ប្រទេសវៀតណាម ៖ ផលិតកម្មស្រាបៀរនៅក្នុងប្រទេសវៀតណាមបានធ្លាក់ចុះ ៤% នៅក្នុងរយៈពេល៨ខែដំបូងនៃឆ្នាំនេះ បើធៀបនឹងរយៈពេលដូចគ្នា កាលពីឆ្នាំមុន ព្រោះតែបណ្តាក្រុមហ៊ុនផលិតស្រាបៀរជាច្រើនកំពុងតស៊ូនឹងការធ្លាក់ចុះប្រាក់ចំណេញ។ នេះបើយោងតាមប្រភពពីសារព័ត៌មានវៀតណាម VnExpress…
ប្រទេសវៀតណាម ៖ ផលិតកម្មស្រាបៀរនៅក្នុងប្រទេសវៀតណាមបានធ្លាក់ចុះ ៤% នៅក្នុងរយៈពេល៨ខែដំបូងនៃឆ្នាំនេះ បើធៀបនឹងរយៈពេលដូចគ្នា កាលពីឆ្នាំមុន ព្រោះតែបណ្តាក្រុមហ៊ុនផលិតស្រាបៀរជាច្រើនកំពុងតស៊ូនឹងការធ្លាក់ចុះប្រាក់ចំណេញ។ នេះបើយោងតាមប្រភពពីសារព័ត៌មានវៀតណាម VnExpress ចេញផ្សាយនៅថ្ងៃទី១៦ ខែកញ្ញា ឆ្នាំ២០២៤។
លោក ង្វៀន វ៉ាន់ វៀត (Nguyen Van Viet) ប្រធានសមាគមស្រាបៀរ និងភេសជ្ជៈរបស់ប្រទេសវៀតណាមបានថ្លែងថា ឧស្សាហកម្មស្រាបៀរបានរងផលប៉ះពាល់ដោយគោលនយោបាយរឹតបន្តឹងរបស់រដ្ឋាភិបាល ពិសេសការបើកបរក្នុងស្ថានភាពស្រវឹង និងការលំបាកផ្នែកសេដ្ឋកិច្ចផងដែរ។ ហើយកត្តានេះបានប៉ះពាល់ដល់ទីផ្សារការងារ និងឧស្សាហកម្មផ្សេងទៀត ដែលផ្គត់ផ្គង់សម្ភារៈ និងសេវាកម្មដល់បណ្តាក្រុមហ៊ុនផលិតស្រាបៀរ។ តួយ៉ាង នៅក្នុងរយៈពេល២ឆ្នាំចុងក្រោយនេះ ក្រុមហ៊ុនធំៗក្នុងឧស្សាហកម្មស្រាបៀរវៀតណាមបានឃើញការធ្លាក់ចុះប្រចាំឆ្នាំចាប់ពី ៦-១២% នៃប្រាក់ចំណូល និងប្រាក់ចំណេញ។
ក្រុមហ៊ុនស្រាបៀរហូឡង់ Heineken បានប្រកាសថា ការផលិតស្រាបៀរនៅជុំវិញពិភពលោករបស់ខ្លួនបានធ្លាក់ចុះ ៤.៧% ភាគច្រើនដោយសារតែទីផ្សារប្រទេសវៀតណាម និងប្រទេសនីហ្សេរីយ៉ា។ ក្រុមហ៊ុនត្រូវបង្ខំចិត្តបិទរោងចក្ររបស់ខ្លួននៅខេត្តក្វាងណាម ប្រទេសវៀតណាម កាលពីចុងខែមិថុនាកន្លងទៅ។
ក្រុមហ៊ុនស្រាបៀរផ្សេងទៀតក៏បានរាយការណ៍អំពីការធ្លាក់ចុះប្រាក់ចំណេញក្នុងឆមាសទីមួយរបស់ពួកគេផងដែរ។ ក្រុមហ៊ុនក្នុងស្រុក Saigon – Western Beer បានឃើញការធ្លាក់ចុះរហូតដល់ ១៨% ខណៈដែល Saigon – Phu Tho Beer បានខាតបង់ប្រាក់ចំនួន១ពាន់លានដុង ស្មើនឹង ៤០,៧០០ដុល្លារអាមេរិក ធៀបនឹងប្រាក់ចំណេញ ២៦០លាន ស្មើនឹង ១០,៦០០ដុល្លារអាមេរិករយៈពេលដូចគ្នាកាលពីឆ្នាំមុន។
ថ្លែងក្នុងសន្និសីទសារព័ត៌មានកាលពីថ្ងៃអង្គារសប្តាហ៍មុន អ្នកស្រី លី គីមជី (Ly Kim Chi) ប្រធានសមាគមចំណីអាហារ និងចំណីអាហាររបស់ទីក្រុងហូជីមិញ បាននិយាយថា ការទទួលទានភេសជ្ជៈ រួមទាំងស្រាបៀរ និងស្រាបានថយចុះ ដោយសារបទប្បញ្ញត្តិដ៏តឹងរឹងរបស់រដ្ឋាភិបាល និងការរឹតបន្តឹងខ្សែក្រវាត់អ្នកទទួលទានផងដែរ។ អ្នកស្រីបន្តថា បណ្តាក្រុមហ៊ុនផលិតស្រាបៀរកំពុងដោះស្រាយការកើនឡើងថ្លៃដើម និងដំណើរការផលិតហួសសម័យ ដែលធ្វើឱ្យមានការលំបាកក្នុងការប្រកួតប្រជែង។
អ្នកស្រីបានកត់សម្គាល់ថា ដើម្បីកែលម្អដំណើរការឧស្សាហកម្មស្រាបៀក្នុងស្រុក បណ្តាក្រុមហ៊ុនត្រូវអភិវឌ្ឍផលិតផល ដែលស្របតាមនិន្នាការអ្នកទទួលទានសម័យទំនើប និងធ្វើឱ្យប្រសើរឡើងនូវបច្ចេកវិទ្យាផលិតរបស់ពួកគេ។
ជាមួយគ្នានោះផងដែរ លោក ង្វៀន វ៉ាន់ វៀត បានអំពាវនាវឱ្យមានគោលនយោបាយគាំទ្រដល់ឧស្សាហកម្មស្រាបៀរក្នុងស្រុក ដោយលោកលើកឡើងថា «ខ្ញុំគាំទ្រការរឹតបន្តឹងការបើកបរក្នុងស្ថានភាពស្រវឹង ប៉ុន្តែបទប្បញ្ញត្តិចាំបាច់ត្រូវតែកែសម្រួលឱ្យសមស្របទៅនឹងប្រព័ន្ធដឹកជញ្ជូនរបស់ប្រទេសវៀតណាម»៕ (ប្រភព ៖ VnExpress)
ចែករំលែកព័តមាននេះ