រាជធានីភ្នំពេញ ៖ នាយឧត្តមសេនីយ៍ ស ថេត អគ្គស្នងការនគរបាលជាតិ យល់ឃើញថា កម្លាំងនគរបាល និងសមត្ថកិច្ចពាក់ព័ន្ធទាំងអស់ ជាពិសេសមន្ត្រីនគរបាលចរាចរណ៍…
រាជធានីភ្នំពេញ ៖ នាយឧត្តមសេនីយ៍ ស ថេត អគ្គស្នងការនគរបាលជាតិ យល់ឃើញថា កម្លាំងនគរបាល និងសមត្ថកិច្ចពាក់ព័ន្ធទាំងអស់ ជាពិសេសមន្ត្រីនគរបាលចរាចរណ៍ ត្រូវបង្កើនការអប់រំច្បាប់ចរាចរណ៍ ដល់ប្រជាពលរដ្ឋតាមគ្រប់រូបភាព ជាជាងឃាត់ចាប់ផាកពិន័យ ព្រោះថា ការផាកពិន័យទៅលើប្រជាពលរដ្ឋ ដែលមិនគោរពច្បាប់ ហាក់មិនជោគជ័យដើម្បីឲ្យមនុស្សគោរពច្បាប់ឡើយ ការធ្វើបែបនេះ ដូចធ្វើបាបប្រជាពលរដ្ឋទៅវិញ ។
នាយឧត្តមសេនីយ៍ ស ថេត បង្ហាញការយល់ឃើញបែបនេះ នៅក្នុងពិធីសំណេះសំណាលជាមួយអ្នកបើកបរផ្តល់សេវាដឹកជញ្ជូនទំនិញ និងអាហារ ព្រមទាំងផ្តល់ប័ណ្ណថ្លែងអំណរគុណ និងមួកសុវត្ថិភាពជាអនុស្សាវរីយ៍ នាព្រឹកថ្ងៃទី១៨ ខែកញ្ញា ឆ្នាំ២០២៤នេះ នៅទីស្ដីការក្រសួងមហាផ្ទៃ ។
នាយឧត្តមសេនីយ៍ ស ថេត មានប្រសាសន៍យ៉ាងដូច្នេះថា ៖ «បើត្រឹមតែយើងម្នាក់ៗ ដែលប្រើប្រាស់ផ្លូវ យើងមិនគោរពច្បាប់ យើងខ្លាចតែនគរបាល យើងអត់គោរពច្បាប់..។ ច្បាប់នោះ គោលការណ៍នោះ ការអនុវត្តនោះ យន្ដការផ្សេងៗ មិនជោគជ័យទេ ច្បាស់ណាស់! ឥឡូវ ឧទាហរណ៍ថា មិនពាក់មួកសុវត្ថិភាព ត្រូវផាកពិន័យ០១លានរៀល ក៏នៅតែមិនជោគជ័យ បែរជាធ្វើបាបពលរដ្ឋវិញ នេះមិនមែនជាចំណុចមួយកែឲ្យមនុស្សទាំងអស់គោរពច្បាប់នោះទេ» ។
នាយឧត្តមសេនីយ៍ ស ថេត បានបន្តថា ការងារនេះ ត្រូវប្រើប្រាស់ពេលវេលា ហើយទាមទារឲ្យគ្រប់អ្នកពាក់ព័ន្ធ ចូលរួមសហការ ដើម្បីបង្កើនការផ្សព្វផ្សាយ និងអប់រំប្រជាពលរដ្ឋតាមគ្រប់រូបភាពទាំងអស់។ យូរៗទៅ នៅពេលប្រជាពលរដ្ឋមានស្មារតីគោរពច្បាប់ហើយនោះ ស្ទើរតែតាមដងផ្លូវ មិនចាំបាច់មានភ្លើងស្ដុប ឬមន្ត្រីនគរបាលចរាចរណ៍ ទៀតនោះទេ ។
ជាមួយគ្នានេះដែរ អគ្គស្នងការនគរបាលជាតិ បានបន្តទៀតថា អ្នកបើកបរផ្តល់សេវាដឹកជញ្ជូនទំនិញ និងអាហារទាំងអស់ ត្រូវចូលរួមគោរពច្បាប់ចរាចរណ៍ ជាពិសេស កុំទទួលរបស់បញ្ញើ ដែលខុសច្បាប់ ដូចជាគ្រឿងញៀន និងអាវុធជាតិផ្ទុះជាដើម ដើម្បីកុំឱ្យមានការជាប់ពាក់ព័ន្ធទៅនឹងបទល្មើសទាំងអស់នេះ ពីព្រោះថា ជាអំពើខុសច្បាប់ ។
នាយឧត្តមសេនីយ៍ ស ថេត បានថ្លែងយ៉ាងដូច្នេះថា ៖ «ក្រុមហ៊ុនដឹកជញ្ជូន និងអ្នកដឹកជញ្ជូនទាំងអស់ ត្រូវត្រួតពិនិត្យ និងសាកសួរ នូវប្រភពទំនិញទាំងឡាយណា ដែលមានការសង្ស័យឱ្យបានច្បាស់លាស់ ដើម្បីចៀសវាងទៅនឹងការដឹកជញ្ជូនទំនិញខុសច្បាប់ដូចជា គ្រឿងញៀន អាវុធជាតិផ្ទុះ និងរបស់បញ្ញើផ្សេងៗ ដែលខុសច្បាប់។ ពីព្រោះថា ការដឹកជញ្ជូនរបស់បញ្ជើ ដែលខុសច្បាប់ វាអាចនាំឱ្យអ្នកដឹកជញ្ជូន មានការជាប់ពាក់ព័ន្ធទៅនឹងបទល្មើសនោះដែរ» ។
ទន្ទឹមនឹងនេះ នាយឧត្តមសេនីយ៍ ស ថេត ក៏បានជំរុញ និងលើកទឹកចិត្តទៅដល់ក្រុមហ៊ុន និងអ្នកដឹកជញ្ជូនទាំងអស់ ត្រូវរាយការណ៍មកខាងសមត្ថកិច្ច នៅក្នុងករណី ដែលសង្ស័យថា មានការដាក់បញ្ញើខុសច្បាប់ ដើម្បីឱ្យសមត្ថកិច្ចធ្វើការស្រាវជ្រាវ និងស្វែងរកនៅមុខសញ្ញាមកផ្ដន្ទាទោសទៅតាមផ្លូវច្បាប់ ។
នាយឧត្តមសេនីយ៍ អគ្គស្នងការនគរបាលជាតិ ក៏បានលើកឡើងពាក់ព័ន្ធបញ្ហាចរាចរណ៍ ដោយពិនិត្យឃើញថា កន្លងមក បងប្អូនអ្នកប្រកបរបរដឹកជញ្ចូនទំនិញ និងម្ហូបអាហារមួយចំនួន តែងឧស្សាហ៍បើកបរលឿនៗ វ៉ាជែងល្មើសល្បឿន និងបំពានសិទ្ធិអាទិភាពអ្នកបើកបរដទៃ ដែលកត្តាទាំងនេះ បានជះនូវឥទ្ធិពលអាក្រក់ដល់របៀបរៀបរយលើដងផ្លូវសាធារណៈ ពិសេសទទួលរងនូវការរិះគន់ច្រើនពីសំណាក់ប្រជាពលរដ្ឋ ដែលបានឃើញផ្ទាល់ និងតាមបណ្តាញសង្គមជាដើម ។
ក្នុងន័យនេះ នាយឧត្តមសេនីយ៍ ស ថេត បានណែនាំឱ្យបងប្អូនគោរពច្បាប់ និងគិតពីអាយុជីវិតផ្ទាល់ខ្លួនជារឿងសំខាន់ និងអាទិភាពចំពោះមុខ ។ សូមបងប្អូនកុំគិតតែការចង់បំពេញឱ្យទាន់ចិត្តចង់បានរបស់អតិថិជន ហើយភ្លេចគិតពីផលប៉ះពាល់ដល់ខ្លួនឯង ។
បើយោងតាមការបញ្ជាក់ពីឧត្តមសេនីយ៍ឯក ចេវ ហាក់ អគ្គស្នងការរងនគរបាលជាតិ ទទួលផែនការងារចរាចរណ៍ និងសណ្តាប់ធ្នាប់សាធារណៈ បានឱ្យដឹងថា ក្នុង០៨ខែដើម ឆ្នាំ២០២៤នេះ គ្រោះថ្នាក់ចរាចរណ៍នៅក្នុងរាជធានីភ្នំពេញ កើតឡើងដល់ ៥៩១ករណី ដែលបានឆក់យកអាយុជីវិតមនុស្សសរុប ១៧៣នាក់ ។ ក្នុងចំនួន៥៩១ករណីនេះ មាន៦០ភាគរយ កើតឡើងដោយសារការល្មើសល្បឿន និង៤០ភាគរយ បើកបរដោយធ្វេសប្រហែស មិនគោរពច្បាប់ ៕
ចែករំលែកព័តមាននេះ