ប្រទេសបារាំង ៖ក្រោយឈ្នះមេដាយមាសចំនួន២គ្រឿងពីព្រឹត្តិការណ៍កីឡាអូឡាំពិកទីក្រុងប៉ារីសឆ្នាំ ២០២៤ រួចមក កីឡាករកាយសម្ព័ន្ធដ៏ឆ្នើមរបស់ប្រទេសហ្វីលីពីន Carlos Yulo ត្រូវបានចារជាប្រវត្តិសាស្ត្រក្លាយជាអត្តពលិកប្រទេសអាស៊ីអាគ្នេយ៍តែម្នាក់គត់ ដែលឈ្នះមេដាយមាស២គ្រឿងពីការប្រកួតកីឡាអូឡាំពិកព្រឹត្តិការណ៍តែមួយ។ នេះបើតាមប្រភពពីគេហទំព័រ…
ប្រទេសបារាំង ៖ក្រោយឈ្នះមេដាយមាសចំនួន២គ្រឿងពីព្រឹត្តិការណ៍កីឡាអូឡាំពិកទីក្រុងប៉ារីសឆ្នាំ ២០២៤ រួចមក កីឡាករកាយសម្ព័ន្ធដ៏ឆ្នើមរបស់ប្រទេសហ្វីលីពីន Carlos Yulo ត្រូវបានចារជាប្រវត្តិសាស្ត្រក្លាយជាអត្តពលិកប្រទេសអាស៊ីអាគ្នេយ៍តែម្នាក់គត់ ដែលឈ្នះមេដាយមាស២គ្រឿងពីការប្រកួតកីឡាអូឡាំពិកព្រឹត្តិការណ៍តែមួយ។ នេះបើតាមប្រភពពីគេហទំព័រ Seasia goal បានចេញផ្សាយកាលពីថ្ងៃទី៥ ខែសីហា ឆ្នាំ២០២៤។
សម្រាប់ Carlos Yulo នេះគឺជាការឈ្នះមេដាយអូឡាំពិកលើកដំបូងបង្អស់របស់ខ្លួន ហើយកីឡាករវ័យ២៤ឆ្នាំរូបនេះ គឺជាអត្តពលិកហ្វីលីពីនទី២ហើយ ដែលដណ្តើមបាន មេដាយមាសកីឡាអូឡាំពិក បន្ទាប់ពីកីឡាការិនីលើកទម្ងន់ Hidilyn Diaz ដែលបានបង្កើតប្រវត្តិសាស្ត្រឈ្នះមេដាយមាសអូឡាំពិកដំបូងបង្អស់សម្រាប់ប្រទេសហ្វីលីពីន ដែលសម្រេចបានកាលពីកីឡាអូឡាំពិករដូវក្តៅទីក្រុងតូក្យូឆ្នាំ ២០២០។
ក្រៅពីលើកមុខមាត់ប្រទេសជាតិរបស់ខ្លួន និងតំបន់អាស៊ីអាគ្នេយ៍ទាំងមូល ក្រឡេកទៅមើលទីក្រុងម៉ានីល ប្រទេសហ្វីលីពីនឯណោះវិញ បើតាមប្រភពពីសារព័ត៌មានក្នុងស្រុក Rappler កាលពីថ្ងៃទី៥ ខែសីហា រាយការណ៍ថា ទីក្រុងម៉ានីលនឹងរៀបចំក្បួនដង្ហែដ៏ធំបំផុតមួយ និងការតុបតែងទីក្រុង ដើម្បីស្វាគមន៍ការធ្វើមាតុភូមិនិវត្តន៍របស់កីឡាករ Carlos Yulo ដែលជាវីរបុរសកីឡាថ្មី១រូបទៀតរបស់ប្រទេសហ្វីលីពីន ដែលចារប្រវត្តិសាស្ត្រឈ្នះមេដាយមាស២គ្រឿងពីកីឡាអូឡាំពិកក្រុងប៉ារីស។
លោក Honey Lacuna អភិបាលក្រុងម៉ានីលបានបញ្ជាក់នៅក្នុងសេចក្តីថ្លែងការណ៍មួយថា រដ្ឋាភិបាលទីក្រុងកំពុងរៀបចំផែនក្បួនដង្ហែវីរបុរសកីឡាជាតិសម្រាប់ Caloy Yulo។ ប៉ុន្តែទោះយ៉ាងក៏ដោយ កាលបរិច្ឆេទ និងផែនសម្រាប់ក្បួនដង្ហែ មិនទាន់ត្រូវបានបញ្ជាក់ជាផ្លូវការនៅឡើយទេ។
គួរបញ្ជាក់ថា ហ្វីលីពីន គឺជាប្រទេសអាស៊ីអាគ្នេយ៍ដំបូងគេបង្អស់ ដែលឈ្នះមេដាយពី កីឡាអូឡាំពិកទីក្រុងប៉ារីសឆ្នាំ ២០២៤ គិតត្រឹមបញ្ចប់ការប្រកួតកាលពីថ្ងៃទី៥ ខែសីហា ដែលជាមេដាយមាសរបស់កីឡាករ Caloy Yulo ដណ្តើមបានលើកីឡាកាយសម្ព័ន្ធវិញ្ញាសាលើកម្រាល (Floor Exercise) កាលពីថ្ងៃទី៣ ខែសីហា ឆ្នាំ២០២៤។ ចំណែក១គ្រឿងបន្ថែមទៀត ដណ្តើមបានលើវិញ្ញាសាសេះលោត (Vault) កាលពីថ្ងៃទី៤ ខែសីហា កន្លងទៅ។
កាលពីថ្ងៃទី១ ខែសីហា កន្លងទៅ ក្រុមហ៊ុនអចលនទ្រព្យហ្វីលីពីន Megaworld បានប្រកាសថា ខ្លួននឹងផ្តល់រង្វាន់ដល់អត្តពលិកអូឡាំពិកទីក្រុងប៉ារីសម្នាក់ៗ ដែលត្រឡប់មកវិញជាមួយនឹងមេដាយមាសនូវខុនដូ ដែលមានបន្ទប់គេង ២ ស្ថិតនៅក្នុងសង្កាត់ McKinley Hill ដែលមានតម្លៃ ៤១៤,០៤៦ដុល្លារអាមេរិក។ បន្ថែមពីលើខុនដូដែលរង់ចាំម្ចាស់មេដាយមាសហ្វីលីពីន រដ្ឋាភិបាលហ្វីលីពីននឹងផ្តល់ប្រាក់រង្វាន់ដល់ម្ចាស់មេដាយមាសចំនួន១៧២,៥១៩ដុល្លារអាមេរិក។ សភាតំណាងប្រទេសហ្វីលីពីនក៏បានសន្យាផ្តល់ប្រាក់រង្វាន់ចំនួន១០៣,៥១១ដុល្លារអាមេរិកផងដែរ។ នេះបើយោងទៅតាមការផ្សាយពីសារព័ត៌មានហ្វីលីពីន Philstar ។
ក្រៅពីនោះ កីឡាករ Yulo ក៏នឹងអាចទាញយកអត្ថប្រយោជន៍ពីការទទួលទានអាហារដោយឥតគិតថ្លៃពេញមួយជីវិតពីភោជនីយដ្ឋានក្នុងស្រុកជាច្រើន ហើយគ្រូពេទ្យឯកទេសខាងក្រពះពោះវៀនថែមទាំងបានផ្តល់ការពិគ្រោះ និងពិនិត្យដល់កីឡាកររូបនេះ ដោយឥតគិតថ្លៃទៀតផង។ ចំណែកសាកលវិទ្យាល័យ Mindanao ក៏ប្រកាសផ្តល់ក្រេឌីតសិក្សា ដោយឥតគិតថ្លៃដល់ម្ចាស់មេដាយមាសរូបនេះផងដែរ៕ (ប្រភព ៖ Rappler Seasia goal និង CNBC News)
ចែករំលែកព័តមាននេះ