ទីក្រុងកៀវ៖ ថ្មីៗនេះ ក្រសួងការពារជាតិអង់គ្លេសប្រកាសច្បាស់ៗថាអ៊ុយក្រែនអាចប្រើប្រាស់រថក្រោះ និងអាវុធដទៃទៀតដែលជាជំនួយរបស់អង់គ្លេសដើម្បីវាយប្រហារទៅលើកងទ័ពរុស្ស៊ីនៅលើទឹកដីរុស្ស៊ីបានដោយគ្មានបញ្ហាអ្វីទេ។ ប៉ុន្តែអង់គ្លេសសូមបញ្ជាក់បន្ថែមទៀតថាអង់គ្លេសនៅតែរក្សាទុកដដែលនូវការហាមប្រើប្រាស់គ្រាប់មីស៊ីលរយៈចម្ងាយឆ្ងាយដែលមានឈ្មោះថាស្តំ សេដូ (Storm Shadow)។
តាមរយៈការប្រកាសគោលជំហររបស់អង់គ្លេសលើកនេះអាចនិយាយបានថារថក្រោះក្ដី គ្រាប់មីស៊ីលសម្រាប់បាញ់រថក្រោះក្ដី និងគ្រឿងបរិក្ខារយោធាដទៃទៀតក្ដីឱ្យតែជាជំនួយរបស់អង់គ្លេសផ្ដល់ទៅឱ្យអ៊ុយក្រែនអាចប្រើប្រាស់ដោយសេរីសម្រាប់កងទ័ពអ៊ុយក្រែនកំពុងបើកប្រតិបត្តិការវាយប្រហារចូលទឹកដីរុស្ស៊ីនៅតំបន់ខឺស (Kursk)។ នេះជាផ្នែក១នៃយុទ្ធសាស្ត្រការពារខ្លួន។
ប្រភពពីរដ្ឋាភិបាលអង់គ្លេសដែលស្នើសុំមិនបញ្ចេញឈ្មោះបានបង្ហើបឱ្យដឹងថាតាមពិតទៅ, នៅលើសមរភូមិជាក់ស្ដែង កងទ័ពអ៊ុយក្រែនបានប្រើប្រាស់រថក្រោះអង់គ្លេសម៉ាកឆាលេនជើ ធូ (Challenger 2) របស់អង់គ្លេសវាយប្រហារចូលទឹកដីរុស្ស៊ីរយៈពេលជាង១អាទិត្យមកហើយ។ ប៉ុន្តែក្រសួងការពារជាតិអង់គ្លេសសូមមិនធ្វើអត្ថាធិប្បាយជុំវិញករណីដែលអ៊ុយក្រែនប្រើ ឬមិនប្រើរថក្រោះរបស់អង់គ្លេសនោះទេ។
គិតចាប់តាំងពីខែកុម្ភៈ ឆ្នាំ២០២២មក អង់គ្លេសបានសន្យាផ្ដល់ជំនួយយោធាគិតជាទឹកប្រាក់៩,៧៧លានដុល្លារសម្រាប់អ៊ុយក្រែន។ នេះបើយោងតាមបណ្ណាល័យរដ្ឋសភាអង់គ្លេសដែលជាអ្នកបោះពុម្ពផ្សាយតួលេខនេះ។ នៅក្នុងកញ្ចប់ជំនួយនោះក៏មានរថក្រោះខ្នាតធំរបស់អង់គ្លេស១៤គ្រឿងដែលផ្ដល់ទៅឱ្យអ៊ុយក្រែនកាលពីឆ្នាំ២០២៣ រួមជាមួយរថពាសដែក, គ្រាប់រំសេវ, ប្រព័ន្ធការពារដែនអាកាស, គ្រឿងសាស្ត្រាវុធអេឡិចត្រូនិច និងកាំភ្លើងធំ។
រយៈពេល២អាទិត្យចុងក្រោយនេះ អ៊ុយក្រែនបើកការវាយប្រហារទ័ពជើងគោកចូលទឹកដីរុស្ស៊ីតាមតំបន់ខឺស។ ចាប់តាំងពីក្រោយសង្គ្រាមលោកលើកទី២ នេះជាលើកទី១ដែលប្រទេសរុស្ស៊ីរងការវាយប្រហារទ្រង់ទ្រាយធំដល់ថ្នាក់នេះ។ មន្ត្រីរដ្ឋាភិបាលអ៊ុយក្រែនម្នាក់ប្រាប់ថាការវាយប្រហារលើកនេះដើម្បីបង្កើតតំបន់ទ្រនាប់ការពារប្រជាជនអ៊ុយក្រែនទល់នឹងការវាយប្រហារណាមួយពីសំណាក់កងទ័ពរុស្ស៊ី។
អតីតរដ្ឋមន្ត្រីការបរទេសអង់គ្លេស លោកដេវីដ កាំម៉្រុន (David Cameron) ថ្លែងកាលពីខែឧសភាថាអ៊ុយក្រែនត្រូវតែមានសិទ្ធិប្រើប្រាស់អាវុធជំនួយរបស់អង់គ្លេសដើម្បីវាយប្រហារចូលទឹកដីរុស្ស៊ី។ ប៉ុន្តែរដ្ឋាភិបាលអង់គ្លេសមិនដែលធ្វើអត្ថាធិប្បាយម្ដងណាទេពាក់ព័ន្ធនឹងករណីដែលអ៊ុយក្រែនប្រើប្រាស់អាវុធជំនួយរបស់អង់គ្លេសវាយប្រហារទៅលើទឹកដីរុស្ស៊ី។ ដូច្នេះ លើកនេះអាចចាត់ទុកជាលើកទី១ដែលអង់គ្លេសចេញសេចក្ដីប្រកាសជាចំហ និងជាផ្លូវការតែម្ដង៕
ចែករំលែកព័តមាននេះ