចំនួន ក្រោយពេលដែលរៀបការរួចហើយក៏បានបែកបាក់គ្នា គឺដោយសារតែបញ្ហាបំណុលនេះតែម្តង ។
កម្មវិធីលុយនៃសារព័ត៌មានកោះសន្តិភាព មិនអាចរកស្ថិតិពិតប្រាកដអំពីបញ្ហានេះមកសង្កត់ធ្ងន់បាននៅ ឡើយ ប៉ុន្តែអ្នកជំនាញបានបញ្ជាក់អំពីរឿងនេះ ។
លោក កាំង តុងងី អ្នកនាំពាក្យសមាគមមីក្រូហិរញ្ញាវត្ថុកម្ពុជា បានអោយដឹងថា យើងឃើញបរិបទសង្គមបច្ចុប្បន្នគួបផ្សំទៅនឹងបញ្ហាជីវភាពមួយចំនួន ក្រោយពេលរៀបការ នៅពេលដែលដៃគូររៀបការមួយចំនួន មិនបានចែករំលែកព័ត៌មានទាក់ទង និងបំណុល និងប្រវត្តិឥណទាន គឺអាចបង្កើតជាបញ្ហា ក្រោយពេលរៀបការទើបបានជាមានការជជែក និងមានការលើកឡើងអោយយោបល់ពីការឆែកប្រវត្តិឥណទាននេះឡើង ។
លោក កាំង តុងងី បានឲ្យដឹងថា «ប្រសិនបើគូស្វាមីភរិយាមុននឹងរៀបការបង្ហាញនូវប្រវត្តិឥណទាន វាជារឿងល្អមួយដែរ វាបង្ហាញពីតម្លាភាពរវាងស្វាមី និងភរិយា ដើម្បីបានយល់ពីគ្នាកាន់តែច្បាស់ ជៀសវាងការកើតបញ្ហាល្អក់កករណាមួយនៅពេលអនាគត»។
លោក កាំង តុងងី បន្ថែមថា «យើងគ្រាន់តែយកប្រតិបត្តិការហ្នឹងមកអោយភាគីដៃគូររបស់យើងដែលជាអ្នកអនាគតស្វាមី និងភរិយាបានមើលឃើញ ។ យើងធ្លាប់ជំពាក់គេប៉ុន្មាន ឬក៏បច្ចុប្បន្នកំពុងជំពាក់គេប៉ុន្មាន អ្នកណាខ្លះអ៊ីចឹងទៅ» ។ លោក កាំង តុងងី បន្តថា ទាំងនេះជាយន្តការមួយ ដែលបង្ហាញពីភាពស្មោះត្រង់ និងតម្លាភាពរវាងអនាគតស្វាមី និងភរិយា ។
អ្នកវិភាគសេដ្ឋកិច្ចម្នាក់ បាននិយាយថា ក្នុងស្ថានភាពសេដ្ឋកិច្ចបច្ចុប្បន្ន និងតាមរបាការណ៍ធនាគារ យើងឃើញថា មនុស្សជាច្រើនជំពាក់លុយធនាគារ ។ ដូច្នេះដើម្បីរៀបការហើយ ជាប់បំណុលនោះវាក៏ជារឿងល្អមួយដែរ ដែលត្រូវយល់ដឹងអំពីស្ថានភាពសេដ្ឋកិច្ច របស់អនាគតប្តី ឬប្រពន្ធ ។ ចំណែកអ្នកមានបំណុលជាប់ខ្លួនក៏ត្រូវមានភាពក្លាហាននិយាយត្រង់ពីស្ថានភាពហិរញ្ញវត្ថុរបស់ខ្លួន ដើម្បីកុំអោយមានការអាក់អន់ចិត្តក្រោយការរៀបការរួច ។ វាក៏មិនមែនជាជម្រើសដ៏ល្អដែរ ដែលធ្វើការសម្រេចចិត្តយកប្តី ឬប្រពន្ធក្នុងស្ថានភាពបំណុល ។ មានគ្រួសារ គឺមានន័យថា មានបន្ទុកកាន់តែធំនៅលើជីវភាពរស់នៅ ។ ដូច្នេះ បើលុយចែកដាក់ខែ ស្ទើរដាច់ខ្យល់នោះ វាមិនមែនជម្រើសល្អឡើយដែលត្រូវយកប្តី ឬប្រពន្ធ ៕
ចែករំលែកព័តមាននេះ