ខេត្តរតនគិរី ៖ សកម្មភាពដែលគេកំពុងតែលួចធ្វើអាជីវកម្មជីកយករ៉ែរុករកត្បូងយ៉ាងអនាធិបតេយ្យជាច្រើនទីតាំង មិនទាន់ឃើញសមត្ថកិច្ចចុះបង្ក្រាបនៅឡើយទេ សង្ស័យលួចបើកភ្លើងខៀវឲ្យទេដឹង? ទីតាំងធ្វើអាជីវកម្មជីកយករ៉ែដោយខុសច្បាប់នោះ ក្រុមអ្នកយកព័ត៌មានយើងបានចុះទៅដល់នៅថ្ងៃទី១៩ខែសីហា ឆ្នាំ២០២៤ ក្នុងតំបន់ស្រុកបរកែវ ខេត្តរតនគិរី…
ខេត្តរតនគិរី ៖ សកម្មភាពដែលគេកំពុងតែលួចធ្វើអាជីវកម្មជីកយករ៉ែរុករកត្បូងយ៉ាងអនាធិបតេយ្យជាច្រើនទីតាំង មិនទាន់ឃើញសមត្ថកិច្ចចុះបង្ក្រាបនៅឡើយទេ សង្ស័យលួចបើកភ្លើងខៀវឲ្យទេដឹង?
ទីតាំងធ្វើអាជីវកម្មជីកយករ៉ែដោយខុសច្បាប់នោះ ក្រុមអ្នកយកព័ត៌មានយើងបានចុះទៅដល់នៅថ្ងៃទី១៩ខែសីហា ឆ្នាំ២០២៤ ក្នុងតំបន់ស្រុកបរកែវ ខេត្តរតនគិរី ។
ប្រភពពីមន្ត្រីថ្នាក់មូលដ្ឋានម្នាក់បានឲ្យដឹងថា មានក្រុមកុងសែត្បូងជាច្រើននាក់បានប្រកបរបរជីករ៉ែត្បូងធ្វើអាជីវកម្មបែបអនាធិបតេយ្យដោយប្រើប្រាស់កម្លាំងប្រជាពលរដ្ឋជាអ្នកចុះជីកកកាយដីយករ៉ែត្បូងពីក្នុងរណ្ដៅជ្រៅៗរាប់សិបម៉ែត្រឯណោះទាំងប្រថុយប្រថាន និងគ្រោះថ្នាក់ដល់អាយុជីវិតបំផុត ដើម្បីតែរកត្បូងលក់ឲ្យខ្លួន ។
ប្រភពបង្ហើបថា ថ្មីៗនេះ គេសង្កេតឃើញមានមនុស្សជាច្រើននាក់ កំពុងធ្វើសកម្មភាពនោះនៅក្នុងបរិវេណដីចម្ការកៅស៊ូ ឈ្មោះលោកប្រុស ស្ថិតនៅភូមិត្រុំ ឃុំឡាមិញ ស្រុកបរកែវ ខេត្តរតនគិរី ហើយមានកម្មករជាច្រើននាក់បានបោះតង់ រួចធ្វើសកម្មភាពជីករណ្ដៅដីរករ៉ែត្បូងយ៉ាងជ្រៅ ដោយសម្អាងថា ឈ្មោះប្រុសម្ចាស់ចម្ការនោះឲ្យជីករករ៉ែត្បូង ។ ហើយបើបានត្បូងត្រូវលក់ឲ្យគាត់ជាម្ចាស់ចម្ការ តែបើអត់បានទេគាត់ជាអ្នកចេញថ្លៃបាយទឹកឱ្យ។
ដោយឡែក នៅទីតាំងមួយកន្លែងទៀតស្ថិតនៅភូមិ១ ទីតាំងស្រុកបរកែវចាស់ឃុំឡាម៉ិញ ស្រុកបរកែវ ក្នុងចម្ការ កៅស៊ូដូចគ្នា ក៏មានកម្មកររាប់សិបនាក់ដែលកំពុងធ្វើសកម្មភាពជីករ៉ែត្បូងដែរ មើលទៅហាក់បីដូចមិនខ្វល់រឿងខុសច្បាប់សោះឡើយ ។
ដោយពួកគេសម្អាងថា មានថៅកែឈ្មោះផល និងឈ្មោះសី ដែលជាកុងសែដ៏មានឥទ្ធិពលចាំទិញត្បូង និងជាអ្នកជួយសម្រួលជាមួយសមត្ថកិច្ច និងអាជ្ញាធរមូលដ្ឋានរួចរាល់អស់ហើយ ។ ចំណែកទីតាំងមួយកន្លែងទៀតស្ថិតនៅភូមិកបត្រុំ ឃុំទីងចាក់ ស្រុកបរកែវ ក៏កំពុងធ្វើសកម្មភាពជីករ៉ែត្បូងយ៉ាងគគ្រឹកគគ្រេងដែរ គឺគេប្រើម៉ាស៊ីន៥ ទៅ៦គ្រឿងឯណោះ ជាមធ្យោបាយបូមទឹកបាញ់ដីលាងរ៉ែត្បូង(បាញ់ញ៉) ម៉ាស៊ីនប្រើប្រាស់នៅទីនោះអ្នកភូមិថា ជារបស់ប្អូនកុងកែធំម្នាក់នៅទីរួមខេត្តរតនគិរី ។
ជុំវិញការលើកឡើងដូចខាងលើនេះ លោក កង សារឿន អភិបាលស្រុកបរកែវ បានប្រាប់ក្រុមអ្នកយកព័ត៌មានដែលបានចុះដល់ទីតាំងផ្ទាល់តាមប្រព័ន្ធតេឡេក្រាម ដោយទទួលស្គាល់ថា សកម្មភាពជីករ៉ែត្បូងនៅទីតាំងខាងលើ គឺជាការលួចធ្វើដោយខុសច្បាប់ ។
ហើយលោកបានបញ្ជាក់ទៀតថា កន្លងមក នៅក្នុងអង្គប្រជុំគណៈបញ្ជាការឯកភាពស្រុក លោកតែងតែ លើកពីករណីនោះដែរ និងដាក់វិធានការយ៉ាងតឹងរឹងផងដែរ ឱ្យសមត្ថកិច្ចមូលដ្ឋានចុះពិនិត្យ និងអប់រំណែនាំកុំឲ្យប្រជាពលរដ្ឋប្រកបរបរជីកត្បូងបន្តទៀត ព្រោះគ្រោះថ្នាក់ណាស់ ។ ប៉ុន្ដែកាឆ្លៀតឱកាសលួចលាក់វានៅតែបន្ដមានដដែល ។
លោកសុង ហួរ ប្រធានមន្ទីររ៉ែ និងថាមពលខេត្តរតនគិរី ថ្ងៃទី១៩ ខែសីហា ឆ្នាំ២០២៤នេះ មិនអាចសុំការពន្យល់ ជុំវិញការធ្វើអាជីវកម្មជីករ៉ែត្បូងខុសច្បាប់នៅស្រុកបកែវនោះបាទទេ ព្រោះទូរស័ព្ទលោករោទ៍ហើយពុំមានអ្នកទទួល សង្ស័យស្គាល់ថា ជាអ្នកកាសែតទេដឹង បានជាមិនលើក…ហេ!ហេ! ។
ចែករំលែកព័តមាននេះ