ខេត្តស្វាយរៀង ៖ មើលចុះ រថយន្តធុនយក្សយីឌុបប្រភេទវ៉េអង ដឹកទំនិញចំនួន០២គ្រឿងដឹកលើសទម្ងន់ធ្ងន់ពេក បណ្តាលឲ្យជាប់ផុងទៅមុខលែងរួច ។ ករណីនេះ បានកើតឡើងកាលពីវេលាម៉ោង១១ និង៣០នាទីព្រឹកថ្ងៃទី២៦…
ខេត្តស្វាយរៀង ៖ មើលចុះ រថយន្តធុនយក្សយីឌុបប្រភេទវ៉េអង ដឹកទំនិញចំនួន០២គ្រឿងដឹក
លើសទម្ងន់ធ្ងន់ពេក បណ្តាលឲ្យជាប់ផុងទៅមុខលែងរួច ។ ករណីនេះ បានកើតឡើងកាលពីវេលាម៉ោង១១ និង៣០នាទីព្រឹកថ្ងៃទី២៦ កក្កដា ២០២៤ ស្ថិតនៅចំណុចជិតវត្តចេក ក្នុងភូមិសំរោង ឃុំសំរោង ស្រុកចន្ទ្រា ។
បើតាមប្រជាពលរដ្ឋបានលើកឡើងថា ប៉ុន្មានខែចុងក្រោយនេះ មានរថយន្តធុនធំៗយីឌុបភ្លៅប្រាំ និងរថយន្តប្រភេទវ៉េអង ដឹកទំនិញធ្ងន់ៗកំពុងធ្វើចរាចរណ៍នៅលើផ្លូវក្រាលកៅស៊ូ ដែលជាអំណោយដ៏ថ្លៃថ្លារបស់សម្តេចតេជា ហ៊ុន សែន ផ្តល់ជាចំណងដៃប្រជាពលរដ្ឋ ដែលរស់នៅតាមបន្ទាត់ព្រំដែននៃ ស្រុកចន្ទ្រា ដែលជាផ្លូវ ក្រាលកៅស៊ូ ប្រវែងប្រមាណ១០គីឡូម៉ែត្រ ក្លាយទៅជាផ្លូវដីស្រុតខូចជាសំបុកមាន់ កន្លែងខ្លះក្លាយជារណ្តៅជ្រៅ កន្លែងខ្លះ ក្លាយជាចង្អូរ ដីល្បាប់ រអឹល ពិបាកធ្វើដំណើរយ៉ាងខ្លាំងក្នុងរដូវវស្សានេះ ។
ប្រជាពលរដ្ឋលើកឡើងទៀតថា ផ្លូវដែលរងការខូចនេះ គឺចាប់ពីភូមិសំរោងឃុំសំរោង ទៅភូមិទួលស្តី ឃុំទួលស្តីនិង សែនត ភូមិគោកតែក ឃុំចន្ទ្រា ស្រុកចន្ទ្រា ។ប្រជាពលរដ្ឋបានអំពាវនាវសូមឲ្យលោកអភិបាលស្រុកចន្ទ្រា ជាពិសេស ឯកឧត្តមអភិបាលខេត្តស្វាយរៀង មេត្តា ចុះអន្តរាគមន៍ពិនិត្យមើលផ្លូវកៅស៊ូ១ខ្សែ តភ្ជាប់ពី ឃុំសម្រោង ឃុំទួលស្តី និងឃុំចន្ទ្រា ស្រុកចន្ទ្រា បានក្លាយទៅជាផ្លូវដី មានក្រឡុក រណ្តៅ ក្រហេងក្រហូងតូចធំជាច្រើនគីឡូម៉ែត្រនិងកន្លែងខ្លះគឺបាក់ស្រុតខូចទាំងស្រុង ដោយសារតែរថយន្តធំៗ យីឌុបភ្លៅប្រាំ ប្រភេទវ៉េអងដឹកទំនិញលើសទម្ងន់ ទាំងនេះ ហើយសង្ស័យថាជាទំនិញគេចពន្ធ ដោយបើកបរធ្វើចរាចរណ៍នៅលើដងផ្លូវតាមជនបទ បង្កឲ្យបាក់ស្រុតផ្លូវបែកល្បាប់ ពិបាកធ្វើដំណើរយ៉ាងខ្លាំងជាពិសេសសិស្សានុសិស្សធ្វើដំណើរតាមកង់ម៉ូតូទៅសាលារៀន។
បើតាមសមត្ថកិច្ចបានប្រាប់អ្នកសារព័ត៌មានយើងថា ផ្លូវក្រាលកៅស៊ូ០១ខ្សែនេះ តភ្ជាប់ពីឃុំព្រៃគគីរ ទៅឃុំច្រេស ឃុំចន្ទ្រា និងឃុំទួលស្តីនិងឃុំសំរោង រហូតដល់សាលាស្រុកចន្ទ្រា មានអ្នកធ្វើដំណើរទៅមកជាច្រើន កំពុងរងការបាក់ស្រុតខូច ក្រហេងក្រហូងជារណ្តៅធំៗ ផ្លូវកៅស៊ូក្លាយទៅជាផ្លូវដី ក្រឡុក ធំៗ ពិបាកក្នុងការធ្វើដំណើរជាខ្លាំង ដោយសារតែរថយន្តធំ ៗ យីឌុប ភ្លៅ៥ ប្រភេទវ៉េអង ដឹកទំនិញ ធ្ងន់ៗទាំងយប់ទាំងថ្ងៃ គឺចាប់ពី៤០តោន ទៅ៥០តោន ធ្វើចរាចរណ៏លើដងផ្លូវ បណ្តាលឲ្យបាក់ស្រុតផ្លូវក្លាយជារណ្តៅសំបុកមាន់ បែកល្បាប់បង្កឲ្យរអឹលពិបាកធ្វើដំណើរយ៉ាងខ្លាំងនៅរដូវវស្សានេះ។
ប្រជាពលរដ្ឋនៅភូមិសំរោង ឃុំសំរោង ភូមិទួលស្តីឃុំទួលស្តីស្រុកចន្ទ្រា បានលើកឡើងដែរថា. ផ្លូវនេះគឺជាផ្លូវក្រាលកៅស៊ូ ដែលសាងសង់ដោយកងវិស្វកម្ម សម្តេចតេជោ ហើយប្រជាពលរដ្ឋបានធ្វើដំណើរស្រួលបានតែ២-៣ឆ្នាំ ក៏ត្រូវខូចអស់វិញ ដោយផ្លូវនេះមានរថយន្តធំៗដឹកទំនិញធ្វើចរាចរណ៍ច្រើន គឺមានរថយន្តដឹកស្រូវ ដឹកស្កស ដឹកដីដឹកខ្សាច់ ដឹកថ្ម និងដឹកទំនិញជាច្រើនប្រភេទ ធ្វើចរាចរណ៍ទាំងយប់ទាំងថ្ងៃ ក្រុមឈ្មួញប្រើប្រាស់រថយន្តធុនធំ យីឌុបប្រភេទវ៉េអង ដឹកទំនិញធ្ងន់ៗបណ្តាលឲ្យស្រុតផ្លូវក្រាលកៅស៊ូទាំងស្រុងគឺរបើកកៅស៊ូអស់ ក្លាយទៅជាផ្លូវដី កាលពីខែប្រាំងដីហុយ ពេលរដូវវស្សា មានភ្លៀងធ្លាក់ជោគជាំ ក្លាយជាល្បាប់ដីឥដ្ឋ បង្កឲ្យរអឹលពិបាកក្នុងការធ្វើដំណើរយ៉ាងខ្លាំង។
ប្រភពបន្តថា រថយន្តធុនយក្ស ដឹកទំនិញទាំងយប់ទាំងថ្ងៃយកទៅសាងនៅច្រករបៀងជិតប៉ុស្ត៍ការពារព្រំដែន ទួលស្តី និងច្រករបៀងនៃប៉ុស្ត៍នគបាលវរះការពារព្រំដែនគោកតែក សង្ស័យជាទំនិញគេចពន្ធ ត្រៀមឆ្លងដែនទៅប្រទេវៀតណាម មិនដឹងថាជាទំនិញអ្វីខ្លះទេ។ មហាជនបានលើកឡើងថា រថយន្តធុនយក្សទាំងនេះដឹកទំនិញមករាល់ថ្ងៃសង្ស័យថាជាទំនិញគេចពន្ធមិនដែលឃើញសមត្ថកិច្ចណា ពិនិត្យនិងបង្ក្រាប ឡើយ។ ប្រជាពលរដ្ឋបានសំណូមពរសូមឲ្យអាជ្ញាធរខេត្តមេត្តា ជួសជុលផ្លូវ១ខ្សែនេះឡើងវិញដើម្បីឲ្យប្រជាពលរដ្ឋបានធ្វើដំណើរស្រួលផង។
ទាក់ទិនករណីនេះដែរ លោកសំ លីតូ ប្រធានមន្ទីរអភិវឌ្ឍន៍ជនបទ ខេត្តស្វាយរៀង បានមានប្រសាសន៍ថា បន្ទាប់ពីឃើញផ្លូវស្រុតខូច នេះ មន្ទីរ និងអាជ្ញាធរខេត្តបានលើកគម្រោងសំណើរទៅក្រសួង ហើយ ដើម្បីជួសជុលផ្លូវនេះឡើងវិញ ក៏ប៉ុន្តែ មិនទាន់ធ្លាក់ថវិកាមក ដូច្នេះសូមប្រជាពលរដ្ឋយោគយល់ ។ផ្លូវសាងសង់ស្អាតល្អហើយ ក៏ប៉ុន្តែ ដោយសារ រថយន្តធុនធំៗដឹកទំនិញធ្ងន់ៗធ្វើចរាចរណ៍ ទើបផ្លូវឆាប់ស្រុតខូចបែបនេះ។ទាក់ទិនករណីនេះដែរមិនអាចរកការបំភ្លឺពី លោកអភិបាលស្រុកចន្ទ្រា បានទេរហូតមកដល់ថ្ងៃទី២៧កក្កដា២០២៤នេះ។
ចំណែកលោកវរៈសេនីយ៍យ៉ន សុផល ប្រធានវរៈការពារព្រំដែនលេខ៦០៩ បានទេ ទូរសព្ទ័ជាច្រើនលើកក៏ប៉ុន្តែមិនអាចទំនាក់ទំនងបាន។ ចំណែកលោកប្រធានទីស្នាក់ការគយនិងរដ្ឋាករសាខាខេត្តស្វាយរៀងក៏មិនអាចទំនាក់ទំនងបានដែរ ។មហាជនអំពាវនាវដល់លោកអភិបាលខេត្តស្វាយរៀងមេត្តា ពិនិត្យដោះស្រាយបញ្ហា រថយន្តធុនយក្សដឹកទំនិញបំផ្លាញផ្លូវ ក្រាលកៅស៊ូ១ខ្សែជាអំណោយដ៏ថ្លៃថ្លា របស់សម្តេចតេជោហ៊ុនសែន ផ្តល់ជូនប្រជាពលរដ្ឋស្រុកចន្ទ្រានិងស្រុកកំពង់រោទ៌ បានធ្វើដំណើរស្រួលផង៕
ចែករំលែកព័តមាននេះ