រាជធានីភ្នំពេញ ៖ ទឹកស្ទឹងព្រែកត្នោតនៅតែបន្តជន់ឡើងកាន់តែខ្លាំងថែមទៀត មិនទាន់មានការថមថយទៅវិញនៅឡើយទេ ដោយគិតរហូតមកដល់វេលាព្រឹកថ្ងៃទី៣០ ខែកក្កដា ឆ្នាំ២០២៤ នេះ ។ ទឹកបានជន់ហៀរចេញពីស្ទឹងហូរក្នុងភូមិឋានប្រជាពលរដ្ឋ…
រាជធានីភ្នំពេញ ៖ ទឹកស្ទឹងព្រែកត្នោតនៅតែបន្តជន់ឡើងកាន់តែខ្លាំងថែមទៀត មិនទាន់មានការថមថយទៅវិញនៅឡើយទេ ដោយគិតរហូតមកដល់វេលាព្រឹកថ្ងៃទី៣០ ខែកក្កដា ឆ្នាំ២០២៤ នេះ ។ ទឹកបានជន់ហៀរចេញពីស្ទឹងហូរក្នុងភូមិឋានប្រជាពលរដ្ឋ បណ្ដាលឲ្យលិចជាច្រើនខ្នងបន្ថែមទៀត នៅក្នុងខណ្ឌដង្កោ រាជធានីភ្នំពេញ ។
ការលិចលង់បានកើនឡើងដល់ចំនួន៥សង្កាត់ ស្មើនិង១៤ភូមិ,១៦២ខ្នងផ្ទះ,២០២គ្រួសារ ប៉ះពាល់មនុស្ស៨៣៥នាក់ ,ផ្លូវបេតុងក្នុងភូមិចំនួន៤ខ្សែ ,វត្តចំការខ្សាច់១,សាលាសង្កាត់ស្ពានថ្ម១ និងប៉ុស្ដិ៍នគរបាលរដ្ឋបាលស្ពានថ្ម១ផងដែរ ប៉ុន្តែមិនបានបណ្ដាលឲ្យប្រជាពលរដ្ឋណាម្នាក់គ្រោះថ្នាក់ឡើយ ។
នេះបើតាមការប្រាប់ឲ្យដឹងពីនគរបាលនៃអធិការដ្ឋានខណ្ឌដង្កោ ដែលបានតាមដានយ៉ាងយកចិត្តទុកដាក់អំពីស្ថានភាពទឹកស្ទឹងនោះជាប់ជាប្រចាំ ដើម្បីត្រៀមជួយសង្គ្រោះឬជម្លៀសប្រជាពលរដ្ឋគ្រប់ពេល ក្នុងករណីដែលទឹកជន់កាន់តែខ្លាំងថែមទៀតនោះ ។
នគរបាលដដែលបានប្រាប់ឲ្យដឹងបន្តទៀតថា សង្កាត់ទាំង៥ខាងលើនោះ រួមមានទី១-សង្កាត់គងនយលិចចំនួន០៣ភូមិ ក្នុងនោះ មានភូមិវាលថ្លាន់ចំនួន២៧ខ្នងផ្ទះ ស្មើនឹង៣៥គ្រួសារ មនុស្សសរុបចំនួន១៧៨នាក់ និងផ្លូវ១ខ្សែ ។ ភូមិគងនយចំនួន០៥ខ្នងផ្ទះ ស្មើនឹង០៦គ្រួសារ មនុស្សសរុបចំនួន២៤នាក់,ភូមិសិរីសម្បត្តិចំនួន១៥ខ្នងផ្ទះ ស្មើ១៥គ្រួសារ មនុស្សសរុបចំនួន៦៥នាក់ និងផ្លូវចំនួន០២ខ្សែ ។
ទី២-សង្កាត់សាក់សំពៅចំនួន០៣ភូមិ ក្នុងនោះ ភូមិពោធិ៍រលំចំនួន០២ខ្នងផ្ទះ ស្មើនឹង០២គ្រួសារ មនុស្សសរុបចំនួន០៨នាក់ ។ ភូមិសំបួរចំនួន០២ខ្នងផ្ទះ ស្មើនឹង០៣គ្រួសារ មនុស្សសរុបចំនួន១៥នាក់ ,ភូមិពាម០១ខ្នងផ្ទះ ស្មើនឹង០១គ្រួសារ មនុស្សសរុបចំនួន០៥នាក់ និងផ្លូវ១ខ្សែ ។
ទី៣-សង្កាត់ព្រៃវែងលិចភូមិសេរីដីដុះ មានចំនួន៨០ខ្នងផ្ទះ ស្មើនឹង១០៤គ្រួសារ មនុស្សសរុបចំនួន៣៣៨នាក់ ។
ទី៤-សង្កាត់ទៀន លិចភូមិកន្ទុយទឹកចំនួន១១ខ្នងផ្ទះ ស្មើនឹង១៧គ្រួសារ មនុស្សសរុបចំនួន៦៨នាក់ ។
ទី៥-សង្កាត់ស្ពានថ្មចំនួន៦ភូមិក្នុងនោះមានភូមិអញ្ចាញចំនួន៣ខ្នងផ្ទះ ស្មើនឹង០៣គ្រួសារ មនុស្សសរុបចំនួន០៩នាក់ ,ភូមិម៉ឺនត្រាលិចវត្តចំការខ្សាច់ ប៉ះពាល់ព្រះសង្ឃនិងគ្រហស្ថចំនួន៤៧អង្គ/នាក់ ,ភូមិស្ពានថ្មចំនួន០៥ខ្នងផ្ទះ ស្មើនឹង០៥គ្រួសារ មនុស្សសរុបចំនួន២៥នាក់ លិចសាលាសង្កាត់ស្ពានថ្ម និងប៉ុស្តិ៍នគរបាលស្ពានថ្ម ។ ភូមិស្វាយមានលក្ខណ៍ចំនួន០៤ខ្នងផ្ទះ ស្មើនឹង០៤គ្រួសារ មនុស្សសរុបចំនួន១៨នាក់ ,ភូមិហា០៥ខ្នងផ្ទះ ស្មើនឹង០៥គ្រួសារ មនុស្សសរុបចំនួន២១នាក់,ភូមិដូងចំនួន០២ខ្នងផ្ទះ ស្មេីនឹង០២គ្រួសារ មនុស្សសរុបចំនួន១៤នាក់ ។
ប្រជាពលរដ្ឋបាននិយាយថា ទឹកស្ទឹងព្រែកត្នោតបានជន់ឡើងជាបន្តបន្ទាប់ច្រើនថ្ងៃមកហើយ ប៉ុន្តែឡើងខ្លាំងមែនទែនបណ្ដាលឲ្យលិចផ្ទះសម្បែង ទីវត្តអារាម សាលាសង្កាត់និងប៉ុស្តិ៍នគរបាលនោះរយៈពេល៣ថ្ងៃចុងក្រោយមកនេះ ។ ដោយផ្ទះខ្លះលិចត្រឹមស្មងជើង ត្រឹមភ្លៅ ចង្កេះ ឬផ្ទះដែលនៅជាប់ផ្ទាល់និងមាត់ស្ទឹងតែម្ដងលិចជ្រៅជាងនេះ រីឯបរិវេណឯវត្តចំការខ្សាច់ក៏លិចគឺត្រូវទឹកលិចទាំងស្រុង ដោយមានកន្លែងខ្លះលិចក្បាលទៀតផង។ ចំណែកព្រះសង្ឃបានគង់នៅលើសាលាឆាន់ដែលសង់ខ្ពស់ ព្រមទាំងប្រើទូកងសម្រាប់ជាមធ្យោបាយដឹកសម្ភារផ្សេងៗដូចជាស៊ីម៉ង៌ជាដើមយកទៅទុកនៅទីខ្ពស់ ។
ប្រជាពលរដ្ឋបានលើកឡើងបន្តទៀតថា បញ្ហាទឹកជំនន់ស្ទឹងព្រែកត្នោតនេះគឺដោយសារតែមានភ្លៀងធ្លាក់ខ្លាំងជាប់មិនដាន់នៅឯខេត្តកំពង់ស្ពឺ ឬខេត្តជាប់នោះ ហើយវាមិនទៀងនោះទេថាទឹកស្រកទៅវិញនៅពេលណានោះ ។ ប្រសិនបើមេឃនៅតែមានភ្លៀង គឺទឹកស្ទឹងនេះក៏នៅតែបន្តជន់លិចទៀតដែរ ហើយការលិចកាន់តែកើនឡើងច្រើនសង្កាត់និងច្រើនភូមិថែមទៀតផង ។
ប៉ុន្តែបើមេឃលែងមានភ្លៀងធ្លាក់បន្តទៀតនោះ យ៉ាងយូរ២ទៅ៣ថ្ងៃទៀតប៉ុណ្ណោះ ទឹកនិងស្រកចូលទៅក្នុងស្ទឹងវិញ លែងមានការលិចលង់បន្តទៀតហើយ នេះគឺជាទម្លាប់ដែលពួកគាត់បានជួបប្រទះជារៀងរាល់ឆ្នាំកន្លងមក ៕
ចែករំលែកព័តមាននេះ