ប្រទេសបារាំង ៖ គិតត្រឹមព្រឹកថ្ងៃទី២៩ ខែកក្កដា ឆ្នាំ២០២៤នេះ ប្រទេសជប៉ុនកំពុងកាន់កាប់កំពូលតារាងមេដាយសរុប ព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ ២០២៤ ជាបណ្តោះ អាសន្ន…
ប្រទេសបារាំង ៖ គិតត្រឹមព្រឹកថ្ងៃទី២៩ ខែកក្កដា ឆ្នាំ២០២៤នេះ ប្រទេសជប៉ុនកំពុងកាន់កាប់កំពូលតារាងមេដាយសរុប ព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ ២០២៤ ជាបណ្តោះ អាសន្ន ក្រោយដណ្តើមបានមេដាយសរុបចំនួន៧គ្រឿង មាស៤គ្រឿង ប្រាក់២គ្រឿង និងសំរឹទ្ធ១គ្រឿង។ តាមពីក្រោយដោយប្រទេសអូស្ត្រាលី និងសហរដ្ឋអាមេរិក។
សរុបមេដាយទាំង៧គ្រឿងរបស់ជប៉ុន គិតត្រឹមព្រឹកថ្ងៃចន្ទនេះបានពីការប្រភេទកីឡាគុនដាវ មាស១គ្រឿង កីឡាយូដូ (Judo) មាស២គ្រឿង និងសំរឹទ្ធ១គ្រឿង កីឡាជិះស្គីក្តាបន្ទះ មាស១គ្រឿង និងប្រាក់១គ្រឿង ក៏ដូចជាកីឡាហែលទឹក ប្រាក់១គ្រឿង។
ប្រទេសដែលស្ថិតនៅតំណែងកំពូលទាំង ៤ បន្ទាប់ពីប្រទេសជប៉ុន រួមមាន ៖ ប្រទេសអូស្ត្រាលីដណ្តើមមេដាយសរុប៦គ្រឿង មាស៤គ្រឿង និងប្រាក់២គ្រឿង។ សហរដ្ឋអាមេរិកសរុប១២គ្រឿង មាស៣គ្រឿង ប្រាក់៦គ្រឿង និងសំរឹទ្ធ៣គ្រឿង។ ម្ចាស់ផ្ទះបារាំងសរុប៨គ្រឿង មាស៣គ្រឿង ប្រាក់៣គ្រឿង និងសំរឹទ្ធ២គ្រឿង។ កូរ៉េខាងត្បូងសរុប៦គ្រឿង មាស៣គ្រឿង ប្រាក់២គ្រឿង និងសំរឹទ្ធ១គ្រឿង។
ចំណែកចិន ឈរនៅលេខ ៦ ក្រោយឈ្នះមេដាយសរុប៦គ្រឿង មាស៣គ្រឿង ប្រាក់១គ្រឿង និងសំរឹទ្ធ២គ្រឿង។ ហើយគិតត្រឹមព្រឹកថ្ងៃចន្ទនេះ មាន១២ប្រទេសហើយ ដែលដណ្តើមបានមេដាយមាស ដោយនៅក្នុងនោះរួមទាំងប្រទេស អ៊ីតាលី កាហ្សាក់ស្ថាន បែលហ្ស៊ិក អាល្លឺម៉ង់ ហុងកុង និង អ៊ូសបេគីស្ថាន៕ (ប្រភព ៖ Paris 2024)
ចែករំលែកព័តមាននេះ