ចក្រភព​អង់គ្លេស ៖ ក្រុម​បិសាច​ក្រហម Manchester United ប្រកាស​ផ្លូវការ​អំពី​ការយ​កបាន​ខ្សែការពារ​ដ៏​រឹង​មាំ Matthijs de Ligt និង Noussair Mazraoui ពី​ក្រុម​យក្ស​អា​ល្លឺ​ម៉​ង់ Bayern Munich កាលពី​ថ្ងៃ​ទី​១៣ ខែសីហា ឆ្នាំ​២០២៤ កន្លង​ទៅ​។ ស្រប​ពេល​ដែល​កីឡាករ​ទាំង​ពីរ​សុទ្ធតែ​កូនក្រុម​ចាស់​របស់​លោក Erik ten Hag គ្រា​ដែល​គ្រូបង្វឹក​សញ្ជាតិ​ហូ​ឡង់​វ័យ​៥៤​ឆ្នាំ​រូប​នេះ នៅ​ដឹកនាំ​ក្រុម Ajax នៃ​លី​គ​កំពូល​ហូ​ឡង់ Eredivisie​។

យោង​តាម​ប្រភព​ពី​សារព័ត៌មាន BBC និង Sky Sports របស់​ចក្រភព​អង់គ្លេស​បាន​រាយការណ៍​ថា ការ​ផ្ទេរ​ខ្សែការពារ​កណ្តាល​សញ្ជាតិ​ហូ​ឡង់ Matthijs de Ligt មាន​តម្លៃ ៥០​លាន​អឺ​រ៉ូ ដោយ​ដំណាក់កាល​ដំបូង Man Utd ត្រូវ​បង់ ៤៥​លាន​អឺ​រ៉ូ​។ ខ្សែការពារ​ក្រុម​មច្ចុរាជ​ពណ៌​ទឹកក្រូច​ហូ​ឡង់​វ័យ​២៥​ឆ្នាំ​រូប​នេះ សម្រេច​ចុះហត្ថលេខា​លើ​កុងត្រា​រយៈពេល​៥​ឆ្នាំ នៅ​ទឹក Old Trafford នឹង​ត្រៀម​បង្ហាញខ្លួន​ប្រកួត​ដំបូង​ទល់​នឹង​ក្រុម Fulham នៅ​ថ្ងៃ​សុក្រ​ស​ប្តា​ហ៍​នេះ ដែល​ជា​ការ​ប្រកួត​បើក​រដូវ​កាល​ថ្មី​ក្រប​ខណ្ឌ​លី​គ​កំពូល​អង់គ្លេស Premier League​។

វត្តមាន De Ligt អតីត​ខ្សែការពារ​ក្រុម Ajax និង Juventus រូប​នេះ នឹង​មក​ពង្រឹង​តំបន់​ការពារ​កណ្តាល​របស់ Man Utd បន្ទាប់​ពី​ការ​ចាកចេញ​របស់​ខ្សែការពារ​បារាំង Raphael Varane ស្រប​ពេល​ដែល​កីឡាករ Leny Yoro ខ្សែការពារ​បារាំង​ចំណូល​ថ្មី​របស់ Man Utd រដូវ​កាល​នេះ ត្រូវ​អវត្តមាន​រហូត​ដល់​៣ ខែ​ដោយសារ​បញ្ហា​របួស​ជើង អំឡុង​ប្រកួត​មិត្តភាព​មុន​បើក​រដូវ​ទល់​នឹង Arsenal កាលពី​ពេល​ថ្មី​ៗ​នេះ​។

ដោយឡែក ការ​ផ្ទេរ​ខ្សែការពារ​ស្លាប​សញ្ជាតិ​ម៉ា​រ៉ុ​ក Noussair Mazraoui មាន​តម្លៃ ២០​លាន​អឺ​រ៉ូ ដោយ​ដំណាក់កាល​ដំបូង Man Utd ត្រូវ​បង់ ១៥​លាន​អឺ​រ៉ូ​។ ខ្សែការពារ​ជម្រើសជាតិ​ម៉ា​រ៉ុ​ក​វ័យ​២៦​ឆ្នាំ​រូប​នេះ សម្រេច​ចុះហត្ថលេខា​លើ​ក្រុង​ត្រា​រយៈពេល​៤​ឆ្នាំ ជាមួយនឹង​ជម្រើស​បន្ថែម​១​ឆ្នាំ​ទៀត​។ ដ្បិត​អតីត​ខ្សែការពារ​ក្រុម Ajax រូប​នេះ នឹង​ត្រូវ​រ៉ាប់រង​តំណែង​របស់​ខ្សែការពារ​ស្លាប​ស្តាំ Aaron Wan-Bissaka ដែល​ផ្លាស់​ទៅ​ចូលរួម​ជាមួយ​ក្រុម​ញញួរ​យក្ស West Ham កាលពី​ថ្ងៃ​ទី​១៣ សីហា កន្លង​ទៅ​។

គួរ​ឱ្យ​ដឹងផង​ដែរ​ថា ក្រប​ខណ្ឌ​លី​គ​កំពូល​អង់គ្លេស Premier League នឹង​បើក​រដូវ​កាល​ថ្មី ២០២៤-២៥ នៅ​ថ្ងៃ​ទី​១៦ ខែសីហា ឆ្នាំ​២០២៤ ហើយ​តាម​គ្រោងទុក​នឹង​បញ្ចប់​នៅ​ថ្ងៃ​ទី​២៥ ខែឧសភា ឆ្នាំ​២០២៥៕ (​ប្រភព ៖ BBC និង Sky Sports)