ប្រទេសបារាំង ៖ ពិធីបើកព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ ២០២៤ នឹងប្រារព្ធឡើងនៅថ្ងៃទី២៦ ខែកក្កដា ឆ្នាំ២០២៤ ខណៈដែលពិធីបិទនឹងធ្វើឡើងនៅថ្ងៃទី១១ ខែសីហា ឆ្នាំ២០២៤។…
ប្រទេសបារាំង ៖ ពិធីបើកព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ ២០២៤ នឹងប្រារព្ធឡើងនៅថ្ងៃទី២៦ ខែកក្កដា ឆ្នាំ២០២៤ ខណៈដែលពិធីបិទនឹងធ្វើឡើងនៅថ្ងៃទី១១ ខែសីហា ឆ្នាំ២០២៤។
ក្រៅពីពីទិដ្ឋភាពនៃពិធីបើក និងបិទក៏ដូចជាសកម្មភាពប្រកួតប្រជែងរបស់អត្តពលិកដ៏ជក់ចិត្តនៅព្រឹត្តិការណ៍ឆ្នាំនេះ ដែលគ្រប់ទន្ទឹមរង់ចាំទស្សនានោះ។ យើងក៏នឹងបានឃើញអត្តពលិក ដែលប្រកួតប្រជែងដណ្តើមបានមេដាយ ប៉ុន្តែមិនត្រូវបានរាប់បញ្ចូល ឬកត់ត្រាក្នុងតារាងមេដាយផ្លូវការ។ ហើយនោះគឺជាអត្តពលិកមកពីប្រទេសរុស្ស៊ី និងបេឡារុស។
ប្រភពពីសារព័ត៌មាន BBC កាលពីថ្ងៃទី២២ ខែកក្កដា ឆ្នាំ២០២៤ កន្លងទៅ បានឱ្យដឹងថា អត្តពលិកមកពីប្រទេសរុស្ស៊ី និងបេឡារុស្សនឹងចូលរួមប្រកួតកីឡាអូឡាំពិកឆ្នាំ ២០២៤ នៅក្នុងនាមអត្តពលិកអព្យាក្រឹតបុគ្គល ឬ ឯកត្តជន ដែលហៅកាត់ថា AIN ដោយមិនត្រូវបានអនុញ្ញាតឱ្យបង្ហាញ និងគោរពទង់ជាតិ ឬភ្លេងជាតិផ្លូវការរបស់ពួកគេ។ ថែមទាំងមិនអនុញ្ញាតឱ្យចូលរួមពិធីបើក និងបិទព្រឹត្តិការណ៍ ហើយក្នុងនោះការឈ្នះមេដាយរបស់ពួកគេទៀតសោត ក៏មិនត្រូវបានរាប់បញ្ចូល ឬកត់ត្រាក្នុងតារាងមេដាយផ្លូវការផងដែរ។
ប្រទេសរុស្សី និងបេឡារុស ត្រូវបានហាមឃាត់មិនឱ្យបញ្ជូនក្រុមអត្តពលិករបស់ពួកគេទៅអូឡាំពិកឆ្នាំនេះ បន្ទាប់ពីរុស្ស៊ីឈ្លានពានអ៊ុយក្រែន ហើយត្រូវបានគាំទ្រដោយបេឡារុស។ ប៉ុន្តែប្រទេសទាំងពីរទទួលបានការអនុញ្ញាតឱ្យបញ្ជូនអត្តពលិកឯកត្តជន ដែលបំពេញតាមលក្ខណៈវិនិច្ឆ័យដ៏តឹងរឹងដែលត្រូវបានកំណត់ ដោយគណៈកម្មាធិការអូឡាំពិកអន្តរជាតិ ដែលហៅកាត់ថា IOC។ អត្តពលិកទទួលការអនុញ្ញាតទៀតសោត ត្រូវតែប្រាកដថា ពួកគេមិនគាំទ្រសង្គ្រាម ឬមានទំនាក់ទំនងយោធា។
ប្រទេសរុស្សីបានបញ្ជូនអត្តពលិកឆ្នើមៗមួយចំនួនរបស់ខ្លួន ទៅចូលរួមកីឡាអូឡាំពិកឆ្នាំនេះ រួមទាំងកីឡាករវាយតេនី្នស Daniil Medvedev អតីតម្ចាស់ចំណាត់ថ្នាក់លេខ១ពិភពលោក ដែលមានកេរ្តិ៍ឈ្មោះល្បីល្បាញបំផុតរបស់រុស្ស៊ី។ IOC បានអញ្ជើញអត្តពលិករុស្សី ៣៦នាក់ និងបេឡារុស្ស ២៤នាក់ ស្ថិតក្រោមសិទ្ធិអនុគ្រោះ ប៉ុន្តែក្នុងនោះមានតែអត្តពលិករុស្ស៊ី ១៥នាក់ បេឡារុស ១៧នាក់ប៉ុណ្ណោះ ដែលទទួលយកការអញ្ជើញនេះ។
ដ្បិតកាលពីព្រឹត្តិការណ៍អូឡាំពិកនៅទីក្រុងតូក្យូឆ្នាំ ២០២០ គណៈកម្មាធិការអូឡាំពិករុស្ស៊ីបានបញ្ជូនអត្តពលិក ៣៣៥នាក់ ហើយបេឡារុសបានបញ្ជូន ១០១នាក់ ខណៈដែលប្រទេសរុស្ស៊ីបានអះអាងថា ខ្លួនមិនមានគម្រោងធ្វើពហិការនៃកីឡានោះទេ។ បើទោះបីជាប្រទេសរុស្ស៊ីចូលរួមប្រកួតនៅក្នុងនាមជាគណៈកម្មាធិការអូឡាំពិករុស្ស៊ី ដោយប្រើអក្សរកាត់ ROC ព្រោះតែបម្រាមពាក់ព័ន្ធបញ្ហារឿងអាស្រូវសារធាតុហាមឃាត់អត្តពលិករបស់ខ្លួន យ៉ាងណាក៏ដោយ។
ក្រៅអំពីលក្ខណៈវិនិច្ឆ័យដ៏តឹងរ៉ឹងលើអត្តពលិក រដ្ឋាភិបាល ឬមន្ត្រីរដ្ឋរបស់រុស្ស៊ី និងបេឡារុស មិនត្រូវបានអញ្ជើញឱ្យចូលរួម ឬការទទួលស្គាល់ណាមួយ សម្រាប់ព្រឹត្តិការណ៍កីឡាអូឡាំពិកឆ្នាំ ២០២៤ នោះទេ៕ (ប្រភព ៖ BBC)
ចែករំលែកព័តមាននេះ