ខេត្តកំពង់ចាម ៖ ក្រុមហ៊ុនជាច្រើនបានចូលរួមប្រកួតប្រជែងដេញថ្លៃគម្រោងស្ថាបនាផ្លូវបេតុងអាមេប្រវែង៤៥០ម៉ែត្រ តម្លៃដាក់ឲ្យដេញថ្លៃជាង២៤៨លានរៀល ដោយធ្វើឡើងនៅសាលាឃុំតាអុងស្រុកចំការលើ នាព្រឹកថ្ងៃទី២១ មេសា ឆ្នាំ២០២៦។ ចំពោះសកម្មភាពនៃការដេញថ្លៃគឺបានដំណើរការទៅដោយភាពល្អប្រសើរ ប៉ុន្តែនៅនាទីចុងក្រោយខ្វះមួយនាទី…
ខេត្តកំពង់ចាម ៖ ក្រុមហ៊ុនជាច្រើនបានចូលរួមប្រកួតប្រជែងដេញថ្លៃគម្រោងស្ថាបនាផ្លូវបេតុងអាមេប្រវែង៤៥០ម៉ែត្រ តម្លៃដាក់ឲ្យដេញថ្លៃជាង២៤៨លានរៀល ដោយធ្វើឡើងនៅសាលាឃុំតាអុងស្រុកចំការលើ នាព្រឹកថ្ងៃទី២១ មេសា ឆ្នាំ២០២៦។
ចំពោះសកម្មភាពនៃការដេញថ្លៃគឺបានដំណើរការទៅដោយភាពល្អប្រសើរ ប៉ុន្តែនៅនាទីចុងក្រោយខ្វះមួយនាទី ស្រាប់តែមានការសម្រុកនាំគ្នាដាក់ប៊ីត ចូលក្នុងប្រអប់បង្កនូវភាពឥតសណ្ដាប់ធ្នាប់ ធ្វើឲ្យជ្រុះប្រអប់សំបុត្រត្រូវបានគណៈកម្មការសម្រេចឆាចោល។
លោកទេព សុវណ្ណរិទ្ធ មេឃុំតាអុងមានប្រសាសន៍ឲ្យដឹងថា: ជារៀងរាល់ឆ្នាំសាលាឃុំតែងតែខិតខំប្រឹងប្រែងប្រែក្លាយអភិវឌ្ឍន៍ផ្លូវដីទៅជាផ្លូវបេតុងនៅតាមភូមិដ្ឋានរបស់បងប្អូនប្រជាពលរដ្ឋ ដើម្បីបង្ករងាយស្រួលក្នុងការធ្វើដំណើរពីភូមិមួយទៅភូមិមួយ ។ តាមរយៈកញ្ចប់ថវិកា បានរៀបចំដាក់ដេញថ្លៃផ្លូវបេតុងអាមេមួយខ្សែឆ្លងកាត់ភូមិចំនួន៣ ក្នុងនោះមានភូមិទួលមាស ទួលប៉ែននិងអំពិលជួរក្នុងឃុំតាអុង ដោយគម្រោងនេះត្រូវបានដេញថ្លៃតភ្ជាប់ផ្លូវចាស់ដែលដេញពីឆ្នាំកន្លងទៅ។
លោកមេឃុំតាអុងមានប្រសាសន៍បន្តថា ដោយមើលឃើញផ្លូវនៅក្នុងឃុំនេះមានសកម្មភាពមមាញឹកទើបពិភាក្សាគ្នាដើម្បីបន្តស្ថាបនាផ្លូវបេតុងបន្ថែមទៀត។ជាមួយនោះបានរៀបចំដាក់ឲ្យដេញថ្លៃនៅសាលាឃុំនាព្រឹកថ្ងៃទី២១មេសា ចំពោះដំណើរការចាប់ផ្ដើមគឺមានរបៀបរៀបរយបានល្អនៅច្រកចូលមានកម្លាំងនគរបាលប៉ុស្តិ៍ ព្រមទាំងក្រុមបច្ចេកទេសឆែកមើលស្រោមសំបុត្រក្រុមហ៊ុននីមួយៗ ដែលបានចូលរួមដេញថ្លៃ។ហើយក្រុមហ៊ុនដែលមិនមានឈ្មោះដេញថ្លៃគឺមិនអនុញ្ញាតឲ្យចូលទៅក្នុងបរិវេណសាលាឃុំនោះទេ។
លោកថាដំណើរការដេញថ្លៃគឺមានការរៀបចំបានល្អ តែនៅខ្វះមួយនាទីចុងក្រោយគឺមានក្រុមហ៊ុនចំនួន៤ក្នុងនោះមាន: ១.ក្រុមហ៊ុនយ៉េន ស៊ីនួន ២.ក្រុមហ៊ុនយ៉េន ប៊ុនថេន ព្រមទាំងក្រុមហ៊ុន២ផ្សេងទៀត បានក្រោកចេញពីកៅអីអង្គុយនាំគ្នាសម្រុកទៅដាក់ប៊ីតចូលក្នុងប្រអប់សំបុត្រ ក្នុងនោះមានម្នាក់បានចាប់ទាញដំណាងក្រុមហ៊ុនជាស្ត្រីម្នាក់រាងមាឌធាត់ មិនឱ្យដាក់បីត ព្រមទាំងមានការប្រទាញប្រទងគ្នាជាហេតុធ្វើឲ្យធ្លាក់ឡាំងដាក់ប៊ីត។ដោយមើលឃើញការបាត់បង់សណ្ដាប់ធ្នាប់បែបនេះរូបលោកព្រមទាំងក្រុមគណៈកម្មការដេញថ្លៃបានសម្រេចឆាចោលតែម្ដង។
លោកមេឃុំបានបន្ថែមទៀតថាចំពោះគម្រោងផ្លូវបេតុងអាមេមួយខ្សែប្រវែង ៤៥០ម៉ែត្រ និងធ្វើការពិភាក្សាជាមួយក្រុមបច្ចេកទេសដើម្បីឡីលៃលកថាតើនឹងរៀបចំដេញថ្លៃម្ដងទៀត នៅពេលណាមួយសមរម្យ។មេឃុំលាន់មាត់ថាកន្លងមកពេលដេញថ្លៃនៅសាលាឃុំច្រើនឆ្នាំហើយមិនដែលជួបបាតុភាពបែបនេះឡើយ ៕
ចែករំលែកព័តមាននេះ