ក្រោយពេលដែលឆ្លងកាត់របត់ និងព្យុះភ្លៀងនយោបាយជាបន្តបន្ទាប់ គណបក្សនយោបាយថ្មីមួយបានចាប់កំណើតឡើង នៅក្នុងតំបន់ដែលមានឈ្មោះស្រដៀងគ្នានឹងគណបក្សប្រជាជនកម្ពុជានៅក្នុងប្រទេសកម្ពុជា ។ គណបក្សប្រជាជនថ្មីដែលបានចាប់កំណើតឡើងនេះត្រូវបានគេដឹងថា គឺជាគណបក្សប្រជាជនក្នុងប្រទេសថៃ (the People’s Party)ដែលចាប់កំណើតឡើង…
ក្រោយពេលដែលឆ្លងកាត់របត់ និងព្យុះភ្លៀងនយោបាយជាបន្តបន្ទាប់ គណបក្សនយោបាយថ្មីមួយបានចាប់កំណើតឡើង នៅក្នុងតំបន់ដែលមានឈ្មោះស្រដៀងគ្នានឹងគណបក្សប្រជាជនកម្ពុជានៅក្នុងប្រទេសកម្ពុជា ។
គណបក្សប្រជាជនថ្មីដែលបានចាប់កំណើតឡើងនេះត្រូវបានគេដឹងថា គឺជាគណបក្សប្រជាជនក្នុងប្រទេសថៃ (the People’s Party)ដែលចាប់កំណើតឡើង នៅថ្ងៃទី០៩ ខែ សីហា ឆ្នាំ២០២៤ ដោយភាគច្រើននៃសមាសភាពស្ថាបនិកគណបក្សនេះ គឺមកពីគណបក្សឆ្ពោះទៅមុខដែលត្រូវបានរំលាយចោលដោយតុលាការធម្មនុញ្ញ នៅក្នុងប្រទេសនេះ កាលពីថ្ងៃទី០៧ ខែសីហា ឆ្នាំ២០២៤ថ្មីៗនេះ ។
គណបក្សថ្មីនេះ តាមពិតទៅមានកំណើតដំបូង នៅឆ្នាំ២០១២ នៅក្រោមឈ្មោះថា គណបក្ស Thinkakhao ហើយ ក្រោយមកក៏ប្រែឈ្មោះមកជាគណបក្ស Thinkakhao Chaovilai ហើយចុងក្រោយ នៅពេលដែលសមាជិកគណបក្សឆ្ពោះទៅមុខអស់ជម្រកដោយសារតែតុលាការធម្មនុញ្ញរំលាយចោល ភាគច្រើនក៏បានមកចូលរួមគណបក្សនេះរហូតដល់ប្រែឈ្មោះជាគណបក្សប្រជាជននេះឡើង ។
អ្នកវិភាគមួយចំនួនបានលើកឡើងថា គណបក្សនេះអាចជាគណបក្សរណប ឫគណបក្សទ្រនាប់មួយរបស់ក្រុមយុវជនដែលបានគិតទុកជាមុនសម្រាប់ផែនការផ្លូវក្រោយនៅពេលដែលគោលដៅនយោបាយរបស់ពួកគេជួបបញ្ហា ។
គណបក្សប្រជាជននៅប្រទេសថៃនេះ ត្រូវបានគេស្គាល់ថា មានជំហររីកចម្រើន និងកំណែទម្រង់ ។ វាជាគណបក្សសម្រាប់កំណែទម្រង់លទ្ធិប្រជាធិបតេយ្យវិមជ្ឈការនៃអំណាចការការពារសិទ្ធិមនុស្ស និងកាត់បន្ថយឥទ្ធិពលរបស់យោធា និងរាជាធិបតេយ្យនៅក្នុងនយោបាយនៅសង្គមថៃ ។
សមាភាពអ្នកដឹកនាំរបស់គណបក្សនេះ គឺដឹកនាំដោយអ្នកនយោបាយវ័យក្មេងដែលមានគំនិតកែទម្រង់ដែលបានកសាងមនៈសិកានយោបាយដែលប្រឈមមុខនឹងរចនាសម្ព័ន្ធអំណាចជាប្រពៃណីនៅក្នុងប្រទេសថៃ ។ ពួកគេតំណាងឱ្យរលកថ្មី នៃការដឹកនាំនយោបាយដែលផ្តោតលើការផ្លាស់ប្តូរតាមប្រជាធិបតេយ្យ និងយុត្តិធម៌សង្គម ។
ស្ថានភាពគណបក្សប្រជាជន នៅក្នុងប្រទេសថៃ នៅពេលបច្ចុប្បន្ននេះ គឺដាច់ខាតមិនដូចស្ថានភាពគណបក្សប្រជាជនកម្ពុជានៅក្នុងប្រទេសកម្ពុជាឡើយ ។ គណបក្សប្រជាជននៅថៃ គឺជាផ្នែកមួយនៃគណបក្សប្រឆាំង នៅក្នុងទិដ្ឋភាពនយោបាយរបស់ប្រទេសថៃ ។ វាជាសំឡេងដ៏សំខាន់មួយសម្រាប់កំណែទម្រង់លទ្ធិប្រជាធិបតេយ្យ និងទទួលបានការគាំទ្រយ៉ាងខ្លាំងពីយុវជនជំនាន់ក្រោយ និងអ្នកបោះឆ្នោតនៅតាមទីក្រុង ដែលមាននិន្នាការ និងគោលដៅច្បាស់លាស់អត់ងាករេ ទោះជាប្រឈមមុខនឹងសម្ពាធក៏ដូចជា វិធានការច្បាប់ ម្តងហើយម្តងទៀតក៏ដោយ ។ ក្នុងនាមជាគណបក្សដែលបន្តនូវឆន្ទៈនយោបាយរបស់គណបក្សឆ្ពោះទៅមុខគណបក្សប្រជាជននៅថៃ នៅតែសម្រេចបន្តនូវឆន្ទះនយោបាយ ដែលត្រូវបានសម្គាល់ដោយឧត្តមគតិកំណែទម្រង់ និងវឌ្ឍនភាព ។
មូលហេតុ ដែលអាចសន្និដ្ឋានបែបនេះ គឺផ្អែកទៅតាមសាវតារបស់គណបក្សនេះ ដែលពីមុនមានឈ្មោះថា គណបក្ស Thinkakhao ដែលបានបង្កើតឡើងក្នុងឆ្នាំ២០១២ ។ ការចាប់បដិសន្ធិថ្មីនេះ តំណាងឱ្យការវិវត្តន៍ទីបីនៃគណបក្សអនាគតឆ្ពោះទៅមុខដែលត្រូវបានរំលាយ នៅក្នុងខែកុម្ភៈ ឆ្នាំ២០២០ ។ គណបក្សប្រជាជននេះត្រូវបានកំណត់ថា នឹងដើរតួនាទីយ៉ាងសំខាន់ក្នុងការរៀបចំនយោបាយថៃនាពេលខាងមុខ ។ ជាច្រើនឆ្នាំ ជាពិសេសនៅក្នុងពន្លឺនៃការកើនឡើងនៃតម្រូវការសម្រាប់កំណែទម្រង់លទ្ធិប្រជាធិបតេយ្យ និងការបំបែកចេញពីរចនាសម្ព័ន្ធអំណាចប្រពៃណី ។
ចំណុចខ្លាំងរបស់គណបក្សប្រជាជនថៃ ដែលទើបបង្កើតឡើងនេះ វាគឺជាគណបក្សដែលទទួលនូវមរតកក្រមសីលធម៌នយោបាយរបស់អ្នកកាន់តំណែងមុន គឺគណបក្សអនាគតឆ្ពោះទៅមុខ (Future Forward Party) និងគណបក្សឆ្ពោះទៅមុខ ( Move Forward Party) ដែលត្រូវរំលាយចោល ។ គណបក្សទាំងនេះត្រូវបានកំណត់លក្ខណៈពិសេសដែលអាចច្បាមចិត្ត និងទស្សនៈរបស់អ្នកបោះឆ្នោតវ័យក្មេង និងឆន្ទៈរបស់ពួកគេក្នុងការប្រជែងនឹងការបង្កើតនយោបាយដ៏រឹងមាំរបស់ប្រទេសថៃ ប្រឈមនឹងឥទ្ធិពលរបស់យោធានៅក្នុងនយោបាយ និងរចនាសម្ព័ន្ធនៃអំណាចរបស់រាជាធិបតេយ្យតាមរបបអាមាត្រ ។
នេះគឺជាឆន្ទះនយោបាយដ៏មោះមុតរបស់ក្រុមអ្នកនយោបាយវ័យក្មេងរបស់ថៃ តែទោះជាយ៉ាងណាក៏ដោយ គណបក្សប្រជាជននៅក្នុងប្រទេសថៃនឹងប្រឈមមុខនឹងបញ្ហាប្រឈមជាច្រើន ។ ការរំលាយគណបក្សឆ្ពោះទៅមុខ ដោយតុលាការធម្មនុញ្ញក្រោមហេតុផលដែលមនុស្សជាច្រើនមើលឃើញថា មានហេតុផលនយោបាយបានឆ្លុះបញ្ចាំងពីឧបសគ្គដែលពិបាកបំផុត ខណៈដែលទិដ្ឋភាពនយោបាយរបស់ប្រទេស នៅតែទទួលឥទ្ធិពលយ៉ាងខ្លាំងពីយោធា ឥស្សរជនអភិរក្ស និងស្ថាប័នដ៏មានឥទ្ធិពលដែលធន់នឹងការផ្លាស់ប្តូរ ។
ការលេចចេញនៃគណបក្សប្រជាជននៅថៃនេះ អាចជាកត្តាជំរុញឲ្យមានការផ្លាស់ប្តូរនយោបាយកាន់តែទូលំទូលាយនៅក្នុងប្រទេសថៃ ។ តាមរយៈការបន្តនូវកេរដំណែលកំណែទម្រង់របស់អ្នកកាន់តំណែងមុន និងចូលទៅក្នុងការកើនឡើងនៃតម្រូវការសម្រាប់ការផ្លាស់ប្តូរក្នុងចំណោមប្រជាជនបក្សប្រជាជននេះ មានសក្តានុពលក្នុងការផ្លាស់ប្តូរគន្លងនៃនយោបាយថៃ ។
គណបក្សប្រជាជននៅថៃនេះតំណាងឱ្យជំពូកថ្មីមួយ ក្នុងការតស៊ូបន្តសម្រាប់កំណែទម្រង់លទ្ធិប្រជាធិបតេយ្យនៅក្នុងប្រទេសថៃ ហើយក៏អាចចាត់ទុកជាពន្លកនៃការកសាងអំណាចនិងតួនាទីរបស់យុវជននៅក្នុងតំបន់ ប៉ុន្តែកុំប្រៀបធៀបជាមួយនឹងគណបក្សប្រជាជនកម្ពុជានៅក្នុងប្រទេសកម្ពុជា ។
គណបក្សប្រជាជនកម្ពុជាជាគណបក្សដ៏ចំណាស់មួយនៅអាស៊ីអគ្នេយ៍ ហើយជាគណបក្សដែលកាន់អំណាច តាំងតែពីឆ្នាំ១៩៧៩ មកដល់ពេលនេះខណៈដែលគណបក្សប្រជាជននៅប្រទេសថៃ គឺក្មេងខ្ចីដែលមានមូលដ្ឋានទើបតែជាង១០ឆ្នាំប៉ុណ្ណោះ ហើយម្យ៉ាងទៀតគណបក្សទាំងពីរក៏មានលក្ខណៈ និងគោលដៅនយោបាយខុសគ្នា ។ គណបក្សទាំងពីរទោះបីជាមានឈ្មោះស្រដៀងគ្នា ប៉ុន្តែមានមូលដ្ឋានមនោគមវិជ្ជា តួនាទី និងយុទ្ធសាស្ត្រក្នុងប្រព័ន្ធនយោបាយរៀងៗខ្លួន ៕
ចែករំលែកព័តមាននេះ