ប្រទេសបារាំង ៖ អបអរ ក្រុមបាល់ទាត់ជម្រើសជាតិបុរសអាយុក្រោម២៣ឆ្នាំរបស់ប្រទេសអេស្ប៉ាញ និងក្រុមបាល់ទាត់ជម្រើសជាតិនារីសហរដ្ឋអាមេរិក ដែលដណ្តើមបានមេដាយមាសពីព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ ២០២៤។ ក្រុម U23 អេស្ប៉ាញ…
ប្រទេសបារាំង ៖ អបអរ ក្រុមបាល់ទាត់ជម្រើសជាតិបុរសអាយុក្រោម២៣ឆ្នាំរបស់ប្រទេសអេស្ប៉ាញ និងក្រុមបាល់ទាត់ជម្រើសជាតិនារីសហរដ្ឋអាមេរិក ដែលដណ្តើមបានមេដាយមាសពីព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ ២០២៤។
ក្រុម U23 អេស្ប៉ាញ ក្រោមការដឹកនាំរបស់លោកគ្រូបង្វឹក Santi Denia បានឈ្នះនៅវគ្គផ្តាច់ព្រ័ត្រវិញ្ញាសាបុរសលើក្រុមម្ចាស់ផ្ទះ U23 បារាំង ក្រោមការដឹកនាំរបស់លោក Thierry Henry នៅក្នុងម៉ោងបន្ថែម១៥នាទី ២ដង លទ្ធផល ៥-៣ កាលពីថ្ងៃទី៩ ខែសីហា ឆ្នាំ២០២៤។ តាមរយៈជ័យជម្នះនេះ ជួយអេស្ប៉ាញឈ្នះមេដាយមាសកីឡាអូឡាំពិកទីក្រុងប៉ារីសឆ្នាំ ២០២៤ និងជាលើកទី២ បន្ទាប់ពីការឈ្នះនៅឯព្រឹត្តិការណ៍កីឡាអូឡាំពិករដូវក្តៅទីក្រុងបាសេឡូណាឆ្នាំ ១៩៩២ ដែលខ្លួនជាម្ចាស់ផ្ទះ។ ខណៈដែលបារាំងក៏ធ្លាប់ឈ្នះមេដាយមាស១លើក នៅកីឡាអូឡាំពិកទីក្រុងឡូសអាន់ជ័រលេស សហរដ្ឋអាមេរិកឆ្នាំ ១៩៨៤។
ក្រៅពីអេស្ប៉ាញ និងបារាំង ដណ្តើមបានមេដាយមាស និងប្រាក់រៀងខ្លួននៅឆ្នាំនេះ ក្រុម U23 ម៉ារ៉ុក ក៏ដណ្តើមបានមេដាយសំរឹទ្ធផងដែរ ក្រោយយកឈ្នះលើក្រុម U23 អេហ្ស៊ីប ដោយលទ្ធផលជាទីគាប់ចិត្តបំផុត ៦-០ កាលពីថ្ងៃទី៨ ខែសីហា ឆ្នាំ២០២៤។
ក្រឡេកទៅវិញ្ញាសានារីឯណោះវិញ ក្រុមជម្រើសជាតិនារីសហដ្ឋអាមេរិក ក្រោមការដឹកនាំរបស់លោកស្រី Emma Hayes បានយកឈ្នះក្រុមនារីប្រេស៊ីល ក្រោមការដឹករបស់លោក Arthur Elias នៅវគ្គផ្តាច់ព្រ័ត្រទាំងលំបាកដោយលទ្ធផល ១-០ កាលពីថ្ងៃទី១០ ខែសីហា ឆ្នាំ២០២៤ ដើម្បីក្លាយជាម្ចាស់មេដាយមាសកីឡាអូឡាំពិកទីក្រុងប៉ារីសឆ្នាំ ២០២៤។ រាប់ទាំងមេដាយមាសនៅឆ្នាំនេះ សហរដ្ឋអាមេរិក ឈ្នះមេដាយមាសសរុបចំនួន៥លើកហើយ នៅកីឡាអូឡាំពិក បន្ទាប់ពីឆ្នាំ ១៩៩៦ ដែលខ្លួនធ្វើជាម្ចាស់ផ្ទះ, ឆ្នាំ ២០០៤ នៅប្រទេសក្រិក ឆ្នាំ ២០០៨ នៅប្រទេសចិន និងឆ្នាំ ២០១២ នៅចក្រអង់គ្លេស ហើយកំពុងឈរជាក្រុមឈ្នះមេដាយមាសច្រើនជាងគេក្នុងប្រវត្តិសាស្ត្រ តាមពីក្រោយដោយប្រទេសអាល្លឺម៉ង់ កាណាដា និងន័រវែស ដែលឈ្នះមេដាយមាស១លើកដូចគ្នា។
ក្រៅពីសហរដ្ឋអាមេរិក និងប្រេស៊ីល ដណ្តើមបានមេដាយមាស និងប្រាក់រៀងខ្លួននៅឆ្នាំនេះ ក្រុមនារីអាល្លឺម៉ង់ ដណ្តើមបានមេដាយសំរឹទ្ធ ក្រោយយកឈ្នះក្រុមនារីអេស្ប៉ាញនៅក្នុងលទ្ធផល ១-០ កាលពីថ្ងៃទី៩ ខែសីហា ឆ្នាំ២០២៤។
គួរបញ្ជាក់ថា ព្រឹត្តិការណ៍កីឡាអូឡាំពិករដូវក្តៅចាប់បដិសនិ្ធដំបូងនៅឆ្នាំ ១៨៩៦ និងរៀបចំឡើងរៀងរាល់៤ឆ្នាំម្តង។ ការប្រកួតវិញ្ញាសាបាល់ទាត់បុរស លេចចេញរូបរាងដំបូងបង្អស់នៅឆ្នាំ ១៩០០ ពោលគឺមានរយៈពេល១២៤ឆ្នាំហើយ។ គិតមកទល់ពេលនេះ ប្រទេសហុងគ្រី និងចក្រភពអង់គ្លេសឈ្នះមេដាយមាសច្រើនជាងគេ ពោល៣សម័យកាលដូចគ្នា។ ចំណែកការប្រកួតវិញ្ញាសានារី ទើបតែលេចចេញរូបរាងនៅឆ្នាំ ១៩៩៦ ដែលមានរយៈពេលទើបតែ២៨ឆ្នាំប៉ុណ្ណោះ។ ហើយគិតមកទល់ពេលនេះ សហរដ្ឋអាមេរិក គឺជាក្រុមឈ្នះមេដាយច្រើនជាងគេ ពោលគឺ៥សម័យកាល៕
ចែករំលែកព័តមាននេះ