ខេត្តស្ទឹងត្រែង ៖ រសៀលថ្ងៃទី១៤ ខែកញ្ញា ឆ្នាំ២០២៥នេះ ឯកឧត្តម សរ សុពុត្រា អភិបាលនៃគណៈអភិបាលខេត្តស្ទឹងត្រែង បានអំពាវនាវឱ្យបងប្អូនអ្នកប្រកបរបរម៉ូតូឌុប…
ខេត្តស្ទឹងត្រែង ៖ រសៀលថ្ងៃទី១៤ ខែកញ្ញា ឆ្នាំ២០២៥នេះ ឯកឧត្តម សរ សុពុត្រា អភិបាលនៃគណៈអភិបាលខេត្តស្ទឹងត្រែង បានអំពាវនាវឱ្យបងប្អូនអ្នកប្រកបរបរម៉ូតូឌុប ម៉ូតូកង់បី និងភ្នាក់ងារអនាម័យទាំងអស់ ត្រូវបន្តគោរពច្បាប់ចរាចរណ៍យកចិត្តទុកដាក់ខ្ពស់លើសុវត្ថិភាព ក្នុងការបម្រើសាធារណៈជាចំបង និងរក្សាអនាម័យសាធារណៈឱ្យបានល្អប្រសើរ ដើម្បីបង្កើនសោភណភាពរបស់ទីក្រុងស្ទឹងត្រែងឱ្យកាន់តែល្អបន្ថែមទៀត ។ នេះបើតាមក្រសួងមហាផ្ទៃបានប្រកាសនាយប់ថ្ងៃទី១៤ ខែកញ្ញានេះ ។
ការអំពាវនាវនេះនាឱកាសដែល ឯកឧត្តម សរ សុពុត្រា អញ្ជើញសំណេះសំណាលជាមួយបងប្អូនរត់ម៉ូតូឌុប ម៉ូតូកង់បី និងភ្នាក់ងារអនាម័យក្រុងស្ទឹងត្រែង ក្នុងឱកាសបុណ្យកាន់បិណ្ឌ និងភ្ជុំបិណ្ឌប្រពៃណីជាតិខ្មែរ ។ ក្នុងកម្មវិធីនេះ ក៏មានវត្តមានពីថ្នាក់ដឹកនាំរដ្ឋបាលខេត្ត រួមមាន លោកអភិបាលរងខេត្ត នាយករដ្ឋបាលខេត្ត និងនាយករងផងដែរ ដែលបានចូលរួមជួយជ្រោមជ្រែង និងផ្តល់កម្លាំងចិត្តដល់បងប្អូនដែលមានតួនាទីសំខាន់ក្នុងសង្គមប្រចាំថ្ងៃ ។
ពិធីសំណេះសំណាលនេះ ក៏ជាឱកាសមួយក្នុងការជួយឱ្យរដ្ឋបាលខេត្ត និងបងប្អូនរត់ម៉ូតូឌុប ម៉ូតូកង់បី និងភ្នាក់ងារអនាម័យ បានជួបជុំគ្នា បង្កើនការយោគយល់ និងទំនាក់ទំនងល្អ ក្នុងការចូលរួមអភិវឌ្ឍន៍ទីក្រុងឱ្យមានសណ្តាប់ធ្នាប់ និងភាពរីកចម្រើនផងដែរ ។
ព្រមជាមួយគ្នានោះ ឯកឧត្តម អភិបាលខេត្ត ក៏បាននាំនូវការផ្តាំផ្ញើសួរសុខទុក្ខ និងសេចក្តីនឹករលឹក ពីសម្តេចធិបតី ហ៊ុន ម៉ាណែត នាយរដ្ឋមន្ត្រីនៃព្រះរាជាណាចក្រកម្ពុជា និងលោកជំទាវដល់បងប្អូន រត់ម៉ូតូឌុប ម៉ូតូកង់បី និងភ្នាក់ងារអនាម័យ ដែលបានចូលរួមនាពេលនេះ និងជូនពរឱ្យរកទទួលទានមានបានទាំងអស់គ្នា ៕
ចែករំលែកព័តមាននេះ