រាជធានីភ្នំពេញ ៖ ព្រះករុណា ព្រះបាទសម្តេច ព្រះបរមនាថ នរោត្តម សីមុនី ព្រះមហាក្សត្រ នៃព្រះរាជាណាចក្រកម្ពុជា បានចេញព្រះរាជក្រឹត្យនៅថ្ងៃទី៣១…
រាជធានីភ្នំពេញ ៖ ព្រះករុណា ព្រះបាទសម្តេច ព្រះបរមនាថ នរោត្តម សីមុនី ព្រះមហាក្សត្រ នៃព្រះរាជាណាចក្រកម្ពុជា បានចេញព្រះរាជក្រឹត្យនៅថ្ងៃទី៣១ ខែកក្កដា ឆ្នាំ២០២៤ បន្ថយឋានន្តរស័ក្តិ ពីឧត្តមសេនីយ៍ទោ អេង សារឿន ឱ្យមកនៅត្រឹមថ្នាក់ «ពលបាលត្រី» ក្របខ័ណ្ឌមន្ត្រីនគរបាលជាតិកម្ពុជា នៃក្រសួងមហាផ្ទៃ ។
សូមបញ្ជាក់ថា លោកឧត្ដមសេនីយ៍ទោ អេង សាវឿន អនុប្រធាននាយកដ្ឋានបង្ការ និងពន្លត់អគ្គីភ័យ ក្រសួងមហាផ្ទៃ បច្ចុប្បន្ន កំពុងជាប់ឃុំក្នុងពន្ធនាគារនៅឡើយ ពាក់ព័ន្ធឆបោកប្រាក់ជាង ៥ម៉ឺនដុល្លារ រឿងរត់ការចូលក្របខណ្ឌនគរបាលជាតិ ប៉ុន្តែបុគ្គលនេះរត់ការមិនបានសម្រេច ហើយមិនអោយលុយជនរងគ្រោះវិញ ទើបជនរងគ្រោះប្ដឹងសមត្ថកិច្ចឃាត់ខ្លួនតែម្តង ។
គួររម្លឹកផងដែរថា កាលពីរសៀលថ្ងៃទី១៨ ខែមីនា ឆ្នាំ២០២៤ កម្លាំងសមត្ថកិច្ចការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ បានធ្វើការស្រាវជ្រាវ រហូតឈានដល់ការនាំខ្លួនលោកផ្កាយ២រូបនេះ មានឈ្មោះ អេង សាវឿន ភេទប្រុស អាយុ៥៤ឆ្នាំ មុខរបរជាមន្ត្រីនគរបាលជាតិ មានឋានន្ទរស័ក្តិថ្នាក់ឧត្តមសេនីយ៍ទោ មានតួនាទីជាអនុប្រធាននាយកដ្ឋាននគរបាលពន្លត់អគ្គិភ័យ នៃក្រសួងមហាផ្ទៃ និងមានទីលំនៅផ្ទះលេខ០២អឺ០ ផ្លូវលំ ភូមិគោកចំបក់ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ។
ពាក់ព័ន្ធពីបទ.ឆបោក ប្រព្រឹត្តនៅចំណុចរាជធានីភ្នំពេញ កាលពីថ្ងៃទី១៧.២២.២៧ ខែកញ្ញា ឆ្នាំ២០២១ និងអនុវត្តតាមដីកាបង្គាប់ឱ្យនាំខ្លួនលេខ ៣១៩«ឆ១»ដ.ច.ន ចុះថ្ងៃទី២៦ ខែកុម្ភៈ ឆ្នាំ២០២៤ ចេញដោយលោក ហម ម៉េងសែ អនុប្រធានសាលា ដំបូងរាជធានីភ្នំពេញ ជាចៅក្រមស៊ើបសួរ មកកាន់ការិយាល័យនគរបាលព្រហ្មទណ្ឌ ដើម្បីចាត់ការតាមនីតិវិធី ។
តាមការបង្ហើបឱ្យដឹងទៀតថា លោកផ្កាយ២ អនុប្រធាននាយកដ្ឋានពន្លត់អគ្គិភ័យរូបនោះ ដែលជាប់ពាក់ព័ន្ធបណ្តឹងព្រហ្មទណ្ឌ ពីបទ.ឆបោក រឿងទទួលយកប្រាក់អ្នកដទៃ ជាង៥ម៉ឺនដុល្លារអាមេរិក ដើម្បីយកទៅរត់ការចូលក្រមខណ្ឌនគរបាលជាតិ តែធ្វើកិច្ចការនោះមិនបានសម្រេច ហើយក៏ស៊ីដាច់ប្រាក់ជនរងគ្រោះ ។ ក្រោយឃាត់ខ្លួន នៅរសៀលថ្ងៃដដែល សមត្ថកិច្ចក៏បានបញ្ជូនជនសង្ស័យទៅសាលាដំបូងរាជធានីភ្នំពេញ ដើម្បីប្រគល់ជូនចៅក្រមស៊ើបសួរ ។
លុះពេលការស៊ើបសួរ ត្រូវបានបញ្ចប់ ចៅក្រមសម្រេចឃុំខ្លួនជនសង្ស័យដាក់ពន្ធនាគារជាបណ្ដោះអាសន្ន ប៉ុន្តែដោយពេលវេលាល្ងាចពេក នគរបាលព្រហ្មទណ្ឌ ក៏យកលោកផ្កាយ២ទៅគ្រប់គ្រង១យប់វិញ ដោយរង់ចាំព្រឹកថ្ងៃទី១៩ ខែមីនា ទើបនាំទៅឃុំខ្លួនបណ្ដោះអាសន្ននៅពន្ធនាគារ PJ ៕
ចែករំលែកព័តមាននេះ