ទីក្រុងយេរូសាឡឹម៖ អ៊ីស្រាអែលអះអាងថាខ្លួនទើបតែធ្វើឃាតមេដឹកនាំក្រុមហាម៉ាស់ថែមម្នាក់ទៀតដែលត្រូវជាប្អូនប្រុសរបស់អតីតមេដឹកនាំកំពូលរបស់ហាម៉ាសឈ្មោះយ៉ាយ៉ា ស៊ីនវ៉ា (Yahya Sinwar) ដែលបានស្លាប់កាលពីខែតុលា ឆ្នាំ២០២៤។ លោកមហាមេត ស៊ីនវ៉ា (Mohammad…
ទីក្រុងយេរូសាឡឹម៖ អ៊ីស្រាអែលអះអាងថាខ្លួនទើបតែធ្វើឃាតមេដឹកនាំក្រុមហាម៉ាស់ថែមម្នាក់ទៀតដែលត្រូវជាប្អូនប្រុសរបស់អតីតមេដឹកនាំកំពូលរបស់ហាម៉ាសឈ្មោះយ៉ាយ៉ា ស៊ីនវ៉ា (Yahya Sinwar) ដែលបានស្លាប់កាលពីខែតុលា ឆ្នាំ២០២៤។ លោកមហាមេត ស៊ីនវ៉ា (Mohammad Sinwar) ត្រូវអ៊ីស្រាអែលសម្លាប់កាលពីពេលថ្មីៗនេះនៅក្នុងការវាយប្រហារមួយ។ គាត់ជាគោលដៅដែលអ៊ីស្រាអែលប៉ងប្រហារជាយូរមកហើយ។ ប៉ុន្តែគ្មានឱកាស។
កាលពីដើមខែឧសភា អ៊ីស្រាអែលវាយឆ្មក់ទៅលើមន្ទីរពេទ្យមួយកន្លែងនៅតំបន់ហ្កាហ្សាខាងត្បូង។ ក្រោយមកនៅថ្ងៃទី២១ ខែឧសភា លោកណឺតាន់យ៉ាហ៊ូសន្មតទុកជាមុនថាមហាមេតប្រហែលជាបានស្លាប់នៅក្នុងការវាយប្រហារនោះ។ ថ្ងៃនេះ លោកថ្លែងនៅក្នុងរដ្ឋសភាដើម្បីបញ្ជាក់ពីការស្លាប់ និងប្រកាសលុបចោលឈ្មោះមហាមេតពីបញ្ជីខ្មៅដែលត្រូវកម្ចាត់ចោល។
រហូតមកដល់ពេលនេះ ក្រុមហាម៉ាស់មិនទាន់បញ្ចេញប្រតិកម្ម ឬបដិសេធ ឬធ្វើអត្ថាធិប្បាយទៅលើដំណឹងស្លាប់នេះទេ។ អ៊ីស្រាអែលប្រកាសពីការស្លាប់នេះចំពេលដែលខ្លួនបន្តយុទ្ធនាការវាយប្រហារយ៉ាងក្ដៅគគុកទៅលើតំបន់ហ្កាហ្សា។ អ៊ីស្រាអែលដាក់ផែនការកម្ចាត់ក្រុមហាម៉ាស់ឱ្យអស់ទាំងអង្គការចាត់តាំងនយោបាយ, រដ្ឋបាល និងរចនាសម្ព័ន្ធយោធារបស់ពួកគេ ហើយនឹងខិតខំរំដោះចំណាប់ខ្មាំងដែលនៅសេសសល់ត្រឡប់មកវិញ។
ក្រសួងសុខាភិបាលប៉ាឡេស្ទីននៅហ្កាហ្សាថ្លែងថាចំនួនជនស៊ីវិលដែលស្លាប់ដោយសារសង្គ្រាមរយៈពេលជាងមួយឆ្នាំកន្លងទៅនេះបានឆក់យកជីវិតមនុស្សជាង៥,៣ម៉ឺននាក់។ ប៉ុន្តែពួកគេមិនបានញែកឱ្យដាច់ពីគ្នាថានៅក្នុងចំណោមនោះតើមានជនស៊ីវិលប៉ុន្មាននាក់ និងយុទ្ធជនប៉ុន្មាននាក់ទេ។ អ៊ីស្រាអែលជឿជាក់ថាទោះបីគ្មានតួលេខ និងភស្តុតាងពិតប្រាកដ ប៉ុន្តែខ្លួនបានសម្លាប់យុទ្ធជនរបស់ហាម៉ាស់រាប់ម៉ឺននាក់។
លោកមហាមេត ស៊ីនវ៉ាឡើងតំណែង និងតួនាទីយ៉ាងឆាប់រហ័សនៅក្នុងជួរយោធាបន្ទាប់ពីបងប្រុសរបស់គាត់ស្លាប់កាលពីចុងឆ្នាំមុន។ បងប្រុសគាត់ជាមេគំនិតធំជាងគេនៅក្នុងការរៀបចំផែនការវាយប្រហារអ៊ីស្រាអែលកាលពីខែតុលា ឆ្នាំ២០២៣។ ក្រោយការស្លាប់ហានីយេ (Ismail Haniyeh) ដែលជាអតីតមេដឹកកំពូលរបស់ហាម៉ាស់ លោកយ៉ាយ៉ា ស៊ីនវ៉ាក៏ឡើងជំនួសតំណែងនេះ។ ក្រោយពេលស្លាប់បងប្អូនត្រកូលស៊ីនវ៉ារហូតដល់ទៅ២នាក់បែបនេះ គេមិនទាន់ដឹងថាតើនរណានឹងឡើងស្នងតំណែងជាបន្តទៀត។ ខាងលើនេះជាការដកស្រង់ប្រភពពីរ៉យទ័រ៕
ចែករំលែកព័តមាននេះ