ខេត្តកំពង់ឆ្នាំង ៖ ភូមិនិងវត្តមួយឈ្មោះ ក្រពើពុល ស្ថិតនៅក្នុងឃុំបង្កើតថ្មី ឈ្មោះឃុំក្រាំងដីមាស ដែលទើបបានបំបែកចេញពីឃុំស្វាយជ្រុំ ស្រុករលាប្អៀរ នៅក្នុងឆ្នាំ២០២២ កន្លងទៅនេះ…
ខេត្តកំពង់ឆ្នាំង ៖ ភូមិនិងវត្តមួយឈ្មោះ ក្រពើពុល ស្ថិតនៅក្នុងឃុំបង្កើតថ្មី ឈ្មោះឃុំក្រាំងដីមាស ដែលទើបបានបំបែកចេញពីឃុំស្វាយជ្រុំ ស្រុករលាប្អៀរ នៅក្នុងឆ្នាំ២០២២ កន្លងទៅនេះ ។ ភូមិនិងវត្តក្រពើពុល ថ្វីបើនៅមិនឆ្ងាយពីទីរួមខេត្តកំពង់ឆ្នាំងប៉ុន្មាន ប៉ុន្តែហាក់នៅឆ្ងាយដាច់ស្រយាល ដោយសារតែផ្លូវគមនាគមខែវស្សា គឺលិចទឹក ។ ការធ្វើចរាចរណ៍គឺតាមផ្លូវទឹកលើកលែងតែរដូវប្រាំង អាចធ្វើដំណើរតាមផ្លូវគោកបាន។
លោកស្រី ញ៉ែម សុភី ជំទប់ទី១ ឃុំក្រាំងដីមាស ស្រុករលាប្អៀរបានបញ្ជាក់ថា ភូមិក្រពើពុលមាន ប្រជាពលរដ្ឋរស់នៅ១១៣គ្រួសារ ។ នៅរដូវប្រាំងប្រជាពលរដ្ឋក្នុងភូមិស្ទើរតែទាំងអស់បានចាកចេញពីផ្ទះសំបែង ទៅធ្វើស្រែចំការ នៅភូមិសេះស្លាប់ ឃុំឆ្នុកទ្រូ ស្រុកបរិបូរណ៌ ធ្វើឱ្យក្នុងភូមិស្ងាត់ជ្រងុំ សូម្បីតែវត្តក្រពើពុល ក៍មានត្រឹមព្រះសង្ឃតែ២អង្គគង្គនៅ ប៉ុណ្ណោះ ដោយសារតែមិនសូវមានពុទ្ឋបរិស័ទ្ទចំណុះជើងវត្ត ។ ប៉ុន្តែសម្រាប់រដូវស្សាវិញ ពេលស្រែចំការពួកគាត់លិចទឹកអស់ ពួកគាត់បានត្រឡប់មកលំនៅដ្ឋានវិញទើបធ្វើឱ្យក្នុងភូមិមានមនុស្សអ៊ូអរ។
លោកតា សៀង នី អាយុ៧២ឆ្នាំ ជាប្រធានភូមិក្រពើពុល បានរៀបរាប់ឲ្យដឹងពីវត្តិនៃឈ្មោះក្រពើពុលថា តាមការនិទានតៗគ្នាពីព្រឹទ្ធាចារ្យ ក៏ដូចជាឪពុកម្ដាយ ជីដូនជីតារបស់លោកមកថា កាលដើមឡើយនៅ ទីទួលមួយឈ្មោះទួលគ ដែលមានដើមគរធំៗ ជាច្រើន ដុះជាប់មាត់ស្រះទឹកយ៉ាងធំ ដែលមានអំណោយផលដល់សត្វក្រពើ មកពងកូន នៅខែប្រាំង ។
នៅទីតាំងនោះមានក្រពើច្រើនណាស់ តែងតែ មកពងនៅរដូវប្រាំង ហើយពេលខែវស្សាទឹកលិចទីទួលនេះអស់ សត្វក្រពើក៏នាំគ្នាចាកចេញ នឹងត្រឡប់មកពងកូនវិញនៅខែប្រាំងវិញ ជារៀងរាល់ឆ្នាំង ។ កាលណោះ មានប្រជាពលរដ្ឋមួយគ្រួសារ បានប្រកបរបរដាក់លបយកត្រីលក់ចិញ្ចឹម
ជីវិត។
លោកតា ព្រុំ ជាមេគ្រួសារ តែងតែទៅដាក់លប នៅម្តុំជិតទួលដើមគ ។ ប៉ុន្តែ លប របស់គាត់មួយចំនួន ត្រូវបានសត្វក្រពើហែក ចាប់ត្រីស៊ី ស្ទើររៀងរាល់ថ្ងៃធ្វើឲ្យលោកតាក្តៅក្រហាយ ហើយក៏បានរៀបចំផែនការ សម្លាប់សត្វក្រពើដែលតែងតែ បំផ្លាញលបរបស់គាត់ ។ លោក តាព្រុំ បានបេះផ្លែស្លែង យកគ្រាប់ទៅបុកឲ្យម៉ត់ រួចវះដាក់ចូលទៅក្នុងពោះត្រីខ្មាន់ (ត្រីធំៗ)និងដេរពោះត្រីឱ្យជិត។ បន្ទាប់មកយកត្រីខ្មាន់ ទាំងនោះទៅដាក់ចូល លប ៤ទៅ៥លប រួចយកទៅដាក់នៅទីតាំងដែលសត្វក្រពើ តែងតែ ហែកលប ចាប់ស៊ីត្រី ស៊ី ។
ផែនការរបស់គាត់បានផលល្អ សត្វក្រពើបានពុលងាប់ ជាបណ្ដើរៗ រាងរាល់ថ្ងៃ ។ធ្វើឲ្យសត្វក្រពើចេះតែថយចុះពីមួយថ្ងៃទៅពីមួយថ្ងៃ រហូតបាត់ក្រពើអស់។តាព្រុំ និង ក្រុមគ្រួសារអាចប្រកបមុខរបរដាក់លប បានយ៉ាងស្រួល។ចាប់តាំងពីនោះមក ទីតាំងមានសត្វក្រពើងាប់ បានក្លាយជាទីឈ្មោះក្រពើពុល ៗរហូតមក ។
លុះតំណរក្រោយៗមក មានប្រជាពលរដ្ឋមកតាំងទីលំនៅរស់នៅតំបន់នោះកាន់តែច្រើនឡើងៗ ទើបបានកើតជាភូមិមួយឈ្មោះភូមិក្រពើពុល ហើយតំណរមកទៀត ក៍កើតបានវត្តមួយទៀត ឈ្មោះវត្ត(សុវណ្ណឱរីយ្យ) ហៅវត្តក្រពើពុលដល់សព្វថ្ងៃ៕
ចែករំលែកព័តមាននេះ