ប្រទេសបារាំង ៖ កីឡាការិនីគុនដាវជនជាតិអេហ្ស៊ីប Nada Hafez បានបង្កភាពភ្ញាក់ផ្អើលដល់អ្នកតាមដាន ការប្រកួតកីឡាអូឡាំពិករដូវក្តៅទីក្រុងប៉ារីសឆ្នាំ ២០២៤ ក៏ដូចជាប្រព័ន្ធផ្សព្វផ្សាយនៅជុំវិញពិភពលោក បន្ទាប់ពីនាងបានបង្ហើបថា…
ប្រទេសបារាំង ៖ កីឡាការិនីគុនដាវជនជាតិអេហ្ស៊ីប Nada Hafez បានបង្កភាពភ្ញាក់ផ្អើលដល់អ្នកតាមដាន ការប្រកួតកីឡាអូឡាំពិករដូវក្តៅទីក្រុងប៉ារីសឆ្នាំ ២០២៤ ក៏ដូចជាប្រព័ន្ធផ្សព្វផ្សាយនៅជុំវិញពិភពលោក បន្ទាប់ពីនាងបានបង្ហើបថា នាងចូលរួមប្រកួតអូឡាំពិកឆ្នាំនេះ ទាំងដែលកំពុងពពោះ៧ខែ និងដោយមោទកភាពជាទីបំផុត។ នេះបើយោងតាមប្រភពពីសារព័ត៌មាន BBC និង ESPN ចេញផ្សាយកាលពីថ្ងៃទី៣០ ខែកក្កដា ឆ្នាំ២០២៤ កន្លងទៅ។
កីឡាការិនី Nada Hafez អាយុ២៦ឆ្នាំ បានទម្លាក់កីឡាការិនីអាមេរិក Elizabeth Tartakovsky នៅក្នុងលទ្ធផល ១៥ទល់នឹង១៣ ការប្រកួតជម្រុះជុំទី១ ក្រុមទី៤ វគ្គ៣២នាក់ចុងក្រោយ ប្រភេទកីឡាគុនដាវ វិញ្ញាសា Saber ឯកត្តជននារី។ ប៉ុន្តែទោះយ៉ាងណា កីឡាការិនីអេហ្ស៊ីបរូបនេះ ហាលអាវត្រឹមវគ្គ១៦នាក់ចុងក្រោយ បន្ទាប់ពីចាញ់កីឡាការិនីកូរ៉េខាងត្បូង Jeon Hayoung នៅក្នុងលទ្ធផល ១៥ទល់នឹង៧។
នៅក្នុងវិញ្ញាសានេះ កីឡាការិនីម្ចាស់ផ្ទះបារាំង Manon Brunet ឈ្នះមេដាយមាស និងមិត្តរួមជាតិរបស់នាង កីឡាការិនី Sara Balzer ឈ្នះមេដាយប្រាក់។ ចំណែកកីឡាការិនីអ៊ុយក្រែន Olga Kharlan ឈ្នះមេដាយសំរឹទ្ធ។ ងាកមកកាន់កីឡាការិនីអេហ្ស៊ីប Nada Hafez ដែលចូលរួមប្រកួតកីឡាអូឡាំពិកទីក្រុងប៉ារីសឆ្នាំ ២០២៤ ទាំងពពោះ៧ខែ នៅក្នុងប្រភេទកីឡាគុនដាវ ឬ Fencing ដែលអាចបង្កគ្រោះថ្នាក់ដល់នាងនោះ បានចែករំលែករូបភាពនៅលើបណ្តាញទំនាក់ទំនងសង្គម Instagram កាលពីថ្ងៃចន្ទដើមសប្តាហ៍នេះ ដោយភ្ជាប់ជាមួយសារមួយថា «អត្តពលិកអូឡាំពិកមានផ្ទៃពោះ ៧ខែ»។
នៅក្នុងការបង្ហោះផ្សេងទៀតរបស់នាងបានបង្ហាញអារម្មណ៍រំភើប និងមោទកភាពថា «អ្វីដែលលេចឡើងចំពោះអ្នកនៅក្នុងនាមជាអត្តពលិកពីរនាក់លើកន្លែងប្រកួតគ្នា។ ប៉ុន្តែពួកគេពិតជាមានដល់ទៅ៣នាក់ពិតមែន! ហើយនោះគឺជាខ្ញុំ ដៃគូប្រកួតប្រជែងរបស់ខ្ញុំ និងឈាមជ័ររបស់ខ្ញុំ ដែលមិនទាន់បានឃើញពិភពលោកយើងនៅឡើយ គឺទារកតូច!»។
កីឡាការិនី Hafez ដែលបានចូលរួមប្រកួតកីឡាអូឡាំពិក៣សម័យកាល ពោលគឺនៅឆ្នាំ ២០១៦ ២០២០ និង ២០២៤ នេះ បានបន្ថែមថា «កូនខ្ញុំ និងខ្ញុំមានចំណែកស្មើគ្នានៃបញ្ហាប្រឈមរបស់យើងនៅក្នុងការប្រកួត មិនថាទាំងផ្លូវកាយ និងផ្លូវចិត្តនោះទេ។ ការមានផ្ទៃពោះគឺជាផលលំបាកដោយខ្លួនឯង ប៉ុន្តែការតស៊ូដើម្បីរក្សាតុល្យភាពជីវិត និងកីឡាគឺមិនមែនជាការលំបាកនោះទេ ប៉ុន្តែទោះយ៉ាងណាវាពិតជាមានតម្លៃណាស់»។
តារាងមេដាយ ព្រឹត្តិការណ៍កីឡាអូឡាំពិកទីក្រុងប៉ារីសឆ្នាំ ២០២៤ គិតត្រឹមព្រឹកថ្ងៃទី៣១ ខែកក្កដា ឆ្នាំ២០២៤ ៖
ចែករំលែកព័តមាននេះ