ចៅក្រមសម្រេចឃុំខ្លួនយុវជន២ក្រុម ដាក់ពន្ធនាគារបណ្តោះអាសន្ន
ខេត្តសៀមរាប ៖ ចៅក្រមស៊ើបសួរ នៃសាលាដំបូងខេត្តសៀមរាប សម្រេចឃុំខ្លួនក្មេងទំនើង២ ក្រុមចំនួន៦នាក់ ដែលបង្កអុកឡុកវ៉ៃគ្នា ទៅវិញទៅមក ក្នុងក្រុងសៀមរាប ត្រូវបានប៉ូលិស…
ខេត្តសៀមរាប ៖ ចៅក្រមស៊ើបសួរ នៃសាលាដំបូងខេត្តសៀមរាប សម្រេចឃុំខ្លួនក្មេងទំនើង២ ក្រុមចំនួន៦នាក់ ដែលបង្កអុកឡុកវ៉ៃគ្នា ទៅវិញទៅមក ក្នុងក្រុងសៀមរាប ត្រូវបានប៉ូលិស បញ្ជូនទៅដាក់ពន្ធនាគារបណ្តោះអាសន្ន រង់ចំណាត់ការ បន្តតាមនីតិវិធីច្បាប់ បន្ទាប់ពីបង្កហិង្សាវ៉ៃគ្នា ទៅវិញ ទៅមក ប៉ុន្តែមិនមានប្រើប្រាស់អាវុធ នៅក្នុងបរិវេណ សា្ថនីយប្រេងឥន្ធនៈ សូគីម៉ិច ទល់មុខផ្សារ កណ្ដាល នោះឡើយ។
ក្នុងប្រតិបត្តិការ ឃាត់ខ្លួនក្មេងទំនើង២ក្រុមនោះកើតឡើងនៅវេលាម៉ោង១និង៣០នាទី រំលងអធ្រាត្រឈានចូលថ្ងៃទី ៣១ ខែកក្កដា ឆ្នាំ២០២៤ ស្ថិតក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប ខេត្តសៀមរាប ។
បើតាមប្រភពពីសមត្ថកិច្ចជំនាញបានប្រាប់ថា កម្លាំងនគរបាលការិយាល័យជំនាញ បានធ្វើការឃាត់ខ្លួនជនសង្ស័យចំនួន៦នាក់បញ្ជូនទៅតុលាការ ដើម្បីចាត់ការបន្តតាមនីតិវិធីច្បាប់។
សូមបញ្ជាក់ថា បើតាមសេចក្តីប្រកាសព័ត៌មាន របស់សាលាដំបូងខេត្តសៀមរាប ស្តីពី ចំណាត់ការលើសំណុំរឿងព្រហ្មទណ្ឌ ពាក់ព័ន្ធ នឹងករណីក្មេងទំនើង ៖ អ្នកនាំពាក្យសាលាដំបូងខេត្តសៀមរាប មានកិត្តិយសសូមជម្រាបជូនសាធារណជន និងបណ្តាញសារព័ត៌មានទាំងអស់មេត្តាជ្រាបថា សាលាដំបូងខេត្តសៀមរាប បានទទួលចាត់ការសំណុំរឿងព្រហ្មទណ្ឌលេខ ១០៥៦ ចុះថ្ងៃទី១ ខែសីហា ឆ្នាំ២០២៤ ពាក់ព័ន្ធ នឹងក្រុមក្មេងទំនើង ដែលមានជនត្រូវចោទចំនួន៦នាក់រួមមាន ១/ឈ្មោះ យូ ខេមរា ភេទប្រុស អាយុ១៦ឆ្នាំ។
២/ឈ្មោះ វ៉ុន គឹមយ៉ុង ភេទប្រុស អាយុ១៦ឆ្នាំ។ ៣/ ឈ្មោះ ប៉ក់ សុពុំ ភេទប្រុស អាយុ១៦ឆ្នាំ ។ ៤/ ឈ្មោះ លឹមជីង ប៉ាវ ភេទប្រុស អាយុ១៨ឆ្នាំ ។ ៥/ ឈ្មោះ ជា សំណាង ភេទប្រុស អាយុ១៧ឆ្នាំ និង ៦/ ឈ្មោះវ៉ុន សុខារ៉ាវុឌ្ឍ ភេទប្រុស អាយុ១៥ឆ្នាំ ដោយកាលពីថ្ងៃទី៣១ខែកក្កដា ឆ្នាំ២០២៤ នៅវេលាម៉ោង ១ និង ៣០នាទីរំលងអាធ្រាត្រ ត្រូវបានក្រុមក្មេងទំនើងខាងលើនេះ បានធ្វើសកម្ម វាយគ្នា ទៅវិញ ទៅមក បណ្តាលឱ្យមានការរងរបួស បែកក្បាលនិងបែកមាត់ ។
ជនត្រូវចោទ មានគ្នាទាំងអស់ចំនួន១០នាក់ ខាងលើ ត្រូវបានចោទប្រកាន់ពីបទ ហិង្សាដោយចេតនាមានស្ថានទម្ងន់ទោស (ប្រព្រឹត្តដោយមានមនុស្សច្រើននាក់) ដែលប្រព្រឹត្តនៅមុខកាហ្គាសសាំង សូគីមិច មុខផ្សារកណ្តាល ក្នុងភូមិមណ្ឌល១ សង្កាត់ស្វាយដង្កំ ក្រុង ខេត្តសៀមរាប កាលពីថ្ងៃទី៣១ ខែកក្កដា ឆ្នាំ២០២៤ បទល្មសព្រហ្មទណ្ឌ ដែលមានចែងនិងផ្តន្ទាទោស តាមបញ្ញត្តិមាត្រា ២១៨ នៃក្រមព្រហ្មទណ្ឌ។
ក្រោយពីបានសួរចម្លើយជនត្រូវចោទ និងបានពិនិត្យភស្តុតាងក្នុងសំណុំរឿង រួចមកចៅក្រមស៊ើបសួរ នៃសាលាដំបូងខេត្តសៀមរាប បានសម្រេចចិត្តឃុំខ្លួនជនត្រូវចោទដែលឃាត់ខ្លួនបានទាំង៦នាក់ ខាងលើ ឱ្យយកទៅដាក់ពន្ធនាគារបណ្តោះអាសន្ន ដើម្បីបន្តការស៊ើបសួរតាមនីតិវីធីច្បាប់។
បច្ចុប្បន្ន ក្រុមក្មេងទំនើង ទាំង ៦នាក់ ត្រូវបានចៅក្រមស៊ើបសួរនៃសាលាដំបូងខេត្តសៀមរាប សម្រចឱ្យ កម្លាំងនគរបាលការិយាល័យជំនាញ យកទៅដាក់ពន្ធនាគារបណ្តោះអាសន្ន ដើម្បីបន្តការស៊ើបសួរតាមនីតិវីធីច្បាប់ ៕
ចែករំលែកព័តមាននេះ