សហរដ្ឋអាមេរិក ៖ យោងតាមប្រភពពីសារព័ត៌មានធំៗរបស់សហរដ្ឋអាមេរិក រួមទាំងទស្សនាវដ្តីពាណិជ្ជកម្ម Forbes និង BasketNews កាលពីថ្មីៗនេះ បានរាយការណ៍ថា សមាគមបាល់បោះជាតិអាមេរិក…
សហរដ្ឋអាមេរិក ៖ យោងតាមប្រភពពីសារព័ត៌មានធំៗរបស់សហរដ្ឋអាមេរិក រួមទាំងទស្សនាវដ្តីពាណិជ្ជកម្ម Forbes និង BasketNews កាលពីថ្មីៗនេះ បានរាយការណ៍ថា សមាគមបាល់បោះជាតិអាមេរិក NBA បានចំណាយប្រាក់ចំនួន១៥លានដុល្លារអាមេរិក ដើម្បីបញ្ជូនក្រុមបាល់បោះជម្រើសជាតិឈុតធំបុរស-នារី ទៅចូលរួមប្រកួតកីឡាអូឡាំពិកទីក្រុងប៉ារីសឆ្នាំ ២០២៤។ ដ្បិតការចំណាយត្រូវរ៉ាប់រងលើក្រុមទាំងពីរ ដែលមិនស្នាក់នៅក្នុងភូមិអូឡាំពិក។
ចាប់តាំងពីឆ្នាំ ១៩៩២ នៅពេលដែល NBA បានអនុញ្ញាតឱ្យអត្តពលិករបស់ខ្លួនចូលរួមប្រកួតកីឡាអូឡាំពិក ក្រុមសហរដ្ឋអាមេរិកបានជ្រើសរើសការស្នាក់នៅខាងក្រៅភូមិអូឡាំពិក។ ហើយនៅកីឡាអូឡាំពិកទីក្រុងប៉ារីសឆ្នាំនេះ ក៏មិនខុសពីការប្រកួតព្រឹត្តិការណ៍មុនៗផងដែរ។
យោងតាមការបញ្ជាក់ពីលោក Justin Birnbau មកពីទស្សនាវដ្ដី Forbes បានរាយការណ៍ថា ក្រុមអត្តពលិកបាល់បោះអាមេរិកបានជួលសណ្ឋាគារទាំងមូលនៅកណ្តាលទីក្រុងប៉ារីស ដែលមានបន្ទប់ប្រហែល៨០០បន្ទប់។ របាយការណ៍ដដែលនោះ បានកត់សម្គាល់ឃើញថា ក្រុមអត្តពលិកបាល់បោះអាមេរិកមានការធ្វើដំណើរដ៏ធំមួយទៅកាន់ព្រឹត្តិការណ៍ Paris 2024 ដែលរួមមានទាំងសមាជិកក្រុមគ្រួសាររបស់អត្តពលិក ក្រុមការងារបច្ចេកទេស នាយកប្រតិបត្តិ និងបុគ្គលិក NBA ផ្ទាល់ផងដែរ។ ទើបការចំណាយមានតម្លៃថ្លៃបែបនេះ។
ជាមួយគ្នានោះ ទស្សនាវដ្ដី Forbes បានធ្វើការប្រៀបធៀបពីចំនួនការចំណាយដាច់គ្នាស្រឡះ រវាងការបញ្ជូនក្រុមកីឡាគុនដាវអាមេរិក (Fencing) ចំនួន២០នាក់ ទៅចូលរួមកីឡាអូឡាំពិកទីក្រុងប៉ារីសឆ្នាំនេះ ដែលមានចំនួនចន្លោះពី ៣០ ទៅ ៤០ម៉ឺនដុល្លារអាមេរិក។ ទោះយ៉ាងណាក៏ដោយ ការចំណាយលើក្រុមបាល់បោះអាមេរិករួមបញ្ចូលគ្នា ពោលច្រើនជាងការចំណាយទៅលើសណ្ឋាគារដ៏ប្រណិតមួយទៅទៀត ដោយសារតែការចំណាយក៏រ៉ាប់រងលើផ្នែកសន្តិសុខ ជើងហោះហើរ ការដឹកជញ្ជូនអត្តពលិកទៅកន្លែងហ្វឹកហាត់ និងការប្រកួត បូកទាំងការដឹកជញ្ជូនសម្ភារៈក្រុមទៅទីក្រុងប៉ារីសផងដែរ។
ប្រភពពីសារព័ត៌មានធំៗ អាមេរិកមួយចំនួនក៏បានរាយការណ៍ថា ក្រៅពីការចំណាយលើការស្នាក់នៅហូបចុកដ៏ល្អ ការចំណាយលើផ្នែកសន្តិសុខក៏ជារឿងដ៏សំខាន់បំផុតមួយផងដែរ។ ដោយសារអត្តពលិកបាល់បោះអាមេរិក ជាពិសេសលើក្រុមបុរសតែម្តង ដែលភាគច្រើនជាសេដ្ឋី និងមហាសេដ្ឋី។ ជាក់ស្តែង ប្រធានក្រុម LeBron James មានទ្រព្យសម្បត្តិជាង១.២ពាន់លានដុល្លារអាមេរិក កីឡាករ Kevin Durant មានទ្រព្យចំនួន៧៩០លានដុល្លារ និង កីឡាករ Stephen Curry មានទ្រព្យចំនួន៦៦០លានដុល្លារ។
គួរឱ្យដឹងថា ការប្រកួតកីឡាបាល់បោះវិញ្ញាសាបុរស បានមកឈានដល់វគ្គ៨ក្រុមចុងក្រោយហើយ។ សហរដ្ឋអាមេរិក ប៉ះ ប្រេស៊ីល ស៊ែប ប៉ះ អូស្ត្រាលី អាល្លឺម៉ង់ ប៉ះ ក្រិក និង ម្ចាស់ផ្ទះបារាំង ប៉ះ កាដាណា ដែលការប្រកួតធ្វើឡើងនៅថ្ងៃទី៦ ខែសីហា ឆ្នាំ២០២៤ ខាងមុខដូចគ្នា។
ដោយឡែក ការប្រកួតវិញ្ញាសានារី ក៏ឈានដល់វគ្គ៨ក្រុមចុងក្រោយផងដែរ។ សហរដ្ឋអាមេរិក ប៉ះ នីហ្សេរីយ៉ា ម្ចាស់ផ្ទះបារាំង ប៉ះ អាល្លឺម៉ង់ អេស្ប៉ាញ ប៉ះ បែលហ្ស៊ិក និង ស៊ែប ប៉ះអូស្ត្រាលី ការប្រកួតធ្វើឡើងនៅថ្ងៃទី៧ ខែសីហា ឆ្នាំ២០២៤ ខាងមុខដូចគ្នា៕
ចែករំលែកព័តមាននេះ