ព្យុះយ៉ាជី ត្រូវបានសន្មត់ថា ជាព្យុះទីហ្វុងសាហាវបំផុត ដែលបានឆក់ជីវិតមនុស្សប្រមាណជាកន្លះពាន់នាក់ និងបំផ្លាញហេដ្ឋារចនាសម្ព័ន្ធនានាលើសពី២ពាន់លានដុល្លារ រហូតដល់រដ្ឋមន្ត្រីក្រសួងការបរទេសថៃអំពាវនាវឲ្យមានកិច្ចសហប្រតិបត្តិការក្នុងតំបន់ដើម្បីដោះស្រាយទឹកជំនន់។ លោក ម៉ារីស សានយ៉ាមផុងសា (Maris…
ព្យុះយ៉ាជី ត្រូវបានសន្មត់ថា ជាព្យុះទីហ្វុងសាហាវបំផុត ដែលបានឆក់ជីវិតមនុស្សប្រមាណជាកន្លះពាន់នាក់ និងបំផ្លាញហេដ្ឋារចនាសម្ព័ន្ធនានាលើសពី២ពាន់លានដុល្លារ រហូតដល់រដ្ឋមន្ត្រីក្រសួងការបរទេសថៃអំពាវនាវឲ្យមានកិច្ចសហប្រតិបត្តិការក្នុងតំបន់ដើម្បីដោះស្រាយទឹកជំនន់។
លោក ម៉ារីស សានយ៉ាមផុងសា (Maris Sangiampongsa)រដ្ឋមន្ត្រីការបរទេស ត្រូវបានកាសែត ឌឹណេសិនរាយការណ៍ថា បានកោះហៅឯកអគ្គរដ្ឋទូតបណ្តាប្រទេសនៅក្នុងតំបន់នៅថ្ងៃនេះ ដើម្បីបង្ហាញអំពីគំនិតផ្តួចផ្តើមស្វែងរកកិច្ចសហប្រតិបត្តិការជាមួយប្រទេសជិតខាងលើការគ្រប់គ្រងទឹក ដើម្បីដោះស្រាយបញ្ហាទឹកជំនន់ក្នុងរយៈពេលវែង។
ការលើកឡើងរបស់លោកធ្វើឡើងបន្ទាប់ពីតំបន់រងគ្រោះ ដោយទឹកជំនន់យ៉ាងខ្លាំងដែលបានវាយប្រហារសហគមន៍ក្នុងប្រទេសថៃ មីយ៉ាន់ម៉ា ឡាវ និងវៀតណាមក្នុងប៉ុន្មានសប្តាហ៍ថ្មីៗនេះ។
លោកបានមានប្រសាសន៍ថា ទឹកជំនន់ដែលបង្កឡើងដោយភ្លៀងធ្លាក់ខ្លាំង កំពង់ទន្ទ្រានអគារនៅតាមដងទន្លេ សៃ (Sai) នៅក្នុងប្រទេសថៃ និងមីយ៉ាន់ម៉ា ហើយលោកបានបញ្ជាក់ថា លោកគ្រោងនឹងស្នើសុំកិច្ចសហការគ្រប់គ្រងទឹកក្រោមកិច្ចសហប្រតិបត្តិការមេគង្គ-ឡានឆាង (MLC)។
តាមសេចក្តីរាយការណ៍គ្រោះទឹកជំនន់បង្កឡើងដោយព្យុះយ៉ាជីនេះ បានសម្លាប់មនុស្ស ២៥៤ នាក់ បាត់ខ្លួន៨២ នាក់ និងរបួស ៨២០ នាក់នៅវៀតណាម ។ នៅមីយ៉ាន់ម៉ាស្ថានការណ៍ក៏អាក្រក់ខ្លាំងណាស់ដែរ ដោយជំហានដំបូងមានសេចក្តីរាយការណ៍ថា វាបានសម្លាប់មនុស្ស១១៣ នាក់ ។
នៅថៃប្រមាណជា ១០ នាក់ ហើយឡាវនៅមិនទាន់មានសេចក្តីរាយការណ៍នៅឡើយ ខណៈដែលតំបន់ខ្លួនបានរងការលេចលង់គួរសមដែរ ជាពិសេសនៅតំបន់ត្រីកោណមាស ជាប់នឹងថៃ មីយ៉ាន់ម៉ា ស្របពេលដែលតំបន់ផ្សេងទៀត ក៏រងការគំរាមកំហែងដោយទឹកជំនន់ដោយរួមទាំងទីក្រុងវៀងច័ន្ទ។
ពាក់ព័ន្ធនឹងផលប៉ះពាល់វិញ អាជ្ញាធរវៀតណាមបានបូកសរុបត្រួសៗថា ព្យុះយ៉ាជី បានបំផ្លាញហេដ្ឋារចនាសម្ព័ន្ធសេដ្ឋកិច្ចមានតម្លៃប្រមាណជា ១,៦២ ពាន់លានដុល្លារ ស្របពេលដែល ថៃ ឡាវ និង មីយ៉ាន់ម៉ានៅមិនទាន់មានតួរលេខនៅឡើយ ប៉ុន្តែទំហំនៃការខូចខាតក៏មិនតិចតួចឡើយ ។
ចែករំលែកព័តមាននេះ