ប្រទេសកូរ៉េខាងជើង ៖ ប្រទេសកូរ៉េខាងជើងនៅសប្តាហ៍ក្រោយនឹងបើកដំណើរកន្លែងទេសចរណ៍ឆ្នេរសមុទ្រដ៏ធំបំផុតរបស់ខ្លួន ដែលប្រទេសនេះបានអះអាងថានឹងឈានទៅរកយុគថ្មីក្នុងឧស្សាហកម្មទេសចរណ៍ បើទោះបីជាមិនទាន់មានដំណឹងថា តើពេលណាប្រទេសនៅអាស៊ីបូព៌ាមួយនេះ នឹងបើកព្រំដែនពេញលេញសម្រាប់ភ្ញៀវបរទេសយ៉ាងណាក៏ដោយ។ នេះបើតាមប្រភពពីទីភ្នាក់ងារសារព័ត៌មាន AP បានចេញផ្សាយ។…
ប្រទេសកូរ៉េខាងជើង ៖ ប្រទេសកូរ៉េខាងជើងនៅសប្តាហ៍ក្រោយនឹងបើកដំណើរកន្លែងទេសចរណ៍ឆ្នេរសមុទ្រដ៏ធំបំផុតរបស់ខ្លួន ដែលប្រទេសនេះបានអះអាងថានឹងឈានទៅរកយុគថ្មីក្នុងឧស្សាហកម្មទេសចរណ៍ បើទោះបីជាមិនទាន់មានដំណឹងថា តើពេលណាប្រទេសនៅអាស៊ីបូព៌ាមួយនេះ នឹងបើកព្រំដែនពេញលេញសម្រាប់ភ្ញៀវបរទេសយ៉ាងណាក៏ដោយ។ នេះបើតាមប្រភពពីទីភ្នាក់ងារសារព័ត៌មាន AP បានចេញផ្សាយ។
ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានរាយការណ៍ថា តំបន់ទេសចរណ៍វ៉ុនសាន-កាល់ម៉ា (Wonsan-Kalma) ដែលជាឆ្នេរស្ថិតនៅក្នុងទីក្រុងកំពង់ផែវ៉ុនសាន ខេត្តកាងវ៉ុន (Kangwon) មានសណ្ឋាគារប្រណីត និងកន្លែងស្នាក់នៅផ្សេងទៀត សម្រាប់ភ្ញៀវជិត២ម៉ឺននាក់ ដែលអាចហែលទឹកសមុទ្រ ចូលរួមជាមួយសកម្មភាពកីឡា និងការកម្សាន្តជាច្រើនផ្សេងទៀត ព្រមទាំងទទួលទានអាហារនៅភោជនីយដ្ឋាន និងអាហារដ្ឋានដែលមាននៅនឹងកន្លែងផងដែរ។
ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃទី២៦ ខែមិថុនា ឆ្នាំ២០២៥ ថា មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានទស្សនាទីតាំង ព្រមទាំងកាត់ខ្សែបូសម្ពោធទីតាំងទេសចរណ៍ឆ្នេរខាងលើ កាលពីថ្ងៃទី២៤ ខែមិថុនា ។ លោក គីម ក៏បានថ្លែងថា សមិទ្ធផលនេះ នឹងត្រូវបានកត់ត្រាថាជាជោគជ័យដ៏អស្ចារ្យបំផុតមួយនៅឆ្នាំនេះ ហើយបានហៅការបើកទំព័រនេះថា ជំហានដំបូងដ៏មានមោទនភាព ឆ្ពោះទៅរកការសម្រេចបានគោលនយោបាយរដ្ឋាភិបាលក្នុងការអភិវឌ្ឍន៍វិស័យទេសចរណ៍។
ប្រព័ន្ធផ្សព្វផ្សាយរដ្ឋបានឱ្យដឹងថា រមណីយដ្ឋានឆ្នេរ វ៉ុនសាន-កាល់ម៉ា ដែលជាកន្លែងទេសចរណ៍ដ៏ធំបំផុតរបស់ប្រទេសកូរ៉េខាងជើង នឹងចាប់ផ្តើមផ្តល់សេវាកម្មសម្រាប់ភ្ញៀវទេសចរក្នុងស្រុកនៅថ្ងៃអង្គារសប្តាហ៍ក្រោយ ប៉ុន្តែរបាយការណ៍មិនបានបញ្ជាក់ថា នៅពេលណាវានឹងចាប់ផ្តើមទទួលភ្ញៀវទេសចរបរទេសនោះទេ។ ក្រុមអ្នកសង្កេតការណ៍បានលើកឡើងថា រមណីយដ្ឋាននេះទំនងជាត្រូវការការវិនិយោគដ៏ធំពីកញ្ចប់ថវិកាមានកំណត់របស់កូរ៉េខាងជើង ដូច្នេះហើយនៅទីបំផុត រមណីយដ្ឋាននេះនឹងត្រូវតែទទួលយកអ្នកទេសចរចិន និងបរទេសផ្សេងទៀត ដើម្បីរកផលចំណេញ។
សូមជម្រាបថា លោក គីម ជុងអ៊ុន បាននិងកំពុងតែជំរុញដើម្បីធ្វើឱ្យប្រទេសកូរ៉េខាងជើងក្លាយទៅជាមជ្ឈមណ្ឌលទេសចរណ៍ ដែលជាផ្នែកមួយនៃកិច្ចខិតខំប្រឹងប្រែងដើម្បីស្តារសេដ្ឋកិច្ចជាតិដែលកំពុងជួបវិបត្តិមាន ហើយរមណីយដ្ឋានវ៉ុនសាន-កាល់ម៉ា គឺជាគម្រោងទេសចរណ៍មួយក្នុងចំណោមគម្រោងទេសចរណ៍ ដែលមេដឹកនាំកំពូលកូរ៉េខាងជើងរូបនេះ តែងតែលើកមកនិយាយច្រើនបំផុត។
ទន្ទឹមជាមួយគ្នានោះ ប្រព័ន្ធផ្សព្វផ្សាយរដ្ឋក៏បានរាយការណ៍ថា ប្រទេសកូរ៉េខាងជើងនឹងបញ្ជាក់អំពីផែនការសាងសង់កន្លែងទេសចរណ៍ធំៗនៅក្នុងតំបន់ផ្សេងទៀតរបស់ខ្លួន។ ប៉ុន្តែទោះយ៉ាងណាក៏ដោយ ប្រទេសកូរ៉េខាងជើងមិនបានលុបចោលទាំងស្រុងនូវបម្រាមទេសចរណ៍បរទេស ដែលខ្លួនបានដាក់កាលពីដើមឆ្នាំ ២០២០ ដើម្បីការពារប្រឆាំងនឹងជំងឺរាតត្បាតកូវីដ-១៩នោះទេ៕
ចែករំលែកព័តមាននេះ