ប្រទេស​ម៉ា​រ៉ុ​ក ៖ ការ​ប្រកួត​ព្រឹត្តិការណ៍​កីឡាបាល់ទាត់​ពិភពលោក​ឆ្នាំ ២០៣០ ឬ FIFA World Cup 2030 គឺ​នៅ​សល់​រយៈពេល​៥​ឆ្នាំ និង​១១​ខែ​ទៀត​។ ប៉ុន្តែ​បើក​ក្រឡេក​ទៅ​ប្រទេស​ម៉ា​រ៉ុ​ក​ឯណោះ​វិញ បាន​បញ្ចេញ​គម្រោង​កសាង​កីឡដ្ឋាន​បាល់ទាត់​ធំ​បំផុត​នៅ​លើ​ពិភពលោក សម្រាប់​ធ្វើ​ម្ចាស់ផ្ទះ​ការ​រកួត​ព្រឹត្តិការណ៍​នៅ​ឆ្នាំ ២០៣០ ជា​សាធារណៈ​។

Grand Stade Hassan II គឺជា​ឈ្មោះ​កីឡដ្ឋាន​បាល់ទាត់​ថ្មី​របស់​ម៉ា​រ៉ុ​ក ដែល​គ្រោង​នឹង​សាងសង់​ឡើង​ក្នុង​តំបន់​ប្រជុំជន​អែ​ល ម៉ា​ន់​សូ​រី​យ៉ា (El Mansouria) ភាគ​ខាងជើង​ទីក្រុង​កា​សាបាឡ​ង់​កា Casablanca ដែល​ជាទី​ក្រុង​ធំ​បំផុត​របស់​ប្រទេស​ម៉ា​រ៉ុ​ក​។

តាម​គម្រោង​កីឡដ្ឋាន​មួយ​នេះ អាច​ផ្ទុក​អ្នក​ទស្សនា​បាន​ដល់ ១១៥,០០០​នាក់ ដែល​ធ្វើ​ឱ្យ​វា​ក្លាយជា​កីឡដ្ឋាន​ធំ​ទី​២ លើ​ពិភពលោក បន្ទាប់​ពី​កីឡដ្ឋាន​កីឡា​គ្រី​ឃី​ត Narendra Modi នៅ​ក្នុង​ប្រទេស​ឥណ្ឌា ដែល​អាច​ផ្ទុក​អ្នក​ទស្សនា​បាន​រហូត​ដល់ ១៣២,០០០​នាក់ ខណៈ​ដែល​ពហុ​កីឡដ្ឋាន​ជាតិ​កូរ៉េ​ខាងជើង Rungrado 1st of May អាច​ផ្ទុក​អ្នក​ទស្សនា​បាន​ដល់ ១១៤,០០០​នាក់​។ កីឡដ្ឋាន​នេះ នឹង​ស្ថិត​លើ​ផ្ទៃដី​ទំហំ​១០០​ហិ​កតា និង​ចេញ​ម៉ូ​ដ​ដោយ​ក្រុមហ៊ុន​ស្ថាបត្យកម្ម Populous ដែល​ធ្លាប់​កសាង​កីឡដ្ឋាន​ល្បី​ៗ​លំដាប់​ពិភពលោក​ជា​ច្រើន រួម​ទាំង​កីឡដ្ឋាន​ជាតិ​ចក្រភព​អង់គ្លេស Wembley, កីឡាដ្ឋាន Tottenham Hotspur និង​កីឡដ្ឋាន Emirates របស់​ក្រុម Arsenal ផង​ដែរ​។

ដោយឡែក ការ​រចនា​ម៉ូ​ដ​កីឡដ្ឋាន​ថ្មី​នៅ​ប្រទេស​ម៉ា​រ៉ុ​ក Populous បាន​រំឭក​ពី​រចនាបថ «Moussem» ដែល​ជា​រចនាបថ​តង់​ប្រពៃណី​របស់​ម៉ា​រ៉ុ​ក​។ ហើយ​នៅ​ខាងក្នុង និង​ក្រៅ​កីឡដ្ឋាន ក៏​មាន​រៀបចំ​សួនច្បារ និង​សួន​រុក្ខសាស្ត្រ​យ៉ាង​ស្រស់​ស្អាត​ថែម​ទៀត​ផង​។ បើ​តាម​លោក Tarik Oualalou នាយក​ផ្នែក​រចនា និង​ជា​ដៃគូ​ស្ថាបនិក​នៅ​ក្រុមហ៊ុន​ស្ថាបត្យកម្ម Oualalou + Choi បាន​អះអាង​ថា ការ​រចនា​កីឡដ្ឋាន​នេះ​ឡើង ត្រូវ​បាន​ចាក់​ឫស​យ៉ាង​ជ្រៅ​ក្នុង​វប្បធម៌​ម៉ា​រ៉ុ​ក ជាមួយនឹង​ទំនៀមទម្លាប់ និង​ការ​បញ្ចេញមតិ​សហ​សម័យ ក៏​ដូច​ជា​នៅ​ក្នុង​រូបចម្លាក់​បុរាណ និង​បុព្វ​កាល ដែល​រួម​មាន ៖ Moussem សួនច្បារ សណ្ឋាន​ដី និង​ទេសភាព​នៃ​ប្រទេស​ម៉ា​រ៉ុ​ក​។ ទោះ​យ៉ាងណា ទំហំ​ទឹកប្រាក់​នៃ​ការ​សាងសង់​មិន​ទាន់​ត្រូវ​បាន​ប្រកាស​នៅឡើយ​ទេ​។

នៅ​ពេល​ដែល​សាងសង់​រួច កីឡដ្ឋាន Grand Stade Hassan II នឹង​ស្ថិត​នៅ​ក្នុង​ចំណោម​កីឡដ្ឋាន​ចំនួន​៥​ផ្សេង ដែល​ប្រទេស​ម៉ា​រ៉ុ​ក​មាន​ស្រាប់ ដើម្បី​ទទួល​រៀបចំ​ការ​ប្រកួត World Cup 2023 រួម​មាន ៖ កីឡាដ្ឋាន Adrar ផ្ទុក​អ្នក​ទស្សនា​បាន ៤៦,០០០​នាក់​, កីឡដ្ឋាន Fez Sports Complex ផ្ទុក​អ្នក​ទស្សនា​បាន ៥៥,៨០០​នាក់​, កីឡដ្ឋាន Marrakesh ផ្ទុក​អ្នក​ទស្សនា​បាន ៤៥,២៤០​នាក់​, កីឡដ្ឋាន Prince Moulay Abdellah ផ្ទុក​អ្នក​ទស្សនា​បាន ៦៨,៧០០​នាក់ និង​កីឡដ្ឋាន Ibn Batouta ផ្ទុក​អ្នក​ទស្សនា​បាន ៧៥,៦០០​នាក់​។ ដ្បិត​កីឡដ្ឋាន​ថ្មី Grand Stade Hassan II រំពឹង​ថា​អាច​នឹង​រៀបចំ​ការ​ប្រកួត​វគ្គ​ផ្តាច់ព្រ័ត្រ World Cup 2030​។

គូសបញ្ជាក់​ផង​ដែរ​ថា ព្រឹត្តិការណ៍ FIFA World Cup 2030 នឹង​ត្រូវ​រៀបចំ​ឡើង​នៅ​ក្នុង​ប្រទេស​ចំនួន ៦ នៅ​៣​ទ្វីប​ផ្សេង​គ្នា ដោយ​ក្នុង​នោះ ប្រទេស​អេ​ស្ប៉ា​ញ ព័រ​ទុ​យ​ហ្គា​ល់ និង​ម៉ា​រ៉ុ​ក ត្រូវ​បាន​ប្រកាស​ជា​សហ​ម្ចាស់ផ្ទះ ខណៈ​ការ​ប្រកួត​បើក​ឆាក​ចំនួន​៣​ប្រកួត នឹង​ធ្វើ​ឡើង​ក្នុង​ប្រទេស​អ៊ុយ​រ៉ា​ហ្គា​យ អា​ហ្ស​ង់​ទី​ន និង​ប៉ា​រ៉ា​ហ្គា​យ​។

មូលហេតុ​ដែក​ការ​ប្រកួត​បើក​ឆាក​ព្រឹត្តិការណ៍ World Cup 2030 នឹង​ត្រូវធ្វើ​ឡើង​ក្នុង​ប្រទេស​នៅ​ទ្វីបអាមេរិក​ខាងត្បូង ដើម្បី​ប្រារព្ធ​ខួប​១​សតវត្ស​នៃ​ការ​ប្រកួត World Cup ព្រោះ​នឹង​មាន​រយៈពេល​១០០​ឆ្នាំ ចាប់តាំងពី​ការ​ប្រកួត​លើក​ដំបូង​រៀបចំ​ឡើង​នៅ​ក្នុង​ទីក្រុង​ម៉ុ​ន​តេ​វី​ដេ​អូ (Montevideo) ប្រទេស​អ៊ុយ​រ៉ា​ហ្គា​យ កាលពី​ឆ្នាំ ១៩៣០៕ (​ប្រភព ៖ CNN)