ការនាំចេញអង្កររបស់វៀតណាម ត្រូវបានគេរំពឹងថា នឹងឈានដល់ទំហំទឹកប្រាក់ប្រហែល៥ពាន់លានដុល្លារ នៅឆ្នាំនេះ ខណៈដែលតម្រូវការខ្ពស់ពីទីផ្សារធំៗដូចជា ហ្វីលីពីន និងឥណ្ឌូនេស៊ីជាដើម ខណៈដែលកម្ពុជាក៏សម្រុកនាំចេញស្រូវសម្បើមដែរ ។ ស្ថិតិពីសហព័ន្ធស្រូវអង្ករកម្ពុជា…
ការនាំចេញអង្កររបស់វៀតណាម ត្រូវបានគេរំពឹងថា នឹងឈានដល់ទំហំទឹកប្រាក់ប្រហែល៥ពាន់លានដុល្លារ នៅឆ្នាំនេះ ខណៈដែលតម្រូវការខ្ពស់ពីទីផ្សារធំៗដូចជា ហ្វីលីពីន និងឥណ្ឌូនេស៊ីជាដើម ខណៈដែលកម្ពុជាក៏សម្រុកនាំចេញស្រូវសម្បើមដែរ ។
ស្ថិតិពីសហព័ន្ធស្រូវអង្ករកម្ពុជា បានឲ្យដឹងថា នៅក្នុងរយៈពេល៨ខែដើម ឆ្នាំ២០២៤នេះ កម្ពុជាបាននាំចេញអង្ករបាន៤១២.០២៣ តោន ទៅកាន់គោលដៅ៦៥ បានចំណូល៣០៥ លានដុល្លារ តែការនាំចេញស្រូវ គឺបានបរិមាណជា៣,៣១ តោន មានប្រាក់ចំណូលប្រមាណជាជាង៩១៨ លានដុល្លារ នាំចេញទៅប្រទេសជិតខាង ។
សហព័ន្ធមិនបានបញ្ជាក់ប្រទេសជិតខាងនេះ ជាប្រទេសណានោះទេ ប៉ុន្តែអ្នកវិភាគបានដឹងថា ភាគច្រើនលើសលុប គឺនាំចេញទៅប្រទេសវៀតណាមនេះឯង ។
ដោយឡែក ទីផ្សារអង្ករវៀតណាមវិញសារព័ត៌មាន Vietnam News បានដកស្រង់របាយការណ៍ពីក្រសួងកសិកម្ម និងអភិវឌ្ឍន៍ជនបទរបស់ខ្លួនថា វៀតណាមបាននាំចេញអង្ករចំនួនរហូតដល់ទៅ ៦,១៦ លានតោន ក្នុងរយៈពេល៨ខែដំបូង នៃឆ្នាំនេះកើនឡើង៥,៩ ភាគរយធៀបនឹងរយៈពេលដូចគ្នា កាលពីឆ្នាំមុន ។ ប្រាក់ចំណូលពីការនាំចេញអង្ករឈានដល់ជិត៣,៨៥ ពាន់លានដុល្លារកើនឡើង ២១,៧ភាគរយ ។
ប្រភពដដែលបានឲ្យដឹងថា ពាណិជ្ជកម្មអង្ករវៀតណាម នៅពេលនេះ គឺកើនឡើងទាំងទ្វេដោយបរិមាណនាំចេញក៏កើន ហើយតម្លៃអង្ករនាំចេញក៏កើន ដោយជាមធ្យមនៅក្នុងរយៈពេលនេះបានកើនឡើងប្រហែល ១៤,៨ ភាគរយពោល គឺដល់៦២៥ ដុល្លារក្នុងមួយតោន ។
ផ្អែកតាមស្ថានភាពនេះ វៀតណាម បានព្យាករណ៍ថា ខ្លួនអាចនាំចេញអង្ករបានប្រមាណជា៨ លានតោន ជាមួយនឹងទឹកប្រាក់ប្រមាណជាជាង ៥ពាន់លានដុល្លារនៅក្នុងឆ្នាំ២០២៤នេះ ៕
ចែករំលែកព័តមាននេះ