ប្រទេសជប៉ុន ៖ ដើម្បីផ្គាប់ចិត្តអ្នកគាំទ្រ ស្តេចប្រដាល់សកលហ្វីលីពីន ម៉ានី ប៉ាក់គីអៅ (Manny Pacquiao) បានប្រឹងប្រែងបញ្ចេញសមត្ថភាពបង្ហាញភាពអស្ចារ្យរបស់ខ្លួន នៅក្នុងការប្រកួតជាមួយអ្នកលេងគុនចម្រុះ…
ប្រទេសជប៉ុន ៖ ដើម្បីផ្គាប់ចិត្តអ្នកគាំទ្រ ស្តេចប្រដាល់សកលហ្វីលីពីន ម៉ានី ប៉ាក់គីអៅ (Manny Pacquiao) បានប្រឹងប្រែងបញ្ចេញសមត្ថភាពបង្ហាញភាពអស្ចារ្យរបស់ខ្លួន នៅក្នុងការប្រកួតជាមួយអ្នកលេងគុនចម្រុះ MMA ជនជាតិជប៉ុន Rukiya Anpo កាលពីយប់ថ្ងៃទី២៨ ខែកក្កដា ឆ្នាំ២០២៤ ដែលជាការប្រកួតក្រៅផ្លូវការ (Exhibition Match) លើសង្វៀនកម្មវិធី Super Rizin 3 របស់សមាគមប្រដាល់ជប៉ុន RIZIN នៅកីឡដ្ឋាន Saitama Super Arena ស្ថិតក្នុងទីក្រុងសៃតាម៉ា ប្រទេសជប៉ុន។
ការប្រកួតប្រភេទទម្ងន់៦៩គីឡូក្រាម ចំនួន៣ទឹក ហើយ១ទឹកមានរយៈពេល៣នាទីដ៏កក្រើកប្រទេសជប៉ុនមួយនេះ បញ្ចប់ទៅនៅក្នុងលទ្ធផលគ្មានអ្នកចាញ់អ្នកឈ្នះ និងគ្មានការដាក់ពិន្ទុជាផ្លូវការណាមួយពីចៅក្រម។ ស្របពេលដែលអ្នកប្រដាល់ឆ្នើមទាំងពីររូបមិនអាចផ្តួលដៃគូប្រកួតឱ្យបោះបង់ការប្រកួត។ តាមពិតទៅដើមឡើយ ប៉ាក់គីអៅ ត្រូវប្រកួតជាមួយអ្នកលេងគុនចម្រុះជនជាតិជប៉ុន Chihiro Suzuki នោះទេ ប៉ុន្តែក្រោយមករូបគេត្រូវបង្ខំចិត្តដកខ្លួនចេញពីការប្រកួត បន្ទាប់ពីបាក់ដៃខាងស្តាំ ហើយត្រូវជំនួសមកវិញដោយ Rukiya Anpo។
យ៉ាងណាមិញ ក្រៅពីការជក់ចិត្តដិតអារម្មណ៍នឹងសកម្មភាពប្រកួតរបស់ស្តេចប្រដាល់ហ្វីលីពីន ម៉ានី ប៉ាក់គីអៅ ដែលឈានដល់វ័យ៤៥ឆ្នាំនោះ អ្នកទស្សនាផ្ទាល់ប្រមាណ ៤៨,០០០នាក់ និងអ្នកតាមការផ្សាយផ្ទាល់ជុំវិញពិភពលោក ក៏ភ្ញាក់ផ្អើលជាមួយនឹងសមត្ថភាពរបស់ Anpo យ៉ាងខ្លាំងផងដែរ។ អ្នកប្រដាល់ MMA និង Kickboxing ជនជាតិជប៉ុនវ័យ២៨ឆ្នាំរូបនេះ បើទោះបីជាប្រកួតប្រដាល់សកលខុសពីជំនាញខ្លួនក៏ពិតមែន ប៉ុន្តែរូបគេបែរជាផ្តល់ការលំបាក់យ៉ាងខ្លាំងដល់គូប្រកួតរបស់ខ្លួន រហូតដល់ថ្នាក់ ប៉ាក់គីអៅ ភ្ញាក់ផ្អើល និងលាន់មាត់សរសើរ ក្រោយចប់ការប្រកួតនេះ។
យោងតាមប្រភពពីសារព័ត៌មានហ្វីលីពីន Rappler ដោយបានស្រង់សំដីរបស់ស្តេចប្រដាល់ហ្វីលីពីន ថ្លែងក្រោយចប់ការប្រកួត ដោយ ប៉ាក់គីអៅ សារភាពថា «Anpo ខ្លាំង ហើយវាយចេញបានយ៉ាងល្អ បើទោះបីជាមានបទពិសោធន៍ក្មេងខ្ចីយ៉ាងណាក៏ដោយ។ ប៉ាក់គីអៅ បានបន្ថែមថា «ការប្រកួតនេះ គឺជាការប្រកួតដ៏ល្អ ហើយបានធ្វើឱ្យខ្ញុំដឹងថា ខ្ញុំមានកិច្ចការជាច្រើនទៀតដែលត្រូវធ្វើ ប្រសិន បើខ្ញុំនឹងបន្តការប្រយុទ្ធនៅខែតុលា ឬ វិច្ឆិកា ខាងមុខនេះ»។
គួររំលឹកថា ស្តេចប្រដាល់ហ្វីលីពីន ម៉ានី ប៉ាក់គីអៅ កាលពីដើមខែមិថុនាកន្លងទៅ ធ្លាប់បានប្រកាសថា ខ្លួនកំពុងតែចរចារដើម្បីត្រឡប់ឡើងសង្វៀនប្រកួតប្រដាល់អាជីពសាជាថ្មីម្តងទៀត បន្ទាប់ពីបាត់មុខអស់រយៈពេល៣ឆ្នាំ។ ដោយកំពុងពិភាក្សាលើកិច្ចព្រមព្រៀងប្រកួតជាមួយអ្នកប្រដាល់សកលសញ្ចាតិអាមេរិក Mario Barrios ដណ្តើមខ្សែក្រវាត់ពិភពលោក WBC welterweight ហើយបើការពិភាក្សាសម្រេចចេញជាផ្លែផ្កា ការប្រកួតនឹងធ្វើឡើងនៅចុងឆ្នាំនេះផ្ទាល់តែម្តង។
គួរឱ្យដឹងថា ប៉ាក់គីអៅ ក្រោយព្យួរស្រោមដៃពីអាជីពនៅឆ្នាំ ២០២១ បានប្រឡូកក្នុងឆាក នយោ បាយ និងឈរឈ្មោះប្រជែងតំណែងប្រធានាធិបតីហ្វីលីពីនផងដែរ ប៉ុន្តែទទួលបរាជ័យក្នុងការបោះឆ្នោត កាលពីខែឧសភា ឆ្នាំ ២០២២។ ទោះយ៉ាងណាក៏ដោយ ប៉ាក់គីអៅ បានវិលត្រឡប់ឡើងសង្វៀនសម្រាប់ការប្រកួតក្រៅផ្លូវការ ដែលរៀបចំឡើងនៅទីក្រុងសេអ៊ូល ប្រទេសកូរ៉េខាងត្បូង កាលពីខែធ្នូ ឆ្នាំ ២០២២ ដោយបានយកឈ្នះអ្នកលេងក្បាច់គុនចម្រុះកូរ៉េខាងត្បូង និងជាតារាយូធូប DK Yoo។
ដោយឡែក Rukiya Anpo ដែលបានចាប់ផ្តើមអាជីពនៅឆ្នាំ ២០១១ ក៏មានប្រវិត្តមិនធម្មតាផងដែរ។ ឆ្លងកាត់៣៦ប្រកួត ឈ្នះ២៧ដង ស្មើ១ដង ចាញ់៨ដង និងបានផ្តួលគូប្រកួតឱ្យបោះបង់ការប្រកួត១៧ដង ខណៈស្មើ១ប្រកួតគឺជាមួយកំពូលអ្នកប្រដាល់មួយថៃ ប៊ូខាវ បេនឆាមេក កាលពីខែឧសភា ឆ្នាំ២០២៣ ។ Anpo គឺជាអតីតម្ចាស់ខ្សែក្រវាត់ K-1 Super Lightweight មុនពេលបន្តវិវឌ្ឍន៍ខ្លួនទៅជាកីឡាករគុនចម្រុះ MMA នៅចុងឆ្នាំ ២០២៣ ដោយឆ្លងកាត់១ប្រកួត ចាញ់កីឡាករមិត្តរួមជាតិជប៉ុន Yuta Kubo៕
ចែករំលែកព័តមាននេះ