ប្រទេសបារាំង ៖ ប្រទេសចិនបានឡើងទៅឈរនៅកំពូលតារាងមេដាយ ព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ២០២៤ ក្រោយប្រទេសជប៉ុនកាន់កាប់តំណែងនេះ អស់ប៉ុន្មានថ្ងៃកន្លងមក។ គិតត្រឹមព្រឹកថ្ងៃទី១ ខែសីហា ឆ្នាំ២០២៤ ប្រទេសចិនបានឈ្នះមេដាយសរុបចំនួន១៩គ្រឿង…
ប្រទេសបារាំង ៖ ប្រទេសចិនបានឡើងទៅឈរនៅកំពូលតារាងមេដាយ ព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ២០២៤ ក្រោយប្រទេសជប៉ុនកាន់កាប់តំណែងនេះ អស់ប៉ុន្មានថ្ងៃកន្លងមក។
គិតត្រឹមព្រឹកថ្ងៃទី១ ខែសីហា ឆ្នាំ២០២៤ ប្រទេសចិនបានឈ្នះមេដាយសរុបចំនួន១៩គ្រឿង មាស៩គ្រឿង ដោយឈ្នះប្រភេទកីឡាជិះកង់លេងក្បាច់សេរី (Cycling BMX Freestyle) ១គ្រឿង កីឡាលោតទឹក (Diving) ៣គ្រឿង កីឡាបាញ់កាំភ្លើង៣គ្រឿង កីឡាហែលទឹក១គ្រឿង និងកីឡាវាយកូនឃ្លីលើតុ ១គ្រឿង។ មេដាយប្រាក់៧គ្រឿង លើកីឡាបាញ់ធ្នូ១គ្រឿង កីឡាកាយសម្ព័ន្ធសិល្បៈ២គ្រឿង កីឡាបាញ់កាំភ្លើង២គ្រឿង និងកីឡាហែលទឹក២គ្រឿង។ មេដាយសំរឹទ្ធ៣គ្រឿង លើកីឡាកាយសម្ព័ន្ធសិល្បៈ១គ្រឿង និងកីឡាហែលទឹក២គ្រឿង។
កីឡាករហែលទឹកជនជាតិចិន Pan Zhanle បានបំបែកឯតទគ្គកម្មពិភពលោកផ្ទាល់ខ្លួន ក្រោយឈ្នះមេដាយមាសលើវិញ្ញាសាហែលសេរី១០០ម៉ែត្របុរស កីឡាអូឡាំពិកទីក្រុងប៉ារីសឆ្នាំ ២០២៤ កាលពីយប់ថ្ងៃទី៣១ ខែកក្កដា ឆ្នាំ២០២៤ កន្លងទៅ ដោយប្រើថិរវេលា ៤៦.៤០វិនាទី។ កីឡាករវ័យ១៩ឆ្នាំរូបនេះ បានបំបែកកំណត់ត្រាពិភពលោកចាស់របស់ខ្លួន ដែលប្រើថិរវេលា ៤៦.៨០វិនាទី នៅការប្រកួតជើងឯកពិភពលោក នៅទីក្រុងដូហា ប្រទេសកាតា កាលពីខែកុម្ភៈ ឆ្នាំ២០២៣។
តាមពីក្រោយចិន ដែលឈរនៅកំពូលតារាងមេដាយរួមមាន ៖ ម្ចាស់ផ្ទះបារាំងឈ្នះមេដាយសរុប២៦គ្រឿង មាស៨គ្រឿង ប្រាក់១០គ្រឿង និងសំរឹទ្ធ៨គ្រឿង។ ជប៉ុនឈ្នះមេដាយសរុប១៥គ្រឿង មាស៨គ្រឿង ប្រាក់៣គ្រឿង និងសំរឹទ្ធ៤គ្រឿង។ អូស្ត្រាលីឈ្នះមេដាយសរុប១៦គ្រឿង មាស៧គ្រឿង ប្រាក់៦គ្រឿង និងសំរឹទ្ធ៣គ្រឿង។ ចំណែកចក្រភពអង់គ្លេសឈ្នះមេដាយសរុប១៧គ្រឿង មាស៦គ្រឿង ប្រាក់៦គ្រឿង និងសំរឹទ្ធ៥គ្រឿង។
គួរឱ្យដឹងផងដែរថា គិតមកត្រឹមពេលនេះមាន៤៧ប្រទេសហើយ ដែលដណ្តើមបានមេដាយពីព្រឹត្តិការណ៍កីឡាអូឡាំពិកទីក្រុងប៉ារីសឆ្នាំ ២០២៤។ ហើយនៅក្នុងនោះ ២៧ប្រទេសដណ្តើមបានមេដាយមាស៕
ចែករំលែកព័តមាននេះ