រាជធានីភ្នំពេញ៖ ក្មេងប្រុសជំទង់ម្នាក់បានសុំម្ដាយទៅលេងមិត្តភក្ដិ លុះបានការអនុញ្ញាតហើយក៏បានជិះម៉ូតូ១គ្រឿងម្នាក់ឯងស្កាត់ទៅរកជួបមិត្តភក្ដិ ប៉ុន្តែជាអកុសលមិនទាន់ទៅដល់ផងបានជួបគ្រោះថ្នាក់ចរាចរដ៏រន្ធត់មួយនៅតាមផ្លូវ ។ ដែលបង្កឡើងដោយរថយន្តម៉ាកហុីយ៉ាន់ដាយយីឌុបដឹកប្រេង១គ្រឿង បានបើកបុកពីក្រោយរួចកិនអូសជាច្រើនម៉ែត្រ បណ្ដាលឲ្យក្មេងប្រុសជំទង់ខាងលើស្លាប់បាត់បង់ជីវិតភ្លាមៗនៅក្រោមកង់រថយន្ត រីឯម៉ូតូក៏បានជាប់ក្រោមរថយន្តនោះផងដែរ ។
ឧប្បត្តិហេតុនេះបានកើតឡើងកាលពីវេលាម៉ោង ១និង២០រសៀលថ្ងៃទី១៨ ខែកញ្ញា ឆ្នាំ២០២៤ នៅលើផ្លូវព្រៃស ស្ថិតនៅក្នុងភូមិត្រពាំងស្វាយ សង្កាត់ព្រៃវែង ខណ្ឌដង្កោ រាជធានីភ្នំពេញ ។
រថយន្តដឹកប្រេង១គ្រឿងនោះម៉ាកហុីយ៉ាន់ដាយ ពណ៍ទឹកប្រាក់យីឌុប ពាក់ស្លាកលេខភ្នំពេញ 3G-1637 បើកបរដោយបុរសមិនស្គាល់អត្តសញ្ញាណម្នាក់ត្រូវនគរបាលឃាត់ខ្លួនបានភ្លាមៗ ។ ចំណែកយុវជនរងគ្រោះដល់ស្លាប់បាត់បង់ជីវិតនៅក្នុងឧប្បត្តិហេតុនោះ ឈ្មោះសុខ សុវណ្ណរក្សា អាយុប្រមាណ១៧ឆ្នាំ ជាសិស្សរៀននៅវិទ្យាល័យសាមគ្គី មានទីលំនៅសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេះញ ។ មានស្រុកកំណើតនៅស្រុកកោះអណ្ដែត ខេត្តតាកែវ ជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ តាកែវ 1M-3553 ។
តាមប្រភពពីប្រជាពលរដ្ឋដែលរស់នៅជិតកន្លែងកើតហេតុនោះបាននិយាយថា នៅមុនពេលកើតហេតុរថយន្តនិងម៉ូតូបានបើកបរធ្វើដំណើរក្នុងទិសដៅស្របគ្នា ពីកើតទៅលិចនៅតាមផ្លូវបេតុងព្រៃសនោះ ។ លុះពេលទៅដល់ត្រង់ចំណុចកើតហេតុ ក្មេងប្រុសជំទង់រងគ្រោះរូបនោះបានបើកវ៉ាឆ្វេងរថយន្តខាងលើ ហើយពេលវ៉ាផុតបន្តិចបានគេចចូលមកចំណែកផ្លូវម៉ូតូវិញ ។
ប្រភពដដែលបានប្រាប់ឲ្យដឹងបន្តទៀតថា ស្របពេលនោះដោយសារតែរថយន្តដឹកប្រេងនេះបើកលឿនពេក ក៏បានបុកម៉ូតូពីក្រោយម៉ូតូបណ្ដាលឲ្យដួលរួចកិនអូសជាង១០ម៉ែត្រទើបឈប់ ហើយជនរងគ្រោះស្លាប់ក្រោមកង់រថយន្តទាំងក្បាលពាក់មួកសុវត្ថិភាព។ ចំណែកម៉ូតូបានជាប់នៅក្រោមរថយន្តនោះដែរ ហើយភ្លាមៗនោះអ្នកបើកបររថយន្តប្រុងរត់គេចខ្លួន ប៉ុន្តែត្រូវបានកម្លាំងនគរបាលប៉ុស្តិ៍ព្រៃវែងឃាត់ខ្លួនបាន រួចនាំទៅធ្វើការសាកសួរនៅប៉ុស្តិ៍ ។
យុវជនម្នាក់ដែលត្រូវជាបងប្រុសរបស់ក្មេងប្រុសជំទង់រងគ្រោះខាងលើបាននិយាយថា នៅមុនពេលកើតហេតុប្អូនប្រុសរបស់ខ្លួនបានសុំម្ដាយទៅលេងមិត្តភក្ដិ ប៉ុន្តែអត់ដឹងថាមិត្តភក្ដិនៅទីណាឡើយ ។ កន្លងមកខ្លួនគ្រាន់តែដឹងថាប្អូនប្រុសមានមិត្តភក្ដិនៅជិតៗផ្ទះទេ ។ លុះក្រោយពេលម្ដាយយល់ព្រមអនុញ្ញាត ប្អូនប្រុសក៏បានជិះម៉ូតូចេញទៅបាត់ ស្រាប់តែក្រោយមកឮដំណឹងថាជួបគ្រោះថ្នាក់ដល់ស្លាប់បែបនេះ ។
បន្ទាប់មកនគរបាលប៉ុស្តិ៍ខាងលើបានសហការណ៍ជាមួយនគរបាលចរាចរខណ្ឌដង្កោធ្វើការសម្រួលចរាចរណ៍ត្រង់ចំណុចកើតហេតុ ព្រមទាំងរាយការណ៍ជូននគរបាលការិយាយល័យចរាចរណ៍ផ្លូវគោកនៃស្នងការដ្ឋានរាជធានីភ្នំពេញ ចុះទៅវាស់វែងយករថយន្តបង្កនិងម៉ូតូទៅរក្សាទុករង់ចាំដោះស្រាយតាមនីតិវិធីច្បាប់ និងប្រគល់សពជូនក្រុមគ្រួសារនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ