ខេត្តស្ទឹងត្រែង ៖ លោកអភិបាលខេត្ត សរ សុពុត្រា ក្នុងនាមប្រធានគណៈបញ្ជាការឯកភាពរដ្ឋបាលខេត្ត បានក្រើនរំលឹកដល់កម្លាំងសមត្ថកិច្ច និងអាជ្ញាធរមូលដ្ឋាន បន្តចុះផ្សព្វផ្សាយ និងអនុវត្តគោលនយោបាយ…
ខេត្តស្ទឹងត្រែង ៖ លោកអភិបាលខេត្ត សរ សុពុត្រា ក្នុងនាមប្រធានគណៈបញ្ជាការឯកភាពរដ្ឋបាលខេត្ត បានក្រើនរំលឹកដល់កម្លាំងសមត្ថកិច្ច និងអាជ្ញាធរមូលដ្ឋាន បន្តចុះផ្សព្វផ្សាយ និងអនុវត្តគោលនយោបាយ ភូមិ-ឃុំ-សង្កាត់ មានសុវត្ថិភាព ត្រូវរួមគ្នាចុះបង្ក្រាបទីតាំងល្បែងស៊ីសងខុសច្បាប់គ្រប់ប្រភេទ និងចុះពិនិត្យជាក់ស្តែង លើទីតាំងណា ដែលសង្ស័យមានបង្កប់លេងល្បែងស៊ីសង ដើម្បីធានាមិនឱ្យកើតមាននៅក្នុងមូលដ្ឋានរបស់ខ្លួនគ្រប់គ្រង ។
លោក សរ សុពុត្រា មានប្រសាសន៍បែបនេះក្នុងពិធីអញ្ជើញជាអធិបតីជួបសំណេះសំណាល ជាមួយថ្នាក់ដឹកនាំមន្ត្រីរាជការ ក្នុងរចនាសម្ព័ន្ធរដ្ឋបាលក្រុងស្ទឹងត្រែង កាលពីរសៀលថ្ងៃទី៣១ កក្កដា ២០២៤ នៅសាលាក្រុងស្ទឹងត្រែង ដោយមានការចូលរួមពីមន្ត្រីរាជការព្រមទាំងកងកម្លាំងទាំង៣ ផងដែរ ។
លោក សរ សុពុត្រា បានបញ្ជាក់ថា ទីតាំង ដែលយើងបានដឹងនៅក្នុងខេត្តស្ទឹងត្រែង មាន៤៩ទីតាំង នៃការដាក់ឲ្យមានលេងល្បែង មានល្បែងឆ្នោតផង Online ផង ជល់មាន់ធម្មតាផង ហើយការលេងជល់មាន់នេះ លេងជល់ធម្មតាដោយខ្លាចគេចាប់ ឥឡូវបែរជាមកជល់មាន់តាម Online ទៀត ។
លោកបន្តថា ការលេងល្បែងនេះ ជាពិសេសល្បែង Online លេងមិនឈ្នះកំព្យូទ័រទេ ហើយល្បែងតាមការស៊ីណូ ជាប្រភេទល្បែង ដែលគេយកលុយពីអ្នកមាន ប៉ុន្តែប្រភេទល្បែងលេងតាមផ្ទះ កន្ទុយលេខ ឆ្នោត និងប្រភេទល្បែង Online នេះ វាធ្វើឲ្យមានភាពក្រីក្រនៅក្នុងគ្រួសារ ទៅវិញទេ ។
លោកអភិបាលខេត្តស្ទឹងត្រែង បានថ្លែងសង្កត់ធ្ងន់ថា ប្រសិនយើងមិនទប់ស្កាត់ករណីទាំងអស់នេះ (ល្បែងស៊ីសង ចោរកម្ម និងគ្រឿងញៀន) ឲ្យបានទាន់ពេលវេលាទេ នៅក្នុងសង្គមនេះនឹងសំបូរបែបទៅដោយចោរ ដូច្នេះសូមមន្ត្រីឯកសណ្ឋានទាំងអស់ ដែលស្ថិតនៅក្រោមគណៈបញ្ជាការឯកភាព ត្រូវពង្រឹងឡើងវិញ ។
លោកបានបញ្ជាក់ថា នៅទូទាំងខេត្តស្ទឹងត្រែង មានអាជីវកម្មឆ្នោតតែមួយទេ ដែលមានអាជ្ញាប័ណ្ណ ដូច្នេះអាជ្ញាប័ណ្ណនេះ នឹងផុតកំណត់នៅក្នុងឆ្នាំ២០២៦ ហើយអាជ្ញាប័ណ្ណរបស់ឆ្នោតនេះ ឲ្យអនុវត្តតែក្នុងដែនសមត្ថកិច្ចរបស់ក្រុងទេ ប្រសិនបើឃើញអាជ្ញាប័ណ្ណនេះ ទៅអនុវត្តនៅស្រុកផ្សេងៗ អាជ្ញាធរស្រុកត្រូវចាប់ឲ្យបាន ៕
ចែករំលែកព័តមាននេះ