ប្រទេស​បារាំង ៖ កីឡាករ​ហែល​ទឹក​ជនជាតិ​អ៊ី​តា​លី Thomas Ceccon ម្ចាស់​មេដាយមាស​កីឡា​អូ​ឡាំ​ពិ​ក ​ទី​ក្រុងប៉ារីស ​ឆ្នាំ​២០២៤ វិញ្ញាសា​ហែល​ផ្ងារចម្ងាយ​១០០​ម៉ែត្រ​ ។ កាលពី​ពេល​ថ្មី​ៗ​នេះ បាន​បង្ករឿង​​ដ៏​ភ្ញាក់ផ្អើល​លើ​ប្រព័ន្ធ​ផ្សព្វផ្សាយ​នៅ​ជុំវិញ​ពិភពលោក ដោយ​រូបគេ​ត្រូវ​បាន​ថត​ជាប់​កំពុង​គេង​លុងលក់​លើ​ស្មៅ​ជិត​បង់​អង្គុយ​នៅ​ក្នុង​ឧទ្យាន​ភូមិ​អូ​ឡាំ​ពិ​ក ​ទី​ក្រុងប៉ារីស​ ។

បើ​តាម​ប្រភព​ពី​សារព័ត៌មាន TODAY.com របស់​សហរដ្ឋអាមេរិក នៅ​ថ្ងៃ​ទី​៦ ខែសីហា ឆ្នាំ​២០២៤ បាន​រាយការណ៍​ថា វី​ដេ​អូ​កីឡាករ Ceccon ដែល​កំពុង​គេង​លុងលក់​ស្កប់ស្កល់​ត្រូវ​បាន​ថត​ជាប់​កាលពី​រសៀល​ថ្ងៃ​សៅរ៍​ស​ប្តា​ហ៍​មុន ពោល​ប៉ុន្មាន​ថ្ងៃ​បន្ទាប់​ពី​រូបគេ​ខក​ឱកាស​ឡើង​ទៅ​វគ្គ​ផ្តាច់ព្រ័ត្រ​វិញ្ញាសា​ហែល​ផ្ងា​ចម្ងាយ​២០០​ម៉ែត្រ​ ។ វី​ដេ​អូ​ដ៏​ភ្ញាក់ផ្អើល​មួយ​នេះ ត្រូវ​បាន​បង្ហោះ​លើ​បណ្តាញ​សង្គម Instagram របស់​កីឡាករ​ហែល​ទឹក​អា​រ៉ា​ប៊ី​សា​អូឌីត Husein Alireza ជាមួយ​ចំណងជើង​ថា «​សម្រាក​ថ្ងៃនេះ ឈ្នះ​ថ្ងៃស្អែក​»​។

នៅ​ក្នុង​បទ​សម្ភាសន៍ កាលពី​ថ្ងៃ​ពុធ​ស​ប្តា​ហ៍​មុន​ជាមួយ​ទូរទស្សន៍​អ៊ី​តា​លី Rai ពោល​បន្ទាប់​ពី​ខក​ឱកាស​ទៅ​វគ្គ​ផ្តាច់ព្រ័ត្រ​វិញ្ញាសា​២០០​ម៉ែត្រ កីឡាករ Ceccon បាន​លើក​ឡើង​អំពី​បញ្ហា​មួយ​ចំនួន​កើត​មាននៅ​ក្នុងភូមិ​អូ​ឡាំ​ពិ​ក​ក្រុងប៉ារីស ដោយ​អត្ត​ព​លិ​ក​ជា​ច្រើន​ត្អូញត្អែរ​អំពី​កង្វះ​ម្ហូបអាហារ បញ្ហា​គ្រែ​គេង​ធ្វើ​ពី​ក្រដាសកាតុង និង​កង្វះ​ម៉ាស៊ីនត្រជាក់​ផង​ដែរ​។

នៅ​ពេល​ត្រូវ​បាន​សួរ​ថា តើ Ceccon ពេញចិត្ត​ការ​រៀបចំ​នៅ​ភូមិ​អូ​ឡាំ​ពិ​ក​ប៉ា​រី​ស​ទេ កីឡាករ​វ័យ​២៣​ឆ្នាំ​រូប​នេះ​បាន​ឆ្លើយ​ថា «​បាទ​! ជា​អកុសល​មនុស្ស​ជា​ច្រើន​កំពុង​ចាក​ចេញពី​ទីនោះ ដោយសារ​ញ៉ាំ​មិន​ឆ្ងាញ់ ហើយ​អាកាសធាតុ​ក្តៅ​គ្មាន​ម៉ាស៊ីនត្រជាក់​ ។ ទិដ្ឋភាព​ផ្សេង​គ្នា​គឺ​ដូច្នេះ​ឯង​។ ខ្ញុំ​មិន​ត្អូញត្អែរ​ទេ ព្រោះ​អ្នក​គ្រប់​គ្នា​សុទ្ធតែ​ជួប​រឿង​ដូច​គ្នា​។ ខ្ញុំ​គ្រាន់តែ​ប្រាប់​អ្នក​ដែល​មិនដឹង​ប៉ុណ្ណោះ​»​។

សហព័ន្ធ​កីឡាហែលទឹក​អ៊ី​តា​លី FIN មិន​បាន​ឆ្លើយ​តប​ភ្លាម​ៗ​ចំពោះ​សំណើសុំ​ការ​អត្ថាធិប្បាយ​របស់​សារព័ត៌មាន TODAY.com នោះ​ទេ ប៉ុន្តែ​បាន​ប្រាប់​ទីភ្នាក់ងារ​ព័ត៌មាន​អ៊ី​តា​លី Ansa ថា កីឡាករ Ceccon ដែល​គេង​នៅ​សួន​ភូមិ​អូ​ឡាំ​ពិ​ក​ប៉ា​រី​ស មិន​ពាក់ព័ន្ធ​នឹង​បញ្ហា​ដែល​កើត​មាន​ក្នុងភូមិ​អូ​ឡាំ​ពិ​ក​នោះ​ទេ ហើយ​វា​គ្រាន់តែ​ជា​ការ​គេង​មួយ​យប់​តែ​ប៉ុណ្ណោះ​។ ប្រភព​ពី Ansa ក៏​បាន​រាយការណ៍​ថា កីឡាករ​ហែល​ទឹក​ជនជាតិ​អ៊ី​តា​លី​ម្នាក់​ទៀត ដែល​មានឈ្មោះ​ថា Gregorio Paltrinieri បាន​និយាយ​ថា គេ​មិន​អាច​គេង​លក់​ស្រួល​នៅ​ក្នុង​បន្ទប់​ស្នាក់​នៅ​ភូមិ​អូ​ឡាំ​ពិ​ក​នោះ​ទេ ដោយសារ​តែ​ខ្វះ​ម៉ាស៊ីនត្រជាក់​។

អ្នកនាំពាក្យ​គណៈកម្មាធិការ​រៀបចំ​កីឡា​អូ​ឡាំ​បិ​ក​ទី​ក្រុងប៉ារីស​ឆ្នាំ ២០២៤ បាន​ប្រាប់​សារព័ត៌មាន TODAY.com តាម​រយៈ​អ៊ីមែល​ថា «​នៅ​លើ​បញ្ហា​ម៉ាស៊ីនត្រជាក់ យើង​បាន​ព្យាយាម​ស្វែងរក​តុល្យភាព​ក្នុង​ការ​រចនា​ឱ្យ​សម​នឹង​អូ​ឡាំ​ពិ​ករ​វាង​គោលដៅ​រយៈពេល​វែង ជាមួយ​អត្ថប្រយោជន៍​ពី​លក្ខ​ខណ្ឌ​កំ​ដៅ​ប្រកបដោយ​ផាសុកភាព​ត្រឹមត្រូវ​ពី​ការ​ប្រកួត​សម្រាប់​អត្ត​ព​លិ​ក​។

ជាក់ស្តែង វេជ្ជបណ្ឌិត Chris Winter ដែល​ជា​អ្នកឯកទេស​ខាង​ការ​ដំណេក និង​ការ​ប្រកួត​របស់​អត្ត​ព​លិ​កបាន​លើក​ឡើង​ថា ការ​គ្រប់គ្រង​កំ​ដៅ និង​កត្តា​ផ្សេង​ៗ​ទៀត គឺ​មាន​សារៈសំខាន់​មិន​គួរ​ឱ្យ​ជឿ​សម្រាប់​អត្ត​ព​លិ​ក​ប្រកួត​កីឡា​អូ​ឡាំ​ពិ​ក​»៕​​