ខេត្តសៀមរាប ៖ តាមព័ត៌មានបឋមឱ្យដឹងថា គ្រោះថ្នាក់ចរាចរណ៍មួយកើតឡើងដោយសារអ្នកបើកបររថយន្តស្រវឹងស្រាជោក ក៏រេចង្កូតមកបុករះម៉ូតូចំនួន២គ្រឿង និងរថយន្ត១គ្រឿង បណ្ដាលឱ្យមនុស្សម្នាក់ស្លាប់ពេលបញ្ជូនដល់មន្ទីរពេទ្យបង្អែកខេត្តសៀមរាប រីឯអ្នករងរបួសធ្ងន់៣នាក់ទៀតកំពុងសង្គ្រោះ ។ ហេតុការណ៍ដ៏រន្ធត់នេះ…
ខេត្តសៀមរាប ៖ តាមព័ត៌មានបឋមឱ្យដឹងថា គ្រោះថ្នាក់ចរាចរណ៍មួយកើតឡើងដោយសារអ្នកបើកបររថយន្តស្រវឹងស្រាជោក ក៏រេចង្កូតមកបុករះម៉ូតូចំនួន២គ្រឿង និងរថយន្ត១គ្រឿង បណ្ដាលឱ្យមនុស្សម្នាក់ស្លាប់ពេលបញ្ជូនដល់មន្ទីរពេទ្យបង្អែកខេត្តសៀមរាប រីឯអ្នករងរបួសធ្ងន់៣នាក់ទៀតកំពុងសង្គ្រោះ ។
ហេតុការណ៍ដ៏រន្ធត់នេះ កើតឡើងពេលពួកគេកំពុងហូបចុកនៅតាមផ្លូវ(៦០ម៉ែត្រ)ផ្សាររាត្រីអង្គរឃ្យុងយូ កាលពីវេលាម៉ោង១៩និង២០នាទី យប់ថ្ងៃទី០៥ ខែសីហា ឆ្នាំ២០២៤ ស្ថិតនៅចំណុចផ្លូវវិបុលបញ្ញាសុខអាន ក្នុងភូមិធ្លកអណ្ដូង សង្គាត់ស្លក្រាម ក្រុងសៀមរាប ខេត្តសៀមរាប ។
បើតាមប្រភពពីសមត្ថកិច្ចនគរបាលជំនាញបានឱ្យដឹងថា ពិតជាមានហេតុការណ៍គ្រោះថ្នាក់ចរាចរណ៍ខាងលើនេះមែន ដោយសមត្ថកិច្ចបានធ្វើការឃាត់ខ្លួនជនបង្កបាន បញ្ជួនទៅកាន់ស្នងការដ្ឋាននគរបាលខេត្តសៀមរាបហើយ ។
ប្រភពបញ្ជាក់ទៀតថា ករណីគ្រោះថ្នាក់ចរាចរណ៍នេះ បង្កឡើងដោយរថយន្តម៉ាកFord Ranger XLT ពណ៌ខ្មៅ ពាក់ផ្លាកលេខSR.0755 (ចង្កូតស្តាំ) ដែលអ្នកបើកបរឈ្មោះលឹម សាយ ភេទប្រុស អាយុ៣៨ឆ្នាំ រស់នៅភូមិគោល ឃុំពពេល ស្រុកសូទ្រនិគម ខេត្តសៀមរាប (ទិសដៅពីលិចទៅកើត) ត្រូវបានសមត្ថកិច្ចចាប់ឃាត់ខ្លួនបញ្ជូនទៅកាន់ស្នងការដ្ឋាននគរបាលខេត្តទាំងយប់ ។
បច្ចុប្បន្ន ជនរងគ្រោះ កំពុងសម្រាកព្យាបាលនៅមន្ទីរពេទ្យឯកជនចំនួន២ ស្ថិតនៅតាមបណ្តោយផ្លូវជាតិលេខ៦ ក្នុងភូមិបន្ទាយចាស់ សង្កាត់ស្លក្រាម ក្រុង ខេត្តសៀមរាប ។ ចំណែកសាកសព ជនរងគ្រោះត្រូវបានកម្លាំងនគរបាលការិយាល័យជំនាញរៀបចំប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី។
ព័ត៌មានបន្ថែម កោះសន្តិភាពមានផ្សាយជូនបន្តទៀត ។
ចែករំលែកព័តមាននេះ