ទីក្រុងដាកា៖ ថ្ងៃនេះ ប្រធានាធិបតីបង់ក្លាដែសប្រកាសរំលាយរដ្ឋសភាដើម្បីបើកផ្លូវឱ្យបង្កើតរដ្ឋាភិបាលបណ្ដោះអាសន្ន និងត្រៀមរៀបចំការបោះឆ្នោតឡើងវិញ។ ខុទ្ទកាល័យរបស់ប្រធានាធិបតីមហាមេត សាហាប៊ូឌីន (Mohamed Shahabuddin) ប្រកាសថាលោកបានបញ្ជាឱ្យដោះលែងប្រធានគណបក្សប្រឆាំងគឺលោកបេហ្គំ ខាលីដា…
ទីក្រុងដាកា៖ ថ្ងៃនេះ ប្រធានាធិបតីបង់ក្លាដែសប្រកាសរំលាយរដ្ឋសភាដើម្បីបើកផ្លូវឱ្យបង្កើតរដ្ឋាភិបាលបណ្ដោះអាសន្ន និងត្រៀមរៀបចំការបោះឆ្នោតឡើងវិញ។ ខុទ្ទកាល័យរបស់ប្រធានាធិបតីមហាមេត សាហាប៊ូឌីន (Mohamed Shahabuddin) ប្រកាសថាលោកបានបញ្ជាឱ្យដោះលែងប្រធានគណបក្សប្រឆាំងគឺលោកបេហ្គំ ខាលីដា ហ្ស៊ីអា (Begum Khaleda Zia) ដែលជាអតីតនាយករដ្ឋមន្ត្រីបង់ក្លាដែស និងជាគូប្រជែងរបស់លោកស្រីហាស៊ីណាតាំងពីច្រើនទសវត្សមកហើយ។
កាលពីមុននេះ ក្រុមចលនានិស្សិតដែលហែបាតុកម្មនោះបានទាមទារឱ្យរំលាយរដ្ឋសភាចោល។ បើមិនដូច្នេះទេនឹងមានចលនាបាតុកម្មកាន់តែខ្លាំង។ អំពើហិង្សារយៈពេលប៉ុន្មានអាទិត្យចុងក្រោយនេះបានឆក់យកជីវិតមនុស្សប្រហែលបីរយនាក់។ ថ្ងៃនេះគេឃើញថាសភាពការណ៍រាងស្ងប់ស្ងាត់ជាងម្សិលមិញ។ នៅតាមដងវិថីនានាមិនសូវមានមនុស្សធ្វើដំណើរប៉ុន្មានទេ។ ចំណែកសាលារៀន និងហាងលក់ទំនិញភាគច្រើននៅតែបន្តបិទទ្វារ។
នៅពេលកម្លាំងនគរបាលអវត្តមានពីកន្លែងភ្លើងស្តុប គេឃើញថាពួកនិស្សិតចេញមកសម្រួលចរាចរណ៍នៅតាមផ្លូវកែងវិញម្ដង។ លោកមហាមេត នូ (Mohammad Nur) ជានិស្សិតមហាវិទ្យាល័យវ័យ២០ឆ្នាំប្រាប់ថាយើងមិនបានឃើញនគរបាលចរាចរណ៍ចេញមកបំពេញការងារទេតាំងពីល្ងាចម្សិលមិញ។ ដូច្នេះ យើងក៏សម្រេចចេញមកសម្រួលចរាចរណ៍ជំនួសពួកគេដើម្បីឱ្យមនុស្សអាចធ្វើដំណើរតាមសម្រួល។
រោងចក្រកាត់ដេរនៅតែបន្តបិទទ្វារដោយឥតកំណត់ពេលវេលារហូតដល់មានការជូនដំណឹងជាថ្មី។ នេះបើយោងតាមសេចក្ដីប្រកាសរបស់សមាគមរោងចក្រកាត់ដេរ។ រោងចក្រកាត់ដេរនៅបង់ក្លាដែសលក់សំលៀកបំពាក់ទៅឱ្យក្រុមហ៊ុនដែលមានម៉ាកយីហោល្បីៗនៅលើពិភពលោក ហើយរោងចក្រកាត់ដេរក៏ជាដង្ហើមសេដ្ឋកិច្ចដ៏សំខាន់របស់ប្រទេសមួយនេះផងដែរ។
ការសម្រេចចិត្តរបស់ប្រធានាធិបតិបង់ក្លាដែសក្នុងការរំលាយរដ្ឋសភានេះធ្វើឡើងបន្ទាប់ពីមានកិច្ចប្រជុំរវាងមេបញ្ជាការកំពូលៗរបស់កងទ័ព, បណ្ដាបក្សនយោបាយនានា, អ្នកតំណាងនិស្សិត និងអង្គការសង្គមស៊ីវិល។ នេះបើយោងតាមសេចក្ដីប្រកាសរបស់ប្រធានាធិបតី។ នៅពេលលោកស្រីហាស៊ីណាប្រកាសចុះចេញពីតំណែងកាលពីម្សិលមិញ និងឡើងជិះឧទ្ធម្ភាគចក្រពីរនាក់បងប្អូនរបស់លោកស្រីសំដៅទៅប្រទេសឥណ្ឌា វាជាការបិទបញ្ចប់របបដឹកនាំរបស់លោកស្រីរយៈពេល១៥ឆ្នាំចុងក្រោយនេះរួមជាមួយការដឹកនាំមួយអាណត្តិមុននោះ៥ឆ្នាំទៀត។ ដូច្នេះជារួម លោកស្រីកាន់អំណាចរយៈពេលម្ភៃឆ្នាំ៕
ចែករំលែកព័តមាននេះ