ខេត្តស្វាយរៀង ៖ អាជីវករលក់ជីកសិកម្ម តាមដេប៉ូក្នុងសង្កាត់បាទី ត្អូញត្អែរ ថា មានឈ្មួញវៀតណាមដឹកជីកសិកម្មតាមម៉ូតូរ៉ឺម៉ក ដើរលក់តាមភូមិយ៉ាងអនាធិបតេយ្យ ធ្វើឲ្យប៉ះពាល់ដល់មុខរបរ អ្នកប្រកបមុខរបរលក់ជី…
ខេត្តស្វាយរៀង ៖ អាជីវករលក់ជីកសិកម្ម តាមដេប៉ូក្នុងសង្កាត់បាទី ត្អូញត្អែរ ថា មានឈ្មួញវៀតណាមដឹកជីកសិកម្មតាមម៉ូតូរ៉ឺម៉ក ដើរលក់តាមភូមិយ៉ាងអនាធិបតេយ្យ ធ្វើឲ្យប៉ះពាល់ដល់មុខរបរ អ្នកប្រកបមុខរបរលក់ជី តាមដេប៉ូ គ្មានទីផ្សារ ។
ករណីនេះបានកើតឡើងនៅថ្ងៃទី១៩ ខែសីហា ឆ្នាំ២០២៤ នៅខាងមុខវត្តដងទង់ ស្ថិតនៅភូមិច្រកឬស្សី សង្កាត់បាទីក្រុងបាវិត ។
បើតាមអាជីវករលក់ជីម្នាក់ បានប្រាប់កោះសន្តិភាព ថា នៅរដូវវស្សានេះ មានក្រុមឈ្មួញជនជាតិវៀតណាម បានដឹកជីកសិកម្មពីប្រទេសវៀតណាមឆ្លងដែនចូលមកក្រុងបាវិត ហើយដឹកលក់ផ្ទាល់ជាមួយប្រជាកសិករ តាមភូមិដោយសេរី ពុំឃើញមានមន្ត្រីសមត្ថកិច្ចជំនាញណា មកសួរនាំ ឬទប់ស្កាត់ទេ ជាពិសេសមិនដឹងថា ជីកសិកម្មដែលឈ្មួញវៀតណាម កំពុងដឹកលក់នេះ មានការត្រួតពិនិត្យ ពីមន្ត្រីជំនាញ ឬយ៉ាងណានោះទេ ? ។
អាជីវករដដែល បានបញ្ជាក់ថា ហើយករណីជនជាតិវៀតណាម ដឹកជី ដើរលក់ផ្ទាល់បែបនេះ ធ្វើឲ្យប៉ះពាល់មុខរបរ អាជីវកម្មលក់តាមដេប៉ូ យ៉ាងខ្លាំង ។
ទាក់ទិនករណីនេះដែរ សមត្ថកិច្ចម្នាក់សុំមិនបញ្ចេញឈ្មោះ បានប្រាប់អ្នកសារព័ត៌មានយើងថា ពិតជាមានឈ្មួញជនជាតិវៀតណាម ដឹកជីកសិកម្មដើរលក់ដូរតាមភូមិ ពិតប្រាកដមែន ហើយមិនមែនមានតែសង្កាត់បាទី ក្រុងបាវិត នោះទេ គឺឈ្មួញវៀតណាម ដឹកជីកសិកម្ម(សញ្ញាក្បាលក្របី) ពីប្រទេសវៀតណាម ឆ្លងដែនចូលតាមច្រករបៀង មកលក់តាមភូមិ ឃុំ/សង្កាត់ ស្រុក/ក្រុង ដែលជាប់ព្រំដែន យ៉ាងអនាធិបតេយ្យ មិនដែលឃើញមានមន្ត្រីជំនាញណា មកសួរនាំ ឬបង្ក្រាបឡើយ ។
ក្រុមអាជីវករ លក់ជីកសិកម្ម តាមដេប៉ូ បានសំណូមពរដល់មន្ត្រីជំនាញ នៃមន្ទីរកសិកម្ម រុក្ខាប្រម៉ាញ់ និងនេសាទ ខេត្តស្វាយរៀង មេត្តាចុះពិនិត្យនិងធ្វើអន្តរាគមន៍ និងបង្ក្រាបពួកឈ្មួញជនជាតិវៀតណាម ដែលកំពុងដឹកជីលក់តាមភូមិនេះ ផងទាន! ។
ទាក់ទិនករណីនេះដែរ មិនអាចរកការបំភ្លឺពីលោកប្រធានមន្ទីរកសិកម្ម រក្ខាប្រម៉ាញ់ និងនេសាទខេត្តស្វាយរៀង បានទេ រហូតមកដល់ល្ងាចថ្ងៃទី១៩ ខែសីហានេះ ដោយទូរសព្ទមិនចូល ៕
ចែករំលែកព័តមាននេះ